Read Angami Naga Pulakeshüzho 2 Bible Online

Pulakeshüzho 2 - Angami Naga bible

Pulakeshüzho 2

¹Sitse Jihova a ki kepu tuoi, hieko rüreilie di tuo se Kemerie Dzükezha[2] kevatsa nhatsa nu vo; zha kekra niekoe Seir kijüthou whi.

²Sitse Jihovae a ki,

³“Niekoe kijükhru rüna hau nu rühoutuo cha perete, rürei se pesotsa valie.

⁴Di themiako ki diekhashülie: Nieko seyiemia Esau nuomia kijü pfüthe votuo, ukoe Seir nu ba; mu ukoe nie preituo, süla nie kireiliecie;

⁵uko neikemo chü hie; ae uko kijü puorei pie nieko tsülie lho zo, mu phizho puorei pie nie tsülie lho, ae Seir kijüthou khapie Esau bu puo vie chünu di puo tsüwaketa la.

⁶Niekoe raka se uko kinu kecüca khrütuo; mu nie kekrie la raka se uko kinu dzü khrütuo.

⁷Jihova nie Kepenuopfü nie dzie mhatho pete nu japie nie tsü; puoe nie rayha