Read Angami Naga Pulakeshüzho 15 Bible Online

Pulakeshüzho 15 - Angami Naga bible

Pulakeshüzho 15

¹Cie thenie metsei nie-e thepu vapieketsükecü chütuo.

²Mu vapieketsükecü hamhietuo: Mia thepukeshüue pie puo zanuou thepukeshüu vawatuo; puo zanuou ki süu chalie lho. Jihovae vapietsüketuou pushüwaketa la.

³Chazoumia zowe no süu chalie vi; derei n kromia ki we n pupfükezhü kehoupuorei vashüwa morosuo.

⁴Derei nie donu kejümia puorei tuolie lho Jihova n Kepenuopfü n bu welietuoü di khashü n ketsü kijü nu Ukepenuopfü bu japie n tsüketuo la.

⁵No Jihova n Kepenuopfü pfhe rünyü mu a thie n ki diekhakeshüko pete menuo di zelie ro,

⁶Jihova n Kepenuopfü n ki phrakeshü tuoi, japie n tsüshütuo, mu noe n vie pie seyie kekra thepulietuo, derei no mia kinu thepulie lho, mu no seyie kekra mho dituo, mu uko nie mho dilie lho.

⁷Jihova n Kepenuopfü se n ketsü kijüu nu keba n rüna nu nie donu n kromia mhakejü puo ba ro, no mhakejüu gei n nou re morei meteitota suo,

⁸derei no puo gei mephruoshülie morosuo, di tsa rei kra rei puo se morokesuo de pie puo thepushü morosuo.

⁹Zhosuo nou se di, “Cie thenieu, vapie ketsükecü teicieu penuote” idi ngunyükemo mhi pie n siezeu meho, di no mhapuorei pie puo tsü mota, di puo bu n petsou di Jihova ki kenyashü ro, süu n la kephouma puo taketuo la menuoliecie.

¹⁰Mephruomevuo mu panya mo zo di hau chülie, silieliro, Jihova n Kepenuopfü n mhatho pete nu mu no chükesie pete nu japie n tsü zotuokecü la.

¹¹Kijü nu sü kejümia jü kekralie lho zokecü la, süla a n ki diekhashüzhie, no n kijü nu, ketsopfhüu la mu mhakejüu la n dzie ketheta suo.

¹²N kro-u nu Ibrimia thenu rei thepfu rei zepie[10] n ki shü ro, puoe cie sorou n theketuo, di cie thenie cie no puo khashüwa di puo bu n ki nunu tuotatuo.

¹³Mu no n kinu kedieu khakeshü ki, no puo bu dziethuo di tuolie lho.

¹⁴No n kuokro nunu, n shie nunu, mu n khubedzü kethe chüu nunu puo phruo kemephruoshütuo; Jihova n Kepenuopfü japie n ketsü tuoi, no mha pie puo tsü morosuo.

¹⁵No Ijipt kijü nu kediemia zo, di Jihova n Kepenuopfü n rhalieükecü rükralie morosuo, süla ae thie n ki, die hau khashüzhie.

¹⁶Derei puo no mu n kinumiako khrie mu n gei puo tou, di sie n ki “A n ki nunu tuotalie lho” ita ro,

¹⁷noe mha kemethe puo selie di pie puo nyie gepie le kikha zetuo, sidi puoe kechachie n die[11] chütatuo. Mu n die[12] thenupfü gei rei sükemhie chütuo.

¹⁸No puo bu n ki nunu rüü di tuo pratakecü n la mha kere puo ükecü leta suo; puoe zhakramia zha de kenie cie sorou nu thekewaketa la; mu silie ro Jihova n Kepenuopfü no mhakechü pete nu japie n tsütuo.

¹⁹N thukro nunu mu n kuokro nunu puochü penuo kerietho-u noe kha kemesapie Jihova n Kepenuopfü tsü morosuo; noe n thukro nu penuolie kerieu ze mhachülie lho, no n kuokro nu penuolie kerieu mie belie lho.

²⁰Noe teicie kepra Jihova n Kepenuopfü mhodzünu n kiünuomia ze di Jihova kedashüketuo thechüu nunu süu cütuo.

²¹Derei süue mesa kemo puo phi rüyho, puo mhicie, morei kesuo kehoupuo rei puo ku ro, nuo süu pie Jihova n Kepenuopfü ki ruosuo chülie lho.

²²No n rüna nunu süu cülie morosuo; thelou morei chüzhie kecü tuoi mesa kemo-u rei kemesau rei kemhie di, süu cülie vi.

²³No puo zieu cülie lho, no dzütuoi süu rupie kijü shüwatuo.