Read Angami Naga Luk 4 Bible Online

Luk 4 - Angami Naga bible

Luk 4

¹Süsie Jisu Kemesa Ruopfü bu puo tshupfü di Jordan nunu la vorta mu Ruopfüu bu puo hü ze rayha nu vota,

²sidi Satan bu zha hiedia puo kedo. Siro puo süteikiko mhapuorei cü mo, süla teisozha süko tseita tse puo va merüta.

³Süki Satan puo ki, “No Kepenuopfü Nuou üro, ketsie hau ki pushü di puo bu niekhrüda meviliecie” ita.

⁴Derei Jisu sie puo ki, “ ‘Themia niekhrüda rübei la lhoulie lho’ sidi thupiezhü zo” sishü.

⁵Süsie Satan puo ze thechü kerükrie puo gei vo di vapuonu kijü nu kedirüvie pete thashü puo kie.

⁶Sidi Satan sie puo ki, “A hako zayieko mu hako mho kekuo kha n tsütuo; kekreilamonyü hako pie a tsüwate, mu a thuo khapie a medomia tsülie vi.

⁷Süla no tsu a rüsuo liro, mha hako pete sü n vieta zotie” sita.

⁸Sitse Jisu puo ki, “ ‘No Niepuu n Kepenuopfü rüsuolie mu puo lie rübei chü zolie’ sikecü thupiezhü” sishü.

⁹Süsie rei Satan puo ze Jerusalem nu vo di puo bu rüsuokiu tsüle gei thalie, sidi sie puo ki, “No Kepenuopfü Nuou üliro, n thuo hau geinu tetsucie,

¹⁰Kekreilamonyü ‘Puo teigeidielieko ketseshü di süko bu n rüguolietuo,’

¹¹süsie rei, ‘N bu tsu ketsie geinu n kesewa molieketuo la uko dziepie n memhilietuo,’ idi thupiekezhü la” sishü.

¹²Derei Jisu puo ki, “No Niepuu n Kepenuopfü kedo suo isikecü rei thupiezhü” si lashü.

¹³Siro Satan-e kedokecü neiüko se di Jisu kedo tseiwaketa sie, puo puotei kevi puo ngulie kemo teiki la puo khawa di tuota.

¹⁴Süsie Jisue Ruopfü kekuou bu puo tshupfü di Galil nu la vor, siro kijü sütsatie pete puo dze kepu bou vota.

¹⁵Puo uko sinagogko nunu mia petha, mu mia pete puo tshe phre.

¹⁶Süsie puo lhou kesier rünau Nazaret nu vorlie, sidi sabat nhie puo zhoki chüyakezha tuoi sinagog nu le. Sidi puo phrütuoü sie thalie,

¹⁷mu mia Isaya siedzekesiu leshütshüu chüpie puo tsü. Sitse puo leshütshüu kelhalie mu süu nu thupiekezhü hako ngulie:

¹⁸“Niepuu Ruopfüu a gei tuo, puo a bu dieliekeviu pie kejüko ki punu a kedalieketa la. Puo a bu mia die chüketuo mia khashüwaketuo pushieshü nu, mu mhicieko bu mha ngu lalieketuo punu, tsiu mia bu u pesekezhako khashü nu,

¹⁹mu Niepuu u ngukemezhie teicieu pu pesinushü” si.

²⁰Süsie puo leshütshüu keziwa di pie chalieu tsüwa, sidi ke bata. Siro sinagog nu kebako pete puo meho terüpfü bata.

²¹Sitse puo sie uko ki, “Thie ketholeshü die hau nieko donu chü tsei vorliete” sishü.

²²Sitse uko pete rei puo pu pevita mu puo tie nu kepar mia ngukemezhie dieko la uko ngo phreta, sidi uko sie, “Themia hau Josef nuou zo mo me” ita.

