Read Angami Naga Luk 9 Bible Online

Luk 9 - Angami Naga bible

Luk 9

¹Süsie puo kerekenieko kie kengulie di uko bu terhuokesuo kheko whuolie kevi mu kechükenyüko chü keshürholie kevi kekuo khapie uko tsü,

²sidi puo uko bu Ukepenuopfü kedi dze pupie pethashünu mu mia chü keshürhoshü nu ketseshü.

³Sidi puo uko ki, “Nieko rüve nu kethe morei likhuo morei niekhrüda morei shükeiraka morei boulie kerükrü rei se hiecie.

⁴Siro ki kehoupuo nu le shierei sünu ba zo vo tuo lakecü tsocie.

⁵Siro kehourapuorei mia nie peso mvü ro, rüna süu nunu tuo la kepra ki uko kepejo zasi nie phi geinu nyopheko rei kepfhü shüwalie” sishü.

⁶Süsie uko tuo vo di rüna neiüko nu dieliekeviu pie petha mu kechükenyümia rei chü keshürhoshü.

⁷Siro Herod kezhau mha süko dze pete sishü di puo nou mecata, kekreilamonyü themiako huomia Johan mia baptaiz kechüu rheilalieta üdi,

⁸mu huomia Elija vorta ü, tsiu kekreimiako sie thiedzü ketuo siedzekesiko mia puo rhei la vorta üdi puketa la.

⁹Sitse Herod sie, “Johan we a puo tsü ziewate, derei a puo dze kesi hau supuote mu?” isi bata. Sidi puo ze kesetuoü puo pfhü.

¹⁰Siro apostelko la vor di uko mha chükelie dzeko pete Jisu ki pushü. Sitse puo uko ze krei Bethsaida ükecü nu vota.

¹¹Siro themia krodiu süu dze silie tse, uko puo medzita; mu puo puo nei di uko zelie di Kepenuopfü kedi dze pupie uko kie, mu kechükenyüko chü keshürhoshü.

¹²Süsie teisozhau votazhü tse kerekenieko puo ki vor di sie, “Themiako ketsewacie, sidi uko bu haki keba rünako mu lieko nu vo di kecüca mu kebakezhü chü pfhülietacie, úko mia lhouyakemo chü puo nu tuoketa la” sita.

¹³Derei puo uko ki “Nieko thuo uko va chüshücie” sita. Sitse uko sie, “Hie bu vo themia hako pete la kecüca khrülie zo kemosie, hieko niekhrüda pengou mu khuo kenie zie tuo mote” sishü.

¹⁴Süko thepfumia mia nyie pengou mese tuokecü la! sita. Sitse puo sie puoe pethakelieko ki, “Themiako bu mia hiepengoungou di ke baliecie” sita.

¹⁵Süla uko sükemhie chü di peteko bu balie.

¹⁶Sitse puo niekhrüda pengouko mu khuonie chüpielie, sidi tosie teigei meho di japie süko gei shü, di süko bietshielie, sidi pie themiako tsüshü.

¹⁷Siro peteko rei cü di pevülie mu cü kepeshako puose merha kerekenie kengulie.

¹⁸Va puo Jisu puo thuo puo rübei kechachü ba mu pethakelieko rei puo khieki ba, sitse puo uko ki, “Themia kro-u a üse supuo üya ga?” idi ketso.

¹⁹Sitse uko sie, “Johan mia baptaiz kechüu üya; derei huomia we Elija üya; mu kekreiko we thiedzütho ketuo siedzekesiko mia puo rhei la vorketa puo üya” sishü.

²⁰Sitse puo uko ki, “Di siro nieko a üse supuo üya?” idi ketsota. Sitse Pitor puo die kela di sie, “No Kepenuopfü Khristau zo” sishü

²¹Siro Jisu uko bu hau pie mia puo kirei pu hienu kha bei

²²di, “Themia Nuou kemezhie phi morosuo, siro pehüko mu zievo kezhako, tsiu leshükesithoko bu puo meliewatuo, sidi puo dukhriwatuo, derei zha se nhie puo rheilasielietuo” sishü.

²³Süsie puo uko pete ki, “Kehoupuorei a siemedzi kenyümia puo thuo puo meliewa mu teisonhie puo thuo puo krus pie di a siemedziliecie.

²⁴Kekreilamonyü kehoupuorei puo thuo puo phou kelalie nyüyakezhau süu pejüwatuo, derei kehoupuorei a la puo phou pejükeshüu süu kelalietuo.

²⁵Siro mia puo kijü pete prapie puo vie chülie zorei puo phou pejüwa liro, puo kedipuo kepra ngulietuo ga?

²⁶Siro kehoupuorei a la mu a dieko la mengataya liro, Themia Nuou rei puo zayie tsiu Puou mu kemesa dielieko zayie se zayie chü kevor nhie puo la mengatatuo.

²⁷Derei a nieko ki pu toushütuo, haki ketha huomia Ukepenuopfü kedi ngu kemochie siatalie lho zokecü kro puo tha zo” sita.

²⁸Puo die hako pukeshü zha thetha sie, Pitor, Johan mu Jakob uko zelie di kecha chütuoü kijüthou puo gei khota.

²⁹Siro puo chakeba ki, puo zie puorhi kreita, tsiu puo pfheneiko rei krapie vavai zota.

³⁰Sitse ukoe mia kenie, Mosa mu Elija unie puo ze kerüchü ketha ngu.

³¹Unie-e zayie chü vor sidi ukoe puo Jerusalem nunu mhachü tseishü di tuotaketuo dzeko kerüchü.

³²Süki Pitor mu puo zenie zenyü sezhü, derei uko zeta mo di ba tse, puo zayieu mu mia kenie puo ze ketha ngulie.

³³Siro sünie puo kinu tuotazhü tse, Pitor sie Jisu ki, “Kepethau, uko keze haki ba tse vi zotuo; úko pru[21] se chülie khe, puo n la, puo Mosa la mu puo Elija la” sita, puoe mhale di die süko pu tha mota.

³⁴Siro puo die hako pu thaluocü nu kimhou puo shü vor uko zepfülieta; mu uko michie phita.

³⁵Sitse kimhou geinu mhapfhe puo, “Hauha a Nuou, a puo kedakelieu; nieko puo die rünyüliecie” isi vor.

³⁶Siro die süu pu kevor ki Jisu rübei tha di kengu zota. Süsie uko mha pu mo zeita mu uko mha kenguko puorei se sükiko mia puo kirei pu mo.

³⁷Süsie nhie uko kijüthou geinu kerlie tse mia krodi puo vor puo ze kese.

³⁸Süki mia puo krodiu do nunu shiekhoui di, “Kepethau, a n bu a nuou mehoshünu di a mezhiemeloya; a nuo puo rübei zo.

³⁹Tsiekenuo ruopfü puo puo kebilietaya, sitse puo kra ruorüitaya. Süsie puo ketarere di puo mhitsie meluo bvübvütaya; siro puo bie pesuo sekewa sie rei puo khawa mvü beitayalie.

⁴⁰A n siedziko bu süu whuowanu cha derei uko chülie kenjüte” sita.

⁴¹Sitse Jisu sie, “Nie kepele kejü tsiu mia rei nu tuoyakemoko, a bu kedithechiepuo nieko ze shügeshühie ba zotuo ga? N nuou ze haki vorlie” sita.

⁴²Siro u nuoyo phizhü tse, terhuokesuou puo pfükelhoupie kijü vapiezhüwa, di puo bu puo ketarerepfü zhüta. Derei Jisu mesakemo ruopfüu kechüwa di u nuoyo chü pevishü, sidi puo kha pie puo puo tsüwa.

⁴³Siro Kepenuopfü mhatho kezha hau la themiako pete u ngo phita. Siro puo mhathoko la themiako u ngopfü thaluocü nu puo pethakelieko ki,

⁴⁴“Die hako bu nie nyienu le chüsechüliecie: Themia Nuou tepie mia dzie nu shüwatuoü bate” sishü.

⁴⁵Derei uko puo die pukeshü hau ca lelie mota; uko bu süu ca lelie kelho chüwacü la uko süu ca lelie mota. Siro uko puo ki süu dze ketso michieta.

⁴⁶Siro uko donu suomia üse kezhatho chütie shikecü pu kemeü sieta.

⁴⁷Derei Jisu uko noule silieta, süla puo nhicumia yopuo ze vor puo khieki thalie,

⁴⁸sidi uko ki, “Themia kehoupuorei a za nunu nhicunuo hayo zekeliemia a zelieta zo, mu kehoupuorei a zekelieu a ketsekeshüu rei zelieya; kekreilamonyü nieko donu kecütho-ue kezhatho-u zo” sita.

⁴⁹Süsie Johan la sie, “Niepuu, hieko mia puo n za se terhuokesuo whuoketuo ngu, mu puo hie ze kesiedziliekemo la hie puo khawate” sita.

⁵⁰Derei Jisu sie puo ki, “Nieko puo kha hiecie, kekreilamonyü kehoupuorei nie petsouyakemo-u sü nie kitsa zo” sita.

⁵¹Siro puo ze khotaketuo tei penuo teitazhü tse, puo Jerusalem nu khoketuo la dojülie.

⁵²Sidi puo pedzüperie chaliemia ketseshüwa. Siro süko puo la mha pete kesetuo üdi tuo Samariamia rüna puo nu le;

⁵³derei uko puo ze mvüta, puo Jerusalem nu votuoütuocü la.

⁵⁴Sitse puo pethakelie Jakob mu Johan nie hau ngulie di sie, “Niepuu, no hie bu teigeinu mi chashü di uko pekawa nyü me?”[22] sishü.

⁵⁵Derei puo reipra di unie kerhieta.

⁵⁶Sidi uko tuo rüna kekrei puo nu vota.

⁵⁷Siro uko tuo vozhü tse, mia puo puo üse, “No kehoura vo rei a rei n siemedzi votuolie” sita.

⁵⁸Sitse Jisu puo ki, “Meseruko u ki nyi, tsiu teirako rei u kru nyi, derei Themia Nuou we puo tsü pie kezhüchü rei jü” ishü.

⁵⁹Siro puo kekreimia puo ki, “No a siemedziliecie” ishü. Derei puo sie, “Niepuu, a bu vo di a puo khruwa periecie” sita.

⁶⁰Derei Jisu puo ki, “Kesiako bu kesiako khruwalie, derei no we vo di Ukepenuopfü kedi dze pushücie” sita.

⁶¹Siro kekreimia puo lasie, “Niepuu, a rei n siemedzituo, derei a bu vo a kinuko ze kesewa riecie” sita.

⁶²Sitse Jisu puo ki, “Kehoupuorei duca thezese tha di rürei la puo sietsa meho ro Ukepenuopfü kedi themia chülie sü mo” sishü.