Read Angami Naga Pulakeshüzho 19 Bible Online

Pulakeshüzho 19 - Angami Naga bible

Pulakeshüzho 19

¹Jihova nie Kepenuopfü khapie nie tsüshü zhükecü kijüko se keba seyieko biewa, mu noe uko vieko bie pejüwa, mu uko rünako pebalieta tse,

²noe Jihova n Kepenuopfü n bu n vie chüketuo la se n ketsü kijüu metsuo nu n thuo n la rüna kha kreipie balie morosuo.

³Mia dukhrikewamia bu ta volieketuo la, Jihova n Kepenuopfüe n vie chüketuo la n tsüketuo kijüu mejü[19] di kezapie za se chülie.

⁴Siro mia dukhrikewamia themouchü di ta sünu voketuomia la thezho ha mhietuo. Süue puo kenyüchü di mo mu puo zanuou gei kelhietuo üdi pedzü lekemomia puo ngumvü chütuo kemo puo dukhrikewau,

⁵mhanuü mia puo puo zanuou ze sei wituoü tsu, di seidurü pie seibo-u wituoü kesie ki, seidurüu puoto geinu rüzu par puo zanuou vawa di puo siata ro, puoe nadi seko puo nu ta vo di puo kelalie vi.

⁶Simoliro thezie khepu kepfhüu puo nouyiepfü lekeba ki mia biekhrikewau whuo vo mu petseta ro puo tsolie di puo dukhriwalie vi; mia biekhrikewau pedzü le di kelhie geinu puo zanuou dukhri zowa kemo la, sidi sia zhü mo.

⁷Süla a n ki diekhashüzhie, no nadi se kha kreipie balie morosuo.

⁸Mu Jihova n Kepenuopfü n puonuoko ki rüse di pukeshü tuoi n rüvie chüpezha sashü di pie nie tsüshütuo üro,

⁹nie-e thie n ki diekhakeshüko pete chüüzelie di Jihova n Kepenuopfü khrielie mu puo chako nu tuo seilie, mu puo n puonuoko tsütuoü di pukeshüko pete pie n tsüshü ro nie nadi kekrei se chü sapie hako salietuo,

¹⁰Jihova n Kepenuopfü n kayie chünu di se n ketsü kijüu nu jokemo-u zie pekrushü molieketuo la, mu thezie phoumau bu nie geipfü molieketuo la.

¹¹Derei mia puo puo zanuou ngumecü, di puo laba di puo biewa, mu süu pfü siata ro, mu mia dukhrikewau ta nadi hako puo nu volie tse;

¹²rüna sünu phichüko thuo mia ketseshü di puo ze uko ki vorlietuo, sidi puo bu siataketuo la puo khapie thezie khepu kepfhüu dzie nu shüwatuo.

¹³No puo ngumezhieshü suo, jokemomia zie pekrukewa kephoumau nunu no Israel chü kemesalie ro n dze vikuotuo.

¹⁴Jihova n Kepenuopfü n bu n vie chünu di khapie n ketsü kijüu nu n zanuou kijü therie tsie, keriekimia tsieseko bie kediwa suo.

¹⁵Mia puo kejo chüwa morei kephouma tho chükewa ki zhapu puo rübei we tso mo, zhapu kenie kese tie nunu kejo thotuo.

¹⁶Mia puoe mia puo ngukemvü la puo üse kejo mhatho chü üdi ketijü zhapu chü ro,

¹⁷kenyakeba kenienie Jihova mhodzü, mu süteiki zievomia mu capimia chükebako mhodzünu thalietuo.

¹⁸Capikoe menuo di ketsotuo, mu zhapuue tijü, mu tijü di puo siezeu keda ro,

¹⁹puoe puo siezeu gei chükeshü le kesieu pie nie puo gei chüshütuo; sidi nie-e nie donunu mha kesuou khawatuo.

²⁰Mu kekreiko bu si di michielietuo, sidi hasie nie donu mha kesuo sü kemhie chü motatuo.

²¹Ngukemezhie balie lho, phou puo sou phou puo, mhi puo sou mhi puo, hu puo sou hu puo, thedzie sou thedzie, thephi sou thephi ituo.