Read Angami Naga Luk 6 Bible Online

Luk 6 - Angami Naga bible

Luk 6

¹Siro sabat puo nhie Jisu tuo lievu puo pfüthe vozhü ru pethakelieko telha kre merhelie di u dzie nunu menoukho cü tuota.

²Sitse Farisiko huomia sie, “Nieko kiüdi sabat nhie thezhokemo puo chü tuota ga?” ita.

³Sitse Jisu sie, “Nieko thiedzü David mu puo zeketuoko merüketa ki kedipuo chü shicü phrü mo zo me?

⁴Puo Ukepenuopfü kinu le di Kepekie Niekhrüdau cü sidi huo khapie puo zeketuoko rei tsü, süusü zievoko zo kemosie kekreimia cükecü thezho nu puotou mo zo” sita.

⁵Süsie puo uko ki, “Themia Nuou sabat mho rei niepu zo” sishü.

⁶Siro sabat kekrei puo nhie puo sinagog nu le di mia petha, mu sünu mia puo puo dzie puo zatsa siaketamia puo ba.

⁷Süki thezhokepethako mu Farisiko puo pejoketuo pfhü di puo sabat nhie mia chü keshürhoshütuo mo lho shi idi puo meho terüpfü ba.

⁸Derei puo uko noudo silie di sie dziesiau ki, “Vorlie di haki thaliecie” ishü. Sitse puo sielie di süki thata.

⁹Ru Jisu uko ki, “A nieko ki ketsotuo, sabat nhie mha kevi chükecüu mo mha kesuo chükecü thezho ga? mia kerheiro kelakecü mo süu pekakecü ga?” sishü.

¹⁰Sidi puo rürei vo uko pete meho phreshükewa sie, themiau ki, “N dzie yhashücie” sita. Süla puo sishü ru puo dzie vilieta.

¹¹Derei themia süko u nei mo phi di Jisu pie kedipuo chü ro vitie shicü keputa.

¹²Siro süki puo kechachütuoü kijüthou puo gei vota, sidi puo teizeizha pete Ukepenuopfü ki cha ba tso.

¹³Sidi teisolie tse puo pethakelieko kiepie puo ki shülie di mia kerekenie kedalie sidi süko üse apostelko üdi kielie.

¹⁴Süko Simon, puo süu za thopie Pitor chüshü, mu puo siezeu Andria; Jakob mu Johan, Filip mu Bartholoma,

¹⁵Mathi mu Thoma, Alfia nuou Jakob mu Simon, puo Rhiekechüu rei üyakezhau,

¹⁶Jakob nuou Juda mu Judas Iskariot, kenuotsa Jisu tekeshüu.

¹⁷Siro puo süko ze ker kijü thezha ki puo thalie, sükisü puo pethakelie kekra Judia mu Jerusalem kijüko nunu, siro Tur mu Sidon kijü dzükezha khietsa nu themia kekra vorlie.

¹⁸Süko puo die rünyüketuo la mu puo bu uko kechükenyüko chü keshürhoshüketuo la vor phre; siro mesakemo ruopfüko bu u kebi zetuoketako rei sa vor mu süko rei shürholie.

¹⁹Siro themia krodiu rei puo nyütuoü pfhü tuota, kekreilamonyü kekuo puo puo geinu par di süko pete chü keshürhoshü baketa la.

²⁰Süsie puo tosie pethakelieko meho di pukeshü: “Nie mhakejüko thejakepfütho, Ukepenuopfü kedi nieko vie zokecü la.

²¹Nie merüyakezhako thejakepfütho, nieko pevülie zotuocü la. Nie tsie krayakezhako thejakepfütho, nieko neilie zotuocü la!

²²“Themia Nuou la mia nie mecü, nie melie, nie tha, tsiu nie üse suo üdi nie za peka ro nie thejakepfütho!

²³Nieko sünhie nie neilie mu pruoshülie, teigei nie zhakhra vi se baketa la; uko pfutsanuoko rei siedzekesiko gei sükemhie chü vor zocü la.

²⁴“Derei nieko mhakenyiko we ce chülietie, kekreilamonyü nie mha nie noukeluo nguliete.

²⁵Nieko tsie pevükebako we ce chülietie, kekreilamonyü nieko merütatuo. Nie tsie nyüyakezhako we ce chülietie, nie nou suo mu kra zotuocü la.

²⁶“Themia pete nie pu peviyakezhako we ce chülietie, kekreilamonyü nie pfutsanuoko rei ketijü siedzekesiko gei sükemhie chü vor zocü la.

²⁷“Derei nie a die rünyü kethako ki pushütuo, nie ngumvümia khrielie, nie ngumecüyakezhako gei mha kevi chülie,

²⁸japie nie rüseyakezhako tsülie, mu nie peseyakezhako la chaliecie.

