Read Angami Naga Luk 7 Bible Online

Luk 7 - Angami Naga bible

Luk 7

¹Siro Jisu die hako pupie mia kieshükewa sie tuo Kapernaum nu vota.

²Süki chüpahi krie mhokezhamia puo puo kekhrietho kituo puo mhachü di siatatuoü bata.

³Siro kezha süu Jisu dze sikeshü ki, puo bu vor puo kituou chü keshürhoshünu di Judamia pehümia huo ketseshü.

⁴Sidi uko Jisu ki vor tse, uko puo ki cha bei di sie, “No themia hauha ngumezhieshü zhü sekecü puo zowe,

⁵Kekreilamonyü puo hie themiako khrieya, mu puo hie la sinagog chüshü zo” sishü.

⁶Sitse Jisu uko ze vota, siro puo vor ki tsolieketuo cha ba moketa ki kezha süu puo kezemia kro puo ketsepie puo ki shü di puo ki, “Niepuu, no kemezhie tuo hietacie, kekreilamonyü n bu a ki khrükhro lerketuo a sü mo;

⁷süla a thuo rei vor n ze keseketuo a ziejüte. Derei no dieca puo pushü zorei a kituou shürholietuo.

⁸A rei kezhamia khro tuoyakezhamia puo, tsiu a khro rei chüpahimia ba; siro a mia puo bu, ‘Vocie’ ishü rei puo voya, mu kekreiu ki, ‘Vorcie’ ishü ro puo vorya, siro a kituou ki, ‘Hau chüshülie’ ishü ro, kituou süu chüya” si.

⁹Siro Jisu die hau sikeshü ki themia süu ngupie puo ngota, sidi rürei vo puo siemedziketuo krodiu ki, “A nieko ki pushütuo, a Israelmia donu rei u kepele kezha hade ngu chie mo!” sita.

¹⁰Sitse dielieko la kinu vor tse puo kituou shürho baketa ngulie.

¹¹Süsie cha bakemo[16] nu puo tuo Nain ükecü rünau nu vota, mu puo pethakelieko mu themia krodi puo rei sa puo ze vo.

¹²Siro puo tuo rüna süu kharu penuo vozhü tse mia kesiamia puo khruwatuo üdi pie prazhü. Kesia süusü puo zuo nuopfuliu, mu thenu süpfü rei samipfü puo; mu rünau nunu themia kekra puo ze di prazhü.

¹³Sitse Niepuu süpfü ngupie puo noumezhie di sie süpfü ki, “Kra hiecie” sishü.

¹⁴Sidi puo tuo phi mopiera bieshü, sitse süu pieketuoko thata. Sitse puo sie, “Khriesau a n ki puya, no sieliecie!” sishü.

¹⁵Sitse siaketau sie balie di die pu chielieta, siro Jisu puo khapie puo zuo tsüwa.

¹⁶Süki themiako michie phita, mu Ukepenuopfü tshe di sie, “Siedzekesi kezha puo u donu sierte!” mu “Ukepenuopfü puo themiako mehoshüte!” ituota.

¹⁷Siro puo dze hau keza se Judia pete mu sükhieümhou keba rüna kheko nu vota.

¹⁸Süsie Johan siedziko mha hako pete pie puo ki pushü. Süla Johan puo siedzimia kenie kielie.

¹⁹Sidi unie ketsepie Niepuu ki shü di, “Mia puo vortuo üdi pukecüu no me? Mo hie bu kekreimia puo merü batuo ga?” idi ketsonushülie.

²⁰Siro sünie puo ki vor tse sie puo ki, “Johan mia baptaiz kechüu hienie ketsepie n kishü di hienie bu n ki, ‘No vortuoüketuou mo, hie bu kekreimia puo pfhe la batuo ga?’ iyalie” si.

²¹Süki Jisu mia kekra kechükenyü, tsiu kechükere mu kesuo ruopfü bu u kebi zeketuoko chü keshürhoshü, siro mhiciemia kekra mhi rei chü pevi lashü.

²²Tsiu puo lasie sünie ki, “Vo di n nie kesikengu kheko pie Johan ki pushücie; mhiciemia mha ngulie bate, kerünyiemia chatuolie bate, mpakechümia rei chü kemesalie bate, nyievümia mhapfhe silie bate, kesiamia chü perhei lalie bate, dieliekeviu pupie kejüko kieshü bate.

²³Siro kehoupuorei a gei jata kemomia theja kepfütho” sishü.

²⁴Siro Johan chalienie tuoketa sie, Jisu krodiu ki Johan dze pu di sie, “Nie rayha nu kedipuo mehotuoü pra ga? Teikhrie bu he kele keba tekhriebo puo me?

²⁵Mo nieko kedipuo mehotuoü pra ga? Themia u pfhenei kevi sekecümia mu ketheguo di lhoukezhamia kedikiko nu baya ze.