²³Sitse puo uko ki, “Darukesiu, n thuo n chü keshürholiecie, idi mhasidie hau kepu tuoi nieko süu a ki pu zotuo. Mu nieko sie, ‘No Kapernaum nunu mha chükeshü hie sikeshüko n rüna hanu rei chüshücie’ isi zotuo” sita.

²⁴Siro puo sie, “A nieko ki pu toushütuo, siedzekesimia puorei puo thuo puo rakhe nu zo we mia puo rhuya mo.

²⁵Derei ketho-u sü hau, thiedzü Elija teiki Israel nu samimiapfü kekra tuo mu süki teicie se di khrü sorou teirü mota di kijü pete nu pekrie kemerie chü;

²⁶sirei Elija ketsepie Sidon nu Zarefath nu samariamiapfü puo ki keshü sie kekrei puo kirei shü mo.

²⁷Siro siedzekesiu Elisha teiki Israel nu themia kekra mpa chü, siürei Siriamia Naman ükecüu rübei sie uko miapuorei chü keshürhoshü mo,” sishü.

²⁸Siro sinagog nu keba pete die hako sishü tse u nou rüpeta.

²⁹Sidi uko sie di rünau nunu puo whuowa mu puo merhashü ze uko rüna khie kijüthou puo hiekechü puo gei vo di süu geinu puo nekelhouwaketuo le tuota.

³⁰Derei puo themiako donu nu tuo se puo thuo puo chanu vota.

³¹Süsie puo tuo Galil nu Kapernaum nadi nu vota, sidi sabat nhie uko petha.

³²Sitse uko puo kepethadieko la u ngo phita, kekreilamonyü puo kekuo nyi se di mha puta.

³³Siro sinagog nu mia puo mesakemo kesuo ruopfü zetuoketa puo ba ru, puo shiekhoui di sie,

³⁴“Hieko kebvü hiecie! Nazaret-u Jisu no hieko ze kedipuo chü nyüya ga? No hieko pekawaketuo le vor me? No supuo shi a n si ba, no Ukepenuopfü Kemesau zo,” sita.

³⁵Derei Jisu puo kerhie di, “Kemekrie di puo geinu prataliecie!” sishü. Süki terhuokesuou themiau pfü kelhoupie uko mhodzünu zhüwa, derei puo bie kerüzawa mo di puo geinu prata.

³⁶Sitse uko pete u ngo phreta, sidi sie huoniehuo üse, “Die hau die kicüpuo ga? Puo kekuo mu kekuo se di mesakemo ruopfüko ki mha pu ru, süko puo die ze di pratacü ha!” sita.

³⁷Süsie sütsatie rüna kheko nu puo dze kepu mhapuochü tuota.

³⁸Süsie puo sinagog nunu tuo Simon kinu vo. Süki Simon kimianuo zuopfü ruki phizhü, sitse uko puo ki hapfü dze ketsota.

³⁹Süsie puo süpfü khie ki phi di rukiu kerhieshü tse süpfü ruki mota. Sitse hapfü mhai sielie di uko lie chü merei bata.

⁴⁰Siro niaki letazhü tse, themiako kechükenyü neiü nunu mhachü kebako ze puo ki vor; sitse puo puo dzie yhapie süko kehoupuo gei rei shü di süko pete chü keshürhoshü.

⁴¹Süki terhuokesuoko kekra rei ruorüi di, “No Ukepenuopfü Nuou zo” isi di mia kekra geinu prata. Siro puo terhuokesuoko kekhawa di süko bu die pu mvüta, kekreilamonyü süko puo üse Khrista zoükecü silieta.

⁴²Süsie teiso pi par tse puo tuo mia tuokemora vota. Sitse themia krodi puo pfhütuota; sidi uko vo puo tsolie ru, uko puo kha ze bata nyülie.

⁴³Derei puo uko ki, “A Ukepenuopfü Kedi dze dieliekeviu se nadi kekreiko nu rei pushü morosuo; kekreilamonyü süu la a ketseshü zo” sita.

⁴⁴Süla puo vo Judia[12] kijütsa sinagogko nu rei dieu pu tuota.