²⁹Miapuonie n dzo tietsa puo vü ro, kekreitsa rei kereipie puo tsücie; miapuonie n pfhe pielieta ro, n boulie rei khashü khrieta hie.

³⁰Kehoupuorei n ki mha cha ro khapie tsücie, mu miapuonie n vie pielieta rei, süu cha la hie.

³¹Mia nie gei kedipuo chüshü ro nie nei shiü, nie rei mia gei sükemhie chüliecie.

³²“Nieko mia nie khrieyakezhako rübei khrieyakezha zo liro, süu kedipuo kemevi ba ga? Kekreilamonyü kephoumamia rei mia u khrieyakezhako khrieya ze.

³³Nieko mia nie gei mha kevi chüyakezhako gei rübei mha kevi chüyakezha zo liro, nie kedipuo kemevi ngulie ta? kephoumako rei sükemhie chüya ze.

³⁴Nie mha khapie mia ki ngu lalieketuoko thepuyakezha zo liro, nie kedipuo kemevi ngulie ta? Kephoumako rei mha ngu lalieketuo la mhapie kephoumako thepuya ze.

³⁵Derei nieko we nie ngumvümia khrielie, süko gei mha kevi chülie, mu mhapuorei ngulieketuo merü mo di mhapie mia thepucie. Siliro nie zhakhra vi phi zotuo, mu Kerükrietho-u nuonuo chülietuo; puo mia thezieyakemo mu kerüzhüko gei rei tseiüviya zocü la.

³⁶Nieko Puou mia ngumezhieyakezha tuoi nie rei mia ngumezhieliecie.

³⁷“Nieko mia kejo pfhü hie, siliro mia rei nie kejo pfhülie lho; nieko mia pejo hie, siliro mia rei nie pejolie lho. Nieko mia kejo vawalie, siliro mia rei vapie nie tsütuo.

³⁸Nieko mha pie mia tsülie, siliro mia rei mha khapie nie tsütuo. Sizomonyü mia mejü pevi phi mu nekete mu kesü rei shü tsiu tshuzie rei sa pie nie pfhe nu shüshü nie tsü zotuo; nieko mejükeshüu nunu mia rei mejü pie nie tsü la zotuocü la” sishü.

³⁹Puo dievi puorei pie uko ki pu di: “Mhiciemia mhiciemia chathalie vi me? Siliro kenienie te kheho nu leta lho me?

⁴⁰Kepethau ki pethakelieu zha mo, derei kehoupuorei pethapfü tseikelie nhie kepethau mhielietuo.

⁴¹Siro kiüdi n thuo n mhi nu seideu ngu mo di n siezeu mhi nu kerhu mehoya ga?

⁴²Morei kiüdi n thuo n mhi nu seideu ngu mo di n siezeu ki, ‘A siezeu, a bu n mhi nu keba kerhuu kawacie,’ icü pulie vi ga? No ketherakezhau! N thuo n mhi nu keba seideu thawa periecie, siliro no n siezeu mhi nu keba kerhuyo ngu meyiemeluolie di kawatuo.

⁴³“Seibo kevi puorei puo si kesuo vütaya mo; morei seibo kesuo puorei puo si kevi vülieya chie mo;

⁴⁴kekreilamonyü seibo kehoupuorei puo si geinu mia bu puo silieya, nieko zohubo geinu chiedesi rielieya mo, morei kikhahubo geinu khubesi rielieya mo.

⁴⁵Themia kevimia puo puo nou mha kevi pie kenguse bayakezha nunu mha kevi se parshüya, mu themia kesuomia puo nou mha kesuo kenguse keba nunu mha kesuoko se parshüya; kedipuo bu u ketshu chüpfütuo shiü u tie nunu süu paryakezha la.

⁴⁶“Nie kiüdi a nieko ki kepuko chüüzeya mo di a üse, ‘Niepuu, Niepuu’ iya ga?

⁴⁷Kehoupuorei a ki vor di a die rünyülie di süko chüüzeyakezhamia kedipuo mhie shi a thashü nie kietuo.

⁴⁸Süu mia puo puo ki kechü ki thie pesou le tsiekrie geinu ki mvüdze chü kemeteipie zhüwaketa mhie zo. Kerü nu dzü di sier ki süu va, derei bie kelelie kenjü, kekreilamonyü süu mvüdze peviwaketa la.[15]

⁴⁹Derei kehoupuorei a dieko rünyülie di chüüzeyakemo-u mia puo puo ki mvüdze chü kemeteilie mo di puo ki chüyakezhamia mhie zo; dzü di sier di kiu va tse, ki süu va puo chü tetsuta, sidi ki süu kadika!” sishü.