Read Angami Naga Pulakeshüzho 11 Bible Online

Pulakeshüzho 11 - Angami Naga bible

Pulakeshüzho 11

¹Süla no Jihova n Kepenuopfü khrietuo, puo n pelekeshüko setuo, puoe chünukeshüko zetuo, puo zhoko, mu puo diekhakeshüko ze sei morosuo.

²Mu thie leshücie, ae nie nuonuo u thuo si mu ngu zokemoko ki pu tha mo, Jihova nie Kepenuopfü nie pethakeshüko leshücie, puo kezha, puo kekuo, puo bou yhakeshü,

³puo zasiko mu puo mhathoko, puoe Ijipt nu kediu Faro gei mu puo kijü pete ki chükeshüko,

⁴mu puo Ijipt rüpfhünuo gei, uko gurako gei mu uko gariko gei chükeshüko; ukoe nieko whuokevor ki puoe Kemerie Dzükezha[8] bu uko vupfülie, mu kikidi Jihova thie ketso rei uko peka vorshü shi;

⁵mu nie thechü hanu vorlie kemochie puoe rayha nu nieko gei kedipuo chüshü shikecü;

⁶mu Reuben nuou Eliab nuonie Dathan mu Abiram unie gei puoe kedipuo chüshü shikecü, kijüue puo me mekuoshü di Israel pete donunu uko mu uko kinuko, uko pfhekiko, mu uko medziketuo pete mezukelie;

⁷nie mhipie Jihova mhatho kezha chükeshüko pete nguwatakecü la.

⁸Süla nie-e kuolie di vo pevielietuoü kezhü kijüu nu lelieketuo la a thie nie ki diekhakeshüko zeliecie,

⁹Jihovae nie puonuoko mu uko yiemiako tsütuoü di rüsepie kezhü kijüu mithunudzü mu mepfhidzü krukezhü kijüu nu nie rheichalieketuo la.

¹⁰Nie-e vo pevielietuoükezhü kijüu we, nie parketa kijüu, nie tsia khashü rei nie ga teziekechü tuoi nie phi se dzü pie va bayakecü tuoi mo,

¹¹derei nie-e vo pevielietuoükezhü kijüue kijüthou mu razha kenyi kijü puo, mu teigei nu ketsur teirü dzü krieyakecü kijü puo;

¹²Jihova nie Kepenuopfüe mehoyakecü kijü puo, Jihova nie Kepenuopfü mhi thuo teicie therie nunu teicie thela ketso puo gei ba sei baya.

¹³Mu niekoe a dieze di a thie nieko bu nie melou pete mu nie ruopfü pete se Jihova nie Kepenuopfü khrie mu puo liechülienu di nie ki diekhakeshüko zelie ro,

¹⁴puoe kijü la puotei touki teirü khashütuo, teirü kerieu rei teirü kenuou rei, sidi nie bu nie lha, nie khubedzü kesa, mu nie tier rei pfhükengulietuo.

¹⁵Puoe nie kiri la rei nie kijü nu nha pelhoushütuo, mu nie-e cü di pevütuo.

¹⁶Nie nou seketsiwa di, nie bu rürei terhuo kekrei lie chü mu rüsuota molieketuo la menuoliecie;

¹⁷sita ro, Jihova nouyieu nie gei tu sietatuo di puoe teiko khawa di tei bu rü motatuo, sidi kijü puo si vüshü motatuo, sidi kijü kevi, Jihova se nie ketsüu nunu nie kaüjü mhatatuo.

¹⁸Süla nieko a die hako pie nie melou nu mu nie nou nu shülie; mu nie zasi puokecü la süu pie nie dzie gei khelie, mu süko nie teikhie dalie.

¹⁹Mu nie-e süko pie nie nuonuo pethatuo, nie ki nu keba kirei, chanu ketuo kirei, nie zhü tsukecü kirei, mu nie siekecü ki rei süko dze putuo.

²⁰Mu nie-e süko pie nie kikha coko mu careko gei thutuo,

²¹tei-e kijü mho kebachie, Jihovae rüse di nie puonuoko tsütuoükeshü kijüu nu nie kelhouzha mu nie nuonuoko kelhouzha bu kralieketuo la.

²²Kekreilamonyü nie-e a nie ki diekhakeshü pete menuo di chüüze di Jihova nie Kepenuopfü khrie, mu puo chako pete nu tuo, mu puo kupfütuolie ro,

²³siro Jihova nie mhodzünu seyie hako pete whuowatuo, mu nie-e seyie nieki zha mu kuokuokecüko vie lielietuo.

²⁴Nie phizhü pie zhokecü kijü pete nie vietatuo; nie rüvie-e rayha nunu Lebanon ketsotuo mu Kerüu, Eufrat rüu nunu kisietsa dzükezha tsotuo.

²⁵Miapuorei nie mhodzü thalie kenjü Jihova nie Kepenuopfü n keprei mu n ngu meriekecüu pie no kijü prakecü pete gei shütuo, puo nieko ki phrakeshü tuoi.

²⁶Harie, a thie theja puo mu rüse puo pie nie mhodzünu shüzhie.

²⁷Jihova nie Kepenuopfü diekhakeshüko ae thie se nie ki pukeshüko nie chüü zelie ro theja ngulietuo.

²⁸Derei nie Jihova nie Kepenuopfü diekhakeshüko ze mo di ae thie nie ki diekhakeshü chau nunu rüreita di nie-e siyakemo terhuo kekrei medzita ro, rüse pfütuo.

²⁹Mu Jihova nie Kepenuopfü nie ze, nie le pevielietuoükezhü kijüu nu vorshü ro, nie-e thejau pie Gerizim kijüthou gei shütuo mu rüseu pie Ebal kijüthou gei shütuo.

³⁰Sünie Jordan cie kepra chau kisietsa, niaki keletsa, Araba bayakecü Kananko kijü nu Gilgal mede nu, Moreh phriebo-u khieki ba.

³¹Jihova nie Kepenuopfü se nie ketsü kijüu pevielieketuo la leta ro, Jordan ciepra morosuo; mu nie-e süu pevielie di sünu lhoulie ro,

³²nie-e a thie thezhoko mu ahzako khapie nie mhodzünu keshüko chüü zelieketuo la menuo morosuo.