²⁶Siüro nieko kedipuo mehotuoü pra ga? Siedzekesimia puo me? U, süu ketho, mu siedzekesimia ki rei zhakuokecü puo zo.

²⁷Puo dze thiedzü thupie tuokecü: ‘Harie, a n zie kengu mhodzü a chalieu ketseshütuo, mu puo n mhodzünu nu n cha kesetuo’ siketuou sü puo zo.

²⁸A nieko ki pushütuo, thenumia geinu lhou kevorko donu Johan ki kezha puorei lhou sier mo; derei Ukepenuopfü kedi nu we kecütho-u zorei puo ki zhakuo” ishü.

²⁹Siro themia peteko, thesolieyakezhako rei sa, Jisu die sishü di Ukepenuopfü üse puotouü phreta,[17] uko Johan dzülu khakeshü nunu dzülupfükelie la.

³⁰Derei Farisiko mu thezhokepethako we puo bu uko baptaiz chü mvü di uko thuo Ukepenuopfü medo-u meliewata.

³¹“A bu tsiedo kelhou phouu pie kedipuo ze kemejü ro puotou mu uko üse kedipuo mhie üta?

³²Ukoe nhicuko lhithochü nu ba di huoniehuo kie di sie, ‘Hie luoü khoushü nie kie, derei nie nashülie mo; hie thekrü chüshü, derei nie kralie mo’ ikeba mhie zo.

³³Kekreilamonyü Johan mia baptaiz chükezhau vorkecü niekhrüda cü mo mu zu rei krie mo ru nieko puo ki, ‘Puo terhuo kesuo zeya’ si;

³⁴siro Themia Nuou vor di mhacümhakrie ru, nieko puo ki, ‘Lere, mhakecü khu mu zu kekrie khu puo, khezhanuo kekhruoko mu mia u thiyakezhako khrietho-u’ sita.

³⁵Siüderei puo nuonuoko pete geinu mhasiu mezhü ücü thashü.”

³⁶Va puo Farisimia puo Jisu bu vo puo kinu mhacünu di kie, süla puo Farisiu ki vo di mhacütuoü ke balie.

³⁷Süki nadi nunu kephoumamiapfü puo Farisiu ki puo baükecü silie di alabaster bou puo pie vor.

³⁸Sidi puo Jisu phi ki thalie, di kra tha ru puo mhidzü potsu Jisu phi tsheta, süla puo tha pie süu süwa, süsie puo puo phi meboshü di tier rupie puo phi kenheshü.

³⁹Sitse Farisiu puo kiekeshüu süu ngushü di puo thuo puo rüchü di sie, “Themia hau siedzekesimia puo üro, puo bie ketha thenu kikemhiekecüpfü puo shi puo, kephoumamiapfü puo ücü sikelie mese ze” si tha.

⁴⁰Sitse Jisu puo ki, “Simon, a n ki mha puo pu nyüya” sishü. Sitse puo sie “Kepethau, pushüliecie” sishü.

⁴¹Sitse puo sie, “Thiedzü raka pie mia thepuyakezhamia puo mia kenie puo pu pfüzhü. Mia puo denari krie pengou mu kekreiu hiepengou.

⁴²Süsie sünie thepu sulie lhota, süla puo thepuko vapie unie tsüwa, siro, ki-a, sünie kiu puo ngupie puo neikuotuo ga?” sidi ketsota.

⁴³Sitse Simon sie, “Vapie tsü krashüketau zotiewe” sishü. Sitse puo sie, “No pu toushüta zo” sishü.

⁴⁴Sidi puo rürei thenupfü kitsa valie di sie Simon ki, “No thenu hapfü ngu tha mo? A n ki nu lerlie rei no we a bu a phi khrüketuo la dzü rei pie a tsü mo, derei thenupfü we puo mhidzüpie a phi khrüshü di puo thapie sü pesoshü.

⁴⁵No we a mebo chie mo, derei thenu hapfü we a lerkelie yawinu a phi mebo ba tsie tso.

⁴⁶No we oliv tier pie a tsü kenheshü mo, derei puo we tier pie a phi kenheshü.

⁴⁷Süla, a n ki pushütuo, puo kephouma rethortuoketako vapie puo tsüwate; puo a khrie a rhu phicü la. Derei va petsashü puo ketsüu puo we mia khrie petsaya” sishü.

⁴⁸Sitse puo sie hapfü ki, “N kephoumako vashü n tsüwate ho!” si.

⁴⁹Sükisü vor puo ze mhacü kebako uko thuo kepu di sie, “Mia kephoumako vapie tsüyakezha themia hau supuota mu?” sita.

⁵⁰Sidi puo sie thenupfü ki, “N kepele thuo n kelaliete ho; n nou mene di votalie” siwata.