Read Angami Naga Pulakeshüzho 12 Bible Online

Pulakeshüzho 12 - Angami Naga bible

Pulakeshüzho 12

¹Jihova nie puonuoko Kepenuopfü nie bu kijü nu nie rhei chie nie vie chütuoü di khapie nie ketsü kijüu nu nie bu menuo di ze morokesuo thezho mu ahzako haha.

²Nie vo u kijü lielieketuo seyieko rüsuoyakecü rhuoko kebachü pete pekawalie, kijüthou kerükrie gei rei kerünuo nu rei, mu seibo kepejo pete khro rei;

³nie-e uko ruosuobako bierhuowatuo, di uko coko bietshewatuo, mu uko Asherako mi pie thewatuo, niekoe uko rhuo miarhiko bietshewatuo di thechü süu nunu uko zako bie pesuowatuo.

⁴Jihova nie Kepenuopfü ki we sükemhie chülie lho.

⁵Derei Jihova nie Kepenuopfü nie seyie donu puo za khapie baketuo la mu puo kebachü chüketuo la kedakelieu, nie-e süu pfhütuo di nie sünu vortuo;

⁶nie mha khakeshüu se sünu vortuo, mu nie sünu nie kethe ruosuoko, nie ruothoko, nie ker nu za puo khakeshüko mu nie dzie nunu mha khakeshü, mu nie phrakeshüko, mu nie noupra nu mha khakeshü, mu nie thukro nunu mu nie kuokro nunu nuorieko se vortuo.

⁷Sidi sünu niekoe Jihova nie Kepenuopfü mhodzünu nu mhacütuo, sidi nie-e nie dzie pie khakeshü peteko gei Jihova jashü nie ketsüko nu nie neituo, nie rei mu nie kinumia rei.

⁸Nie tsie tuoi mia puo puo thuo puo mhiki mezhükecüu chütatalie lho.

⁹Nie vor Jihova nie Kepenuopfü kayie pie nie ketsüu tsolie moluo eru.

¹⁰Derei nie Jordan ciepralie di Jihova nie Kepenuopfü nie bu wekelie kijüu nu balie, sidi puoe nie khie nie mhou keba ngumvümiako kinu kerülei pie nie tsüshü di nie bu kru di balie ro,

¹¹siro Jihova nie Kepenuopfü puo za bu sünu baketuo la thechü puo kedalietuo, a nie ki pukeshü pete pie sünu vortuo nie kethe ruosuoko, nie ruothoko nie za ker nu za puo khakeshüko mu nie dzie mha khakeshüko, mu nie Jihova ki phrakeshü la khakeshüko.

¹²Mu Jihova nie Kepenuopfü mhodzünu nie neituo, nie rei mu nie nuonuo thenu rei thepfu rei, mu Leviko nie nadi nu kebako, ukoe nie ze di uko ya morei uko kayie jükecü la.

¹³Nie thechü kengu khe nunu nie kethe ruosuo khashü moketuo la menuoliecie;

¹⁴nie seyie puo nunu Jihova kedashüketuo thechüu nunu kethe ruosuo khashütuo, mu a nie ki diekhakeshü pete chütuo.

¹⁵Derei Jihova nie Kepenuopfü japie nie ketsü ki ze, nie nadi kehoupuo nu rei merüta ro themuo bie di cülie vi; mesa kemoko rei kemesako rei thelou mu chüzhie tuoikecü rei cülie vi.

¹⁶Nie puo zie we cülie lho; nie dzü tuoi süu ru pie kijü shüwatuo.

¹⁷Ker za puo khakeshü nie lha morei nie khubedzü kesa, morei nie tier; morei nie thukro, morei nie kuokro nu nuorieko, morei nie phrashüwaketa kehoupuorei, morei nie noupra nu mha khakeshü morei nie dzie nunu khakeshü puorei nie ra nu cülie lho.

¹⁸Derei Jihova nie Kepenuopfü thechü kedashüketuou nu, nie rei nie nuo thenu rei thepfu rei, nie kituo thenu rei, thepfu rei, mu nie ra keba Levimia rei Jihova nie Kepenuopfü mhodzünu nu, süko cütuo, sidi nie mha kehoupuo kechü nu rei Jihova nie Kepenuopfü mhodzünu nie neituo.

¹⁹Nie nie kijü nu lhoukeba chie Leviko khawa moketuo le terlie.

²⁰Jihova nie Kepenuopfü nie ki pukeshü mhiei n rüvie chüpezhashü mu noe merüta di, a themuo cütuo, iro nie kehouki puorei themuo cü kenyü ki cülie vi.

²¹Jihova n Kepenuopfü puo za khapie keba la kedakelie thechüu n kinu peciethorta ro, a n ki diekhakeshü tuoi Jihova se n ketsü n thukro morei n kuokro nunu dukhrilie di n ra nu cü kenyü de cülie.

²²Thelou mu chüzhie chü kecü tuoi, süu cülie vi, mesa kemo-u rei mu kemesau rei kemhie di cülie vi.

²³Puo zieu cü moketuo la menuolie, thezie-e kerheiro zokecü la, mu nie-e kerheiro-u pie puochü sa cü suo.

²⁴No süu cülie lho, no süu dzü keru tuoi rupie kijü shüwatuo.

²⁵No süu cülie lho; no Jihova mhingu ki mha kemezhüu chü di no rei mu n sie n nuonuo rei bu vi volieketuo la.

²⁶Derei no mha kemesa khashüketuoko, mu noe khashütuoü di phrakeshüko we se Jihova thechü kedashü ketuou nu volie.

²⁷Sidi Jihova n Kepenuopfü ruosuoba gei n kethe ruosuou, puo chü mu puo zie khashülie; nie ruosuo zieu Jihova n Kepenuopfü ruosuoba gei shüwalie, derei puo chüu we cülie rei vi.

²⁸A n ki diekhakeshü hako pete ze menuolie, no Jihova n Kepenuopfü mhingu ki kemezhüu chü di, keviu bu kechachie n vie mu n sie n nuonuoko vielieketuo la.

²⁹Jihova n Kepenuopfüe no vo uko vie lielieketuo seyieko n mhodzünu nu dathewa, mu noe uko vie lielie di uko kijü nu balie ro,

³⁰n mhodzü uko pekawaketa sie n mapie uko medzita molieketuo la menuoliecie, mu uko rhuoko rüli ketso di sie, “Seyie hako kikidi uko rhuoko rüsuo shi! A rei uko mhielie ro vituo” ita suotuo zo.

³¹Jihova n Kepenuopfü gei sükemhie chü suo; uko we uko nuonuo thenu rei thepfu rei mi nu thepie uko rhuoko tsüya.

³²Chünu di a n ki diekhakeshü pete no menuo di chülie morosuo; no süu pe rei suo, süu nunu se reita suo.