Read Angami Naga Pulakeshüzho 10 Bible Online

Pulakeshüzho 10 - Angami Naga bible

Pulakeshüzho 10

¹Süki Jihova a ki, “Tsiekra kerienie mhiekecü kenie bielie, di se kijüthou gei a ki khorlie, mu sei pie mhabou puo chülie.

²Siro ae no biephrokewa tsiekra kerie nie gei keba dieko thushütuo, sitse no pie mhabou-u nu shülietuo” sishü.

³Süla ae akasia pie mhabou puo chülie di tsiekra kerie nie mhiekecü kenie bielie; di tsiekra nie pielie di kijüthou gei kho.

⁴Ru puoe diekhakeshü kerko,[7] Jihova kijüthou gei mechü kehou nhie mi donu nu nie ki pukeshüko pie kerieu va kemhie tsiekra nie gei thushü, sidi Jihovae pie a tsüshü.

⁵Süsie ae rüreilie di kijüthou geinu kerta, di tsiekra nie pie a chükelie mhabou nu shülie, mu Jihova a ki diekhakeshü mhiei sünie pie sünu shülie.

⁶(Siro Israelkoe Jakan nuonuoko dzükhou nunu Mosera nu vo. Sünu Aron siata, di sünunu puo khruwa, mu puo nuou Eliazar puo sounu zievo chülie.

⁷Sünunu ukoe Gudgoda nu volie, mu Gudgoda nunu Jotbatha, rücü kenyi kijü puo nu volie.

⁸Süki nu thie ketso rei Jihovae Levi seyiemiako bu Jihova ze dietseidiekho mhabouu pietuoü mu uko bu Jihova mhodzünu tha di lietho chütuoü, mu puo za nunu jashütuoü di uko kha pekreipie bawa.

⁹Süla Levi-e puo siezedzürieko ze puo ya morei puo phruo jü, Jihova thuo puo phruo chü, Jihova nie Kepenuopfü puo ki pukeshü mhiei.)

¹⁰Va therieu kemhie a kijüthou gei teisozha hiedia mu teizeizha hiedia ba mu süu va rei Jihova a pfhe rünyüshü, Jihova nieko pekawa nyü mota.

¹¹Mu Jihovae a ki “Sielie, themiako mhodzü rie di n rüve nu tuoshülie, uko bu le di ae uko tsütuoü di uko puonuoko ki rüsepiekezhü kijüu pevielieketuo la” sita.

¹²Siro harie, Israel, Jihova n Kepenuopfü n ki nu kedipuo menguya ga? Jihova n Kepenuopfü preikecüu zo, puo cha pete nu tuokecü, puo khriekecü, mu n melou pete mu n ruopfü pete se Jihova n Kepenuopfü liechükecüu,

¹³mu a thie n dzevi la n ki diekhakeshüu zenukecü, süusü, Jihova diekhakeshüko mu puo zhoko zenukecüu zo.

¹⁴Harie, teiko mu teiko teiu rei, kijüu mu kijüu nu keba peteko Jihova n Kepenuopfü vie zo,

¹⁵derei Jihova n Kepenuopfüe n puonuoko rübei khriekecü puo medota, mu puo uko nuosenuoyieko, mia kekreimia mho kedalie, thie hatuoi.

¹⁶Süla nie melou-u zhürewaliecie, sidi nie nou reta hiecie.

¹⁷Kekreilamonyü Jihova nie Kepenuopfüe terhuoko Rhuou, mu Niepuko Niepuu, kezha, kekuo mu kemeriekecü Kepenuopfü puo, miapuorei khrie pekreiya mo, mu theso lieya mo.

¹⁸Puoe u puonuo kejümia mu samipfümia la kethoca chüshüya, mu rüso-u khrieya, süko vachüshü mu pfhemenei pie tsüshüya.

¹⁹Süla no rüsomia khriecie, nie rei Ijipt kijü nu rüso chükecü la.

²⁰No Jihova n Kepenuopfü prei morosuo, puo rübei rüsuo morosuo. Puo rübei kutsapfü tuo morosuo, mu puo za rübei se rüse morosuo.

²¹Noe puo rübei tshetuo; puoe n Kepenuopfü, n mhodzünu mha kezha kemeriekecü chükeshü la.

²²N puonuoko mia hiethenie Ijipt nu tsu; mu tsie Jihova n Kepenuopfü n chüpie teimeluo gei themvü tuoi phrühulie kenjükecü chüshüte.