Read Angami Naga Luk 8 Bible Online

Luk 8 - Angami Naga bible

Luk 8

¹Süsie chaba kemonu puo napfünadiko tsiu socüsonuo kheko nu vo di Ukepenuopfü kedi dze dieliekeviu pupie mia petha; siro kerekenieko puo ze tuo;

²tsiu terhuokesuo bu u kebi zeketuo mu kechükenyü nunu chü keshürhokelie thenuko huo rei sa tuo: süko Maria, Magdalin üyakezhapfü, puo geinu terhuo kesuo thenie whuokewapfü;

³mu Herod kiu nu kezha chüyakezha Chuza kimia Joana; mu Susana, tsiu süko zokemo u thuo u mhakra se Jisu mu pethakelieko khruohiyakezha thenumia kekrei kekra rei sa.

⁴Siro rüna puo sie rüna puo nunu idi mia krodi puo vor kengulieta; sitse puo dievi hau pu di sie;

⁵“Mia puo tsia vatuoü di tsu mu puo tsia vakeshü ki, tsia huo te cha nu tsuta, sidi mia bu kedewa, siro teirakoe pa cülieta.

⁶Siro huo tetsu ketsie gei zhüta, sidi süko tsüpar tse kijü puojütse kejü la rüwi toita.

⁷Siro tsia süko huo te zohu donu tsuta, sidi süko lhou par tse zohuko bu süko gekhriwa.

⁸Siro huo te kijü kevi nu tsulie, sidi süko zha sier di thekrie vülie” sishü. Sidi puo mha hako pushükewa sie, “Kehoupuorei u nyie nyi di rünyü kenyümia sümia bu rünyüliecie!” idi pu petoshü.

⁹Süsie puoe pethakelieko puo ki dieviu ca kedipuo shicü ketsota.

¹⁰Sitse puo sie, “Nieko bu we Ukepenuopfü kedi dze die kesouko silienuwate, derei kekreiko ki we dievi nunu puya, kekreilamonyü, ‘Sükoe meho rei ngulie lho, rünyü rei silie lho’ si.

¹¹“Dieviu ca sü hau zo; tsiau sü Ukepenuopfü dieu zo.

¹²Cha nu te tsuketako liro dieu rünyülie, derei satan vor di uko nou nu dieu seseketa, uko bu pelelie di kelalie moketuo la.

¹³Siro te ketsietsoru gei tsuketako liro, dieu rünyükeshü ki u neisiei di liekelieko. Derei uko mie jü, uko puotei huoyo rübei pele balie, sidi dophi uko gei phir tse thalie moketa.

¹⁴Siro zohu donu ketsuko we dieu rünyülie di lhou za phi tse kelhou nu nounyüko mu kinyiko mu u nei u nyü chükecüko bu u phawa di memielie moketako zo.

¹⁵Siro kijü kevi nu tsukelieko we dieu rünyülie di u nou dietho mu mezhü mu u shüshüta mo di süu se zo tha u si vükelieko zo.

¹⁶“Siro miapuorei mi petupie mhabou khro keviepie baya mo, morei pie thezhü khro baya mo, derei süu khapie mituba gei baya, siliro kinu keler pete kezie ngulieya.

¹⁷Kekreilamonyü se mia pesishülie lho ükecü mha keviepieketuo puorei jü, morei mia bu si mu ngulie lho ükecü mha kepekhre puorei jü zocü la.

¹⁸Süla nieko kimhie di rünyüya shiü menuoliecie; kekreilamonyü kehoupuorei mha kebau khapie puo tsü sashütuo, derei kehoupuorei mha bakemo-u puo ki nunu mha keduo yopuo ba üdi leyakezhau rei chü seta zotuocü la” sita.

¹⁹Süsie Jisunuo zuo mu puo siezeko puo ki vor, derei themia krathorketa la puo ki lelie suota.

²⁰Sitse mia puo ki, “N zuo mu n siezeko kitie vor thalie, uko n ze keseshü nyüya” sishü.

²¹Derei Jisu sie uko ki, “A zuo mu a siezeko sü Ukepenuopfü dieu rünyülie di chüüzeyakezhako zowe” sita.

²²Khunhie puo puo pethakelieko ze di rou puo nu le balie tse puo uko ki, “Úko rüzieu ciese lutsakhie pfüta khe” sita. Süla uko tuo sedeshü,

²³sidi uko rouu thu vozhü ru puo zetsuta. Siro süki rüzie nu khriedi puo sierta, tsiu dzü ler rouu tshunuota, mu uko pete rei kemichie nu tuota.

²⁴Süla uko puo ki vo puo kesou di sie, “Kepethau, Kepethau úko katatuoüzhie” sita. Sitse puo sier teikhrie mu dzürüpfhü ruoshü, sitse süko la zeita mu kemekrieta.

²⁵Sitse puo sie, “Nieko kepele kirapuo tuo ga?” sita. Derei uko pete u ngo mu michie phi phreta, sidi huoniehuo ki, “Themia haunie supuota di mu? Puo teikhrie mu dzürüpfhüko kechüshü ru süko puo die zeketa ha!” sita.

²⁶Süsie uko Galil dzükezha mhodzütsa keba Gerasin[18] kijü nu vorlie.

²⁷Sidi puo tuo keso nu pralie tse, rüna sünu terhuokesuo bu puo kebi zeketuomia puo ze keselie. Siro themia hau puo pfhenei se mo mu mekhruko nu rübei sie ki nu baya moketa puotei telheta.

