Read Angami Naga Pulakeshüzho 18 Bible Online

Pulakeshüzho 18 - Angami Naga bible

Pulakeshüzho 18

¹Levimia zievoko mu Levi seyie pete Israel donu uko kayie uko ya jütuo. Ukoe Jihova ki ruosuo khakeshü puo yau cütuo.

²Uko mechü donu kayie uko ya jütuo, Jihova sü uko kayie zo, puoe uko ki pukeshü tuoi.

³Siro ruosuo khakeshü themiako kitsa nu zievo-u ya thokeshü hautuo, thudo rei tekuo rei puo boukau mu puo meco nie mu puo vadi pie zievo-u tsütuo.

⁴Nie lha si vü kerieu, nie khubedzü kerieu, mu nie tier chülie kerieu, nie kuo mie bielie kerieu khapie zievo-u tsütuo.

⁵Jihova za nu tha di lietho chüketuo la, Jihova nie Kepenuopfüe nie seyie peteko donu nu kechachie puo mu puo nuo thepfuko kedalieketa la.

⁶Mu Levimia Israel pete nu nie rüna kehoupuo nunu rei vor di Jihova kedashüketuo thechüu nu vor, (mu puoe vor nyü ro, vorlie vi,)

⁷puoe puo kromia Leviko Jihova mhodzünu tha di lietho chüyakezha tuoi Jihova puo Kepenuopfü za nunu lietho chülie vi.

⁸Puo kikru mhazenu puo ya ngulie zo ürei puorei mia ze zatou cütuo.

⁹Noe Jihova n Kepenuopfü se n ketsü kijüu nu vorliecü ki, noe seyie süko kerütse mhatho chüyakecüko chüta suo.

¹⁰Nie donu u nuonuo thenumia rei thepfumia rei the pie ruosuo chükecümia, thuophiyakecümia morei themouyakecümia, morei thuo leyakezhamia kemeduomia,

¹¹morei theguokesemia, morei themoupfhi nu diekepumia, morei kemeduo kekuo se mhachüya kezhamia, morei kesiamia rüchüyakezhamia puorei bu tuo suo.

¹²Kekreilamonyü hako chüyakecü pete Jihova mhodzünu kerütse zocü la, mu kerütse mhatho hako la Jihova nie Kepenuopfü nie mhodzü kinu uko whuoshüzhie.

¹³No Jihova n Kepenuopfü mhodzünu vilotsolie morosuo.

¹⁴Seyie hako no uko kijü lielieketuoko we themou dieko mu thuophimiako die rünyüya derei no we Jihova n Kepenuopfü n bu sikecü kha.

¹⁵Jihova nie Kepenuopfü nieko donunu a tuoikecü siedzekesi puo[16] pesieshütuo, niekoe siedzekesiu[17] die rünyü morosuo.

¹⁶Horeb nu mechü kehou nhie noe sie, “A bu Jihova a Kepenuopfü pfhe si la hiecie, morei mi kezha hau ngu la hietacie, a siata rei si momu!” idi Jihova n Kepenuopfü ki cha.

¹⁷Ru Jihova a ki, “Ukoe pukeshüko pukezhü phre zo.

¹⁸Ae uko donu nu, siedzekesi[18] n tuoicü puo pesieshü uko tsütuo, di a dieko pie puotie nu shütuo; sidi puoe a diekhakeshüko pete pie uko ki putuo.

¹⁹Mu kehoupuorei puo a zanu diekepuko sanyü moro, a thuo süu ketsotuo.

²⁰Derei a punukeshüu kemo a za nunu diepukecü siedzekesiu, morei terhuo kekrei za nunu diepukecü siedzekesiu bu we sia zotuo” si.

²¹Mu nie thuo nie rüchü di, “Thie Jihova diepukeshüu mote, ikecü kikidi silieta?” iba ro.

²²Siedzekesi puoe Jihova za nunu diepushü di pukeshüu chü vor ro, morei ketho mota ro, süu Jihova pushü kemo dieute; siedzekesiue puo medo nu diepu tuote, nie puo prei morei vi.