Read Angami Naga Pulakeshüzho 17 Bible Online

Pulakeshüzho 17 - Angami Naga bible

Pulakeshüzho 17

¹Thudo morei tekuo shierei kesuo puo gei keba kehoupuorei se ruosuo chüpie Jihova n Kepenuopfü ki shü suo; süue Jihova n Kepenuopfü la kerütse zocü la.

²Nieko donu Jihova n Kepenuopfü se nie ketsü rüna kehoupuo nu rei nie donu thepfumia shierei thenumia shierei dietseidiekho-u varhuo di Jihova nie Kepenuopfü mhingu ki mhakesuo chü,

³mu a chü hienu keshüu chü di terhuo kekrei liechü morei niaki morei khrü morei teigei ketuo kro nu kehoupuorei rüsuota,

⁴mu süu se n ki pushüta di no silie ro, noe pecü menuo di süu dze ketsotuo, sidi Israel donu nu mha kerütse sikecü chü bata ketho üro;

⁵noe mha kesuo sikecü chüwaketa thepfuu rei thenupfü rei, ze nie kharu nu pratuo, sidi nie-e ketsie pie thepfu süu morei thenu süpfü vakhriwatuo.

⁶Mia kenie kese zhapuu die nunu siaketuou bu siatuo; mia puo rübei zhapu die nunu mia puo bu rei sialie lho.

⁷Zhapumia bu pesiawatuoü kebau gei u dzie kha rieshütuo: sidi nie donu nu kesuou biepejüwatuo.

⁸Kedukhrikecü nyie mu thenyie kekrei, kevikechü nyie morei nie rüna nu kebvükeboukecü dienya kehoupuorei nie la rethorkecü huo sier ro, nie sie di Jihova nie Kepenuopfü keda shüketuo thechüu nu volietuo.

⁹Mu süki Levimia zievoko mu capikechüu ki vo di uko rüsatuo, sidi ukoe pepikelieu se nie ki pushütuo.

¹⁰Sitse nie-e Jihova kedashüketuo thechüu nunu uko capi pukeshüu medzi di chülie morosuo; mu nie-e uko pukeshüu medziketuo la menuolie morosuo.

¹¹Uko mha pu nie kiekeshüu, uko capiu nu nie pesikeshü tuoi nie-e mhachülie morosuo, uko nie ki pukeshüu nunu nie rürei thezatsa morei thevitsa vata suo.

¹²Jihova nie Kepenuopfü mhodzünu thayakezha zievo-u morei capiu rünyü mo di puo thuo puo medo chükecüu bu siatuo, sidi nie Israel nunu mha kesuou pejüwatuo.

¹³Mu themia peteko bu süu sishü di michielie di u thuo u medo chü motatuo.

¹⁴Noe Jihova n Kepenuopfü se n ketsü kijü nu vorlie, di süu pevielie, mu sünu lhoulie tse sie, “A rei seyie kekrei a khieki kebako tuoi kedi puo pie a mho batuo” ilie ro,

¹⁵noe n mho diketuo la Jihova n Kepenuopfü kedakeshüu bu batuo, nie thuo nie donu nu mia puo khapie nie mho kedi chütuo; nie thuo nie themia kemo chazoumia pie nie mho balie lho.

¹⁶Puo thuo puo la gura peri pekrata suo, morei gura peri pekraketuo la themiako bu Ijipt nu la vo suo, Jihovae n ki, “No sütsa la vo suotuo” isishü eru.

¹⁷Morei puoe thenu kekra lie di puo nou ketseikewa chüta suo; morei puo thuo puo la suna kekra penyi suo.

¹⁸Mu puoe puo kediba gei bakelie ki, Levimia zievoko mhodzünu nu puo la thupie ketuo thezho leshüda puo selietuo.

¹⁹Sidi puo süu se tuotuo, di puo rheichie süu phrütuo, puoe thezho hau dieko mu thezho hako pete chü mu ze di Jihova puo Kepenuopfü keprei do silieketuo la;

²⁰puo nou pie puo siezedzürieko mho tuota molieketuo la, mu diekhakeshüu nunu rürei se thevitsa morei thezatsa vata molieketuo la, sidi puo rei mu puo nuosenuoyie rei Israel kedirüvieu nu di chalieketuo la.