²⁸Süki puo Jisu ngu tse, shiekhoui di te puo mhodzünu tsuzhüta; mu shiekhoui di sie, Jisu, Kerükrietho Kepenuopfü Nuou, no a ze kedipuo chü ta? A n ki a mezhiemeloyawe, no a pechü hiecie” sita.

²⁹Kekreilamonyü puo themia süu geinu mesakemo ruopfüu bu pratanu di pu thakecü la, (Ruopfü süu hamhodzü phi puo ketsi zetuote; sidi mia bu puo pfhe baya, tsiu thegiro mu phikha se puo phapfü baya zo; derei puo kepha sükosü biethe phaphawa di terhuokesuou bu puo kechü ze rayhako nu tsutatayacü la).

³⁰Süki Jisu puo ketso di sie, “N za supuo ga?” isi Sitse puo sie, “A za Legion” sita. Kekreilamonyü terhuokesuo kekra puo nou batacü la.

³¹Sitse uko puo bu uko ketsepie kheho kesoutho-u nu shü hienu chata.

³²Siro süki thevo krodi puo kijüthou phiki nu mha nge cütuo. Süla terhuo kesuoko Jisu bu uko whuopie süko nu shüwa nu cha: süla puo uko bu silienuwata.

³³Süla terhuokesuoko themiau geinu par di ta thevoko nu leta; sidi thevo kro-u pete tarüsou tsiekhiekha tsu di te rüzie nu le uko pelheikhri phrewa.

³⁴Siro thevo kepfheko mha süko ngu di ta vo nadiko mu rünako nu pu phreshüwa.

³⁵Sitse themiako kedipuo chüte shicü mehotuoü par, sidi uko Jisu ki vor tse, terhuokesuoko puo geinu praketa themiau puo pfhe puo nei selie mu puo nou meciephrüipfü di Jisu phiki bakecü ngulie. Sitse uko michie phita.

³⁶Siro mha süko ngukecükoe kimhie di terhuokesuo zeketuou viliete shicü uko ki pushü.

³⁷Sitse Gerasin[19] kijü ki themia pete puo bu uko ki nunu tuotanu chata; ukoe michie phiketa la. Süla puo rouu nu lelie di tuo lata.

³⁸Süsie puo geinu terhuo kesuoko praketa themiau puo ze tuotatuo üdi puo mezhiemelo; derei Jisu puo ketse di sie,

³⁹“N kinu la voliecie, sidi Ukepenuopfüe n gei kedipuo chüshü shiü pushülie” siwata. Sitse themiau nadi nu vo di Jisu puo gei kedipuo chüshü shicü dze pu tuota.

⁴⁰Siro Jisu la vorlie tse themia kroko u nei phi di puo zelie, uko pete rei puo pfhe bakecü la.

⁴¹Süki puo za Jaira ükecü sinagog nu krütamia puo vor. Sidi puo tsu Jisu phinu zhülie di puo bu puo ki vonuta,

⁴²kekreilamonyü puo puo nuo cie kerekenieketapfü puo rübei zo ru, süpfü siatatuoüzhüketa la. Sidi puo tuo vokezhü ki themia kroko puo getoutoupfü tuota.

⁴³Süko donu thenumiapfü puo cie kerekenie thezie krutuoketapfü puo, puo vie pete zepie daru kesimia bu puo theke, derei miapuorei puo chü keshürholie moketapfü puo rei tuo.

⁴⁴Süpfü puo sietsa vor di puo pfhephrie bieshü ru va puonu puo gei thezie kru mota.

⁴⁵Sitse Jisu sie, “Supuo a nyü ga?” idi ketso. Siro mia pete moü phreta tse, Pitor[20] sie, “Kepethau, themiako n houpfü di n ge toutoutuo ze” sita.

⁴⁶Derei Jisu la sie, “Mia puo a bie tou zo, kekreilamonyü kekuo a geinu prate” sita.

⁴⁷Süki thenupfü rüshülie kenjüta, süla puo michie pe zo di vor puo mhodzünu zhüta, sidi puo mechü mhodzünu nu puo kedipuo la puo pfhephrie bie shi mu kimhie di puo shürho mhailiete shicü puta.

⁴⁸Sitse puo sie süpfü ki, “A nuopfü, n kepele thuo n chü keshürhoshüte ho; n nou mene di volie” siwata.

⁴⁹Puo die süko pu ketha nu pehüu kinu mia puo vor di sie, “N nuopfü siate; kepethau bu kemezhie sa tuo hietacie” sita.

⁵⁰Siro Jisu hau sishü tse sie puo ki, “Michie hie, peleu pele zolie silie ro puo kelalie zotuo” sita.

⁵¹Sidi puo kiu tsolie tse, Pitor, Johan mu Jakob, tsiu u nuopfü nuo puo mu puo zuo zokemosie miapuorei bu puo ze kinu le mvüta.

⁵²Sikisü mia pete kra di puo krü phita ru, puo uko ki, “Nieko kra hiecie; puo siata mo derei zekezhü zocü la” sishü.

⁵³Sitse uko puo siata zokecü sikecü la puo kreta.

⁵⁴Derei puo puo dzie teshülie tsiu puo kie di sie, “Rüüpfü, no sierliecie!” sishü.

⁵⁵Sitse puo ruopfü la vorlie di puo mhai sielie, sitse Jisu mia bu mha se vor puo bu cülienushü.

⁵⁶Sidi puo puo puo zuo unie bu unie ngota; derei puo uko bu mha süko se mia puo kirei pu hienuwa.