Read Angami Naga Pulakeshüzho 16 Bible Online

Pulakeshüzho 16 - Angami Naga bible

Pulakeshüzho 16

¹Jihova n Kepenuopfü ketsü la Abib-u khrü[13] ciekevonyiu nyilie, Abib-u khrü Jihova n Kepenuopfü pezei ze Ijipt nunu n ze parkelie la.

²Mu Jihova puo za bu baketuo la, thechü kedashüketuo-u nunu noe n kuokro morei thukro nunu ciekevo ruosuo-u khashü Jihova n Kepenuopfü tsütuo.

³Noe süu pie khreiü sakecü vie puorei sa cülie lho, zha thenie noe khrei sakemo niekhrüda, kemezhiekecü niekhrüda cütuo; kekreilamonyü noe kenouse se di Ijipt nunu parlie, süla n kerheichie noe Ijipt kijü nunu parkelie rükratuo.

⁴N rüvie pete nu no zha thenie khrei selie lho, mu zha thenie nhie thevatie ruotho la biekecü themuo puorei bu ba khise tsolie lho.

⁵Jihova n Kepenuopfü se n ketsü rünako puo nunu rei ciekevo kuonuou cülie kenjü;

⁶derei Jihova n Kepenuopfü puo za bu batuoü di kedakelie thechüu nu, no süu nu thevatie niaki kele mese ki, no Ijipt nunu parkelie mese ki ciekevo ruosuo khashütuo.

⁷Mu no süu chalie di Jihovae kedakeshü thechüu nunu cülietuo, sidi süsie duü n pfheki nu la votatuo.

⁸No zha sorou khreiüshü kemo niekhrüda cütuo, mu zha thenie nhie Jihova n Kepenuopfü la kehou kezha puo batuo; sünhie no mhapuorei chülie lho.

⁹No zhadoudo thenie phrülie; zhiepfhinuo pie lie re sedekecü nhie nu phrü sedelie.

¹⁰Süsie Jihova n Kepenuopfü japie n ketsü tuoi, n nei di khakeshü pie zhadoudo nyiu nyipie Jihova n Kepenuopfü rüsuotuo;

¹¹Jihova n Kepenuopfü puo za khapie batuoü di thechü kedakelieu nu n nuonuoko mu n nuopfüko, n kituoko mu kituopfüko, n rünako nu keba Leviu mu n zekeba rüsoko, merünuoko mu samipfüko ze di Jihova n Kepenuopfü mhodzünu n nei batuo.

¹²No Ijipt nu mia die zoücü rükra morosuo mu thezho hako menuo di zelie.

¹³No shie nunu telha pfhü kengulie mu nie khubedzü kethe chü nunu khubedzü pfhü kengulieketa sie, no zha thenie prunyiu[14] nyituo.

¹⁴No n nyiu nu n nuonuoko mu n nuopfüko, n kituoko mu n kituopfüko, Levimiako, chazoumia, merünuoko mu samipfüko n rüna nu kebako ze di n nei batuo.

¹⁵Jihova n Kepenuopfü kedashüketuo thechüu nu no zha thenie thenyiu nyituo; Jihova n Kepenuopfü n dziecie pete nu, n mhatho pete nu jashü n tsütuo, sidi no n nei lhemo batuo.

¹⁶Nie donu thepfuko cie puo nu va se Jihova n Kepenuopfü kedashüketuo thechüu nu puo mhodzünu vortuo: khreiüshükemo niekhrüda nyi ki; ukoe dziethuo di Jihova mhodzünu vorlie lho.

¹⁷Jihova n Kepenuopfü theja pie n tsükeshü tuoi themia kehoupuorei puo thuo khashülie kevi de khashütuo.

¹⁸Jihova n Kepenuopfü se n ketsü rüna pete nu seyieko nu thecathepi kechümia mu krütamia kedalie, di süko bu kemezhü nunu themiako capi chütuo.

¹⁹No kemezhüu bie kewhiwalie lho, mu no tietsa puorei noulieta suo, mu no theso lie suo, thesoe mhakesiu mhi rei bie peciewaya, mu kemezhü die biepesuowayacü la.

²⁰Jihova n Kepenuopfü pie nie ketsü kijüu nu lhoulie mu welieketuo la kethocau rübei medzilie.

²¹Noe Jihova n Kepenuopfü ruosuoba khieki nanyü sei[15] üdi seibo puorei leilie lho.

²²Morei Jihova n Kepenuopfü rütseyakecü tsiepou puorei se suo.