Read Angami Naga Pulakeshüzho 13 Bible Online

Pulakeshüzho 13 - Angami Naga bible

Pulakeshüzho 13

¹Mhanuü nieko donu siedzekesimia morei puo mho kesimia sier di zasi morei ungomhatho dze pushü,

²mu zasi morei ungomhatho puoe nie ki pukeshüu chü vorta, di puoe sie nie siya kemo pu di, “Úko terhuo kekrei sie vota khe, di úko süko liechüta khe” ilie ro,

³nie siedzekesi süu morei puo mho kesi süu die rünyüta suo, Jihova n Kepenuopfü n dojükeba zo, nie-e nie melou pete se mu nie ruopfü pete se Jihova nie Kepenuopfü khrie ba zo mo mo shikecü sishüketuo la zo.

⁴Nie Jihova nie Kepenuopfü siemedzituo mu puo preituo, mu puo diekhakeshüko zetuo, mu puo pfhe rünyütuo, mu nie puo lie chütuo mu puo kupfütuotuo.

⁵Derei siedzekesi süu morei puo mho kesi süu we dukhriwatuo, puoe Ijipt kijü nunu nie zeparkelieu mu kedie kechü kiu nunu nie rhakelieu Jihova nie Kepenuopfü, nie bu zetuolienu di diekhakeshü chau khawanu di Jihova nie Kepenuopfü perhie petsoukecü letakecü la. Sidi nie-e nie donunu mha kesuou bie pejüwatuo.

⁶N siezedzürie, n zuo nuou, morei n nuou, morei n nuopfü, morei n ze kelhoupfü n kimia, morei n khrietho khriechümia pekhre n ketsei di, “Úko terhuo kekrei rüsuota khe” ilie, süko no rei mu n puonuoko rei siya kemo rhuo,

⁷süko n khie n mhou keba themiako rhuo, kijü kela puo tsanu kekreitsa ketso shierei,

⁸noe puo die nu leta suo morei puo pfhe rünyüta suo, morei n mhi nu, puo ngumezhie suo, morei puo khashü suo, morei puo kevie suo;

⁹derei no puo dukhriwa morosuo, puo dukhrikecü nu n dzie bu kerie chütuo, süsienu themia peteko dzietuo.

¹⁰No ketsie pie puo vakhrituo, puoe Jihova n Kepenuopfü Ijipt kijü nunu, kediekechü kiu nunu n zeparkelieu kinu n khu kediwakecü lecü la.

¹¹Mu Israel pete bu süu situo, di michielietuo, mu sidi nieko donu kerüzhü hakemhie chü lalie lho.

¹²Jihova n Kepenuopfü n bu lhouketuo la rüna pie n ketsüko puo nu,

¹³themia kesuo kropuo nie donu par di rüna nu themiako meshü di sie “Úko vo di terhuo kekrei nie siya kemo liechüta khe” siliro,

¹⁴noe süu ketso mu pfhü menuo morosuo mu harie, mha kerütse sikecü nie donu chütuota ketho ro,

¹⁵nie-e zhiecha pie rüna nunu themiako bie di, sünu lhoukeba pete u kiriko sa zhiecha pie peka tseiwatuo.

¹⁶Nie sünu mhavako pete kengu se vor nadiu phetsuo nu shüwa di nadiu mu puo mhavako pete mi pie thewatuo, thepie Jihova nie Kepenuopfü ki keshü mhie di thewatuo, süu kechachie nyopfhükhou puo kemhietatuo, süu pesie lalie lho.

¹⁷Rüsekepfü vie puo bu rei nie dzie kulie lho; Jihova puo nouyie kereu nunu rürei lalie di noushünouzhie pie nie pengu lashü, mu nie ngumezhieshütuo, mu puoe nie puonuoko ki rüsekeshü tuoi nie chü pekruoshütuo.

¹⁸Nie Jihova nie Kepenuopfü pfhe zelie, a thie nie ki pukeshü, puo diekhakeshüko chüüzelie mu Jihova n Kepenuopfü mhingu ki mezhükecüu chülie ro.