Read Angami Naga Luk 5 Bible Online

Luk 5 - Angami Naga bible

Luk 5

¹Va puo Jisu Genesaret zieu khieki tha tse, themiako puo kinu Ukepenuopfü die rünyütuoü vor puo getoutou zota.

²Sitse puo rüzieu khie rou kenie bakecü ngulie; mu khuoketekoe sünie khawa di vo u jal keshü tuota.

³Siro rou sünie puo Simon vie ru puo sünu lelie di puo bu khu zase rüzieu nu sa lelienuta. Süsie puo rouu nu balie di sünu nu sier mia krodiu petha.

⁴Siro puo die pu thewa tse Simon ki, “Rouu khuse dzü kesou nu philie di khuotelieketuo la nieko jal kelhoushücie” sita.

⁵Sitse Simon sie, “Niepuu, hieko teizeizha pete hie rhiechü zo, derei mhapuorei ngulie mo. Sirei no si üro n die la a jal kelhou lashütuo.”

⁶Uko sishü tse khuo kekra bolie di uko jal pfürhawatuoüta.

⁷Süla uko dzieziepie rou kekreiu nu ketuoko kie di uko bu vor kekhruohinuta. Sitse uko vor di khuoko pie rou kenienie tshulie tse rounie rületatuoüta.

⁸Ru Simon Pitor süu ngushü tse, puo tsu Jisu phinu khoutoulie di sie, “Tuo a therütayi, Niepuu, a kephoumamia zo mu!” sita.

⁹Kekreilamonyü puo mu puo zeketuo kheko rei uko khuo kekra telieketa ngu di u ngo phreta;

¹⁰mu sütuoi Simon Pitor zeketuo Zebedi nuonie Jakob mu Johan nie rei unie ngota; sitse Jisu sie Simon ki, “Michie hiecie; thie yawinu a n bu themia tetatuo” sita.

¹¹Siro uko rounie teshüpie rüzie khie shüwa tse, uko vie pete khawa di puo siemedzita.

¹²Siro va puo puoe vo nadiko puo nu ba ru, mpa chü phiketuo puo rei sünu ba. Themia süu Jisu ngukelie ki, puo tsu kijü zerepfü di puo ki puo mezhiemelo di sie, “Niepuu, no n medo üro, no a chü kemesawalie vi zo!” sita.

¹³Sitse Jisu puo dzie yhapie puo bie di sie puo ki, “A medowe, No mesaliecie!” sishü. Ru sishü mumetha puo geinu mpakechüu vita.

¹⁴Siro puoe süu bu mia puo kirei pu hienuwa. Sidi puo sie, “Sielie, di mezhü zievo-u ki vo di n thuo n pie zievo-u pekieshücie; sidi themia bu silieketuo la Mosa diekhakeshü kemhie no mesaketa ruotho-u chüwalie” sishü.

¹⁵Derei puo rüli pu kemo-u monyü pu krakuo sata, tsiu puo die rünyütuoü mu u kechükenyüko nunu shürholietuoü di mia krodi vor kengulieta.

¹⁶Sirei puo tuo rürei themia kejüra vo di kechachü bata.

¹⁷Khunhie puo, puo mia petha keba ki, Farisiko mu thezhokepethako huo süki ba, (sükoe Galil, Judia mu Jerusalem rüna kheko nunu vor); mu mia chü keshürholieketuo Niepuu kekuo rei puo ze tuo.

¹⁸Süki mia kro puo thezhü puo geinu lasiamia puo toupie vor, mu uko süu pie ki nu le di pie vo Jisu mhodzünu shütuoü sie,

¹⁹derei themia krathorcü la uko puo pie leketuo cha pfhü pejüta, süla uko puo toupie kikhru mho gei sie di süu biephalie di puo zhü geinu puo khapie Jisu mhodzü tounushü.

²⁰Puo uko kepele ngulie tse puo sie, “A zeu, n kephoumako vashü n tsüwate ho” sishü.

²¹Sitse thezhokepethako mu Farisiko kepu di, “Ukepenuopfü ketha die puyakezha themia hau supuote mu? Ukepenuopfü zokemosie supuonie mia kephoumako valie ta?” sita.

²²Siro Jisu uko noudoko silie di sie uko ki, “Nieko kiüdi mha sükemhieko leya mu?

²³‘N kephoumako vapie n tsüwate ho,’ idi kepuu, mu ‘Sie di cha tuoliecie,’ ikecü die sünie kiu pu rüükuotuo ga?

²⁴Derei kijü nu themia kephoumako vashü tsülieketuo Themia Nuo-ue kekuo bakecü nieko bu silie kenyü la” idi puo lasiau ki, “A n ki puya, no sielie, n zhü chüpielie di tuo n kinu votacie.”

²⁵Sishü mumetha puo uko mhodzünu nu sie puo zhü chüpie di Ukepenuopfü tshe zo puo thuo puo kinu vota.

²⁶Süla themia peteko u ngo phreta, sidi uko Ukepenuopfü tshe mu michie phi sa di sie, “Thie úko mha kethekhrükecü nguwata zo!” sita.

²⁷Mha hako sie puo tuo prazhü ru khezhanuo khruoyakezha Levi ükecü mia puo khezhanuo kekhruoba gei ba di ngulie; ru puo sie, “A siemedziliecie” sishü.

²⁸Sitse puo mha pete khawa di puo siemedzita.

²⁹Süsie Levi puo kinu puo la thehe kezha puo keseshü, mu sünu khezhanuo khruoyakezha kekra mu kekreimia huo rei sa di vo uko keze mizhü[13] geinu hie ba.

³⁰Süki Farisiko mu thezhokepethako vor pethakelieko gei panya di sie, “Kiüdi nieko khezhanuo khruoyakezhako mu kephoumamiako ze mhacümhakrieya ga?” ita.

³¹Sitse Jisu sie, “Keshürhomia darukesimia se morei vi; derei darukesimia kechümia la zo;

³²a kemiathoko kietuoü di vor monyü kephoumamia bu thenou kedilieketuo la kevor zo” sita.

³³Siro uko sie puo ki, “Johan siedziko we Farisiko siedziko mhie di tsiekenuo mevo mu chakuo phi, derei n siedziko we mhacümhakrie baya ze” si.

³⁴Sitse Jisu uko ki, “Mia puo thenu lie di mia ze hiekecü ki yasau keba nu puo khriethoko bu mevo balie vi me?

³⁵Derei mia bu süko ki nunu yasau zetaketuo tei puo vortuo; mu süze uko mevo batatuo” sishü.

³⁶Siro puo uko ki dievi pu sa di, “Miapuorei pfhe kesa se pfhe kewe pekhuoya mo; mhanuü sishü ro, pfhe kesau rei pfürhawatuo, tsiu pfhe kesayoe pfhe keweu gei shü ro kemhie motatuo.

³⁷Siro miapuorei zu kerünie pie chüzhüsü kewe nu shüya mo, puo sishü ro, zu kesau chüzhüu pfüphawatuo, sidi zuu krutatuo, tsiu chüzhüsü rei pekawatuo.

³⁸Derei zu kerünie rupie chüzhüsü kesa nu shü morosuo.

³⁹Mu miapuorei zu kewe krielieketa sie kesa mengu laya mo, kekreilamonyü puoe ‘Keweu vi’ ”[14] isiyacü la.