Read Angami Naga Pulakeshüzho 1 Bible Online

Pulakeshüzho 1 - Angami Naga bible

Pulakeshüzho 1

¹Die hako Mosae Jordan ciekepra rayha nu, Paran mu Tofel, Laban, Hazerot mu Di-zahab donu Suf rücietsa Araba nunu Israel pete ki pukeshüko zo.

²(Seir kijüthou chau ze di Horeb nunu Kadesh-barnia nu kevo zha kerepuokrü chatuo.)

³Cie hiedia cie khrü kerepuou zha puo nhie Mosae Israelmia ki Jihova puo bu punukeshü pete pie pushü.

⁴Puoe Heshbon nu keba Amorko kediu Sihon siro Ashtarot mu Edrei nu keba Bashan kediu Og penyükewa sie.

⁵Jordan cie kepra, Moab kijü nunu Mosae thezho hau vatsha di sie,

⁶Jihova Ukepenuopfü Horeb nunu u ki pukecü, “Nieko kijüthou hau gei bacha phite.

⁷Sielie di tuo Amorko kijüthou rüna nu mu Araba nu uko zanuo pete, kijüthou rüna shierei, kijü razha nu shierei, mu Negeb nu mu dzükezha khie keba Kananko kijü nu mu Lebanon, kerü kezhau Eufrat rü ketso voliecie.

⁸Harie, kijü khapie nie mhodzünu zhü ze, le di Jihova se nie puonuoko, Abraham, Isak mu Jakob mu uko nuosenuoyie tsütuoü di rüsepie kezhü kijüu pevielie” sishü.

⁹Süki a nieko ki, “A rübei zo we nieko selie kenjü;

¹⁰Jihova nie Kepenuopfü nie chü pekruoshüte, mu harie, nieko sü tsiewe krapie teigei themvüko mhiete.

¹¹Jihova, nie puonuoko Kepenuopfü bu nie chüpie tsie ki rei va nyie kekra pekrashülie, di puoe nieko ki phrakeshü mhie japie nieko tsücie.

¹²Kikidi a rübei we nieko mu nieko dienya mesiu mu thepieu pfülietuo mu!

¹³Nie seyie le di, mhakesi, mhacamhala kesi, mu mhachümezhieketamia kedalie, siro a süko bu nie mhokezhako chütuo” sita.

¹⁴Mu niekoe a ki, “No pukeshüu hieko la vi” idi a die kelashü.

¹⁵Süla ae nieko seyie krütako, mhakesimia, mhachümezhieketamia zelie, di uko pie nie seyie pete donu nie mho kezha chüshü, nyie mhokezha, krie mhokezha, hiepengou mhokezha mu ker mhokezhako chüshü.

¹⁶Mu sükisü ae nie capiko ki, “Nie siezedzürie donu dieshüdienya rünyülie mu mia puo mu puo siezeu morei puo zekeba rüso-u donu dietho di capi chüshülie.

¹⁷Nie capi nu nie nei sikrei suo; nie kecüu die rei kezhau die rei rünyü toukecü mese; nie themia zie preita suo, capiu sü Ukepenuopfü vie zocü la; mu thenyieu nie la rethorta ro se a ki vortuo, mu a süu rünyüshütuo” si.

¹⁸Mu a süki nie bu chü morokesuou nie ki pushü.

¹⁹Siro Jihova hie Kepenuopfü hie ki diekhakeshü tuoi, hiekoe Horeb nunu tuoshü di Amorko kijükhru rüna chau nu kevo rayha kezha mu kemeriekecü nie ngukeshüu pete pfüthe vo; sidi hie Kadesh-barnia nu vorlie.

²⁰Sidi ae nieko ki, “Niekoe Jihova Ukepenuopfü pie u ketsü Amorko kijükhru rüna nu vorliete.

²¹Harie, Jihova Ukepenuopfü kijüu pie nie mhodzünu khapie zhüte; kho di pevielie Jihova nie puonuoko Kepenuopfü nie ki pushüte; michieta hie morei nie nou thachüta hie” sishü.

²²Sitse nie pete a penuo vor di sie “Hie bu themia ketse pie hie mhodzüshü di uko bu vo kijüu rie di hie bu cha kiu ze kho morosuo shikecü mu nadi kikecü kropuo nu votie shikecü die se la vor hieko tsücümu” si.

²³Mha süu a dzüki puo toulie, mu ae nieko donu mia kerekenie zelie, seyie puo nu mia puopuo idi.

²⁴Mu uko tuo se kijükhru rüna nu kholie, sidi Eshkol razhau nu volie, di süu rieshü,

²⁵mu uko kijü süu nu nhasi huo riepielie di die se hie ki tsur di sie, “Jihova Ukepenuopfü se u ketsü kijüu kijü kevi puo zo” si.

²⁶Sizoürei niekoe kho mvüta, di Jihova nie Kepenuopfü diekhakeshüu perhie petsouta;

²⁷mu niekoe nie pfhekiko nunu panya di sie, “Jihova u ngumecücü la Ijipt kijü nunu u ze parte, u khapie Amorko dzienushü di u pekawatuoü di.

²⁸We kirapuo khotuoüzhü ga? U siezedzürieko bu u kede di sie, ‘Themiako u ki zha mu chakuo, nadiko zha mu dahou housie tei thu; mu sizomonyü hie sünu Anakim nuonuo ngu di hie melou bie kethachüwa’ ” ita.

²⁹Sitse ae sie, “Uko le merie morei preita hie.

³⁰Jihova nie Kepenuopfü nie mhodzü vokezhüu nie la terhü chüshütuo, puoe Ijipt nu nie mhingu kinu nie la chükeshü tuoi.

³¹Mu rayha nu rei Jihova nie Kepenuopfü nie bu thechü hau nu vorlie kemochie cha puocha puochie mia u nuonuo toupieyakecü tuoi nie toupie vor tso.

³²Derei die hau pushü zo rei nie-e Jihova nie Kepenuopfü pele mo.

³³Puoe nie bu nie pfheki pethoulieketuo la thechü pfhü di, mu nie bu cha kiu zetuo shikecü thashüketuo la, theva gei ro mi mu khinhie gei ro kimhou idi cha nu nie mhodzü voshü.”

³⁴Siro Jihovae nie dieko sishü di puo nei mota, di puoe rüse di sie,

³⁵“Thephou kerüzhü hau nu mia puo bu rei a rüse di khapie nie puonuoko tsütuoükeshü kijü keviu ngulie lho.

³⁶Jefune nuou Kaleb zo kemosie; puo zo we ngutuo, mu ae puo vo pralieketa kijüu pie puo mu puo nuonuoko tsütuo, puo Jihova medzi lotsokelie la” sishü.

³⁷Nie la Jihova bu a gei rei puo nei mota di sie, “N bu rei sünu lelie lho;

³⁸Nun nuou Joshua n mhodzü thayakezhau bu letuo; puo nou chükethepfushülie puoe Israelko bu süu welieketuo la.

³⁹Sizomonyü nie nuonuo kecüko mia bu uko telietuo ikebako, mu nie nuonuo tsie kevikesuo si moluokecüko sünu letuo, mu ukoe süu pie uko vie chütuo.

⁴⁰Derei nieko la we, pesie se Kemerie Dzükezha[1] kevatsa rayha nu volie” sishü.

⁴¹Sitse niekoe a ki, “Hiekoe Jihova gei phoumawate! Hie pra di terhüchütuo, Jihova hie Kepenuopfü diekhakeshü mhie di” si. Sidi nie pete rünyie pie u gei goupfülie, di kijükhru rüna gei khokecü rüü thenyüsie sie.

⁴²Mu Jihova a ki, “Uko ki pushücie, ‘Uko bu kho di terhüchü hie, a nieko donu ba mo mu, nie ngumvümia lhotalie vi’ sishü.”

⁴³Mu a nieko rüchü zorei niekoe a die rünyü mvüte, di niekoe Jihova diekhakeshüu petsoute, mu kemharhü di kijükhru rüna nu kho.

⁴⁴Sitse kijükhru rüna nu keba Amorko nie petsou par di mepfhi tuoi nie whuo, di Seir nu Horma ketso nie penyü vowa.

⁴⁵Mu niekoe Jihova mhodzü vor di kra; derei Jihova nie pfhe rünyü mo mu nie meho mota.

⁴⁶Sidi niekoe Kadesh nu zha kekra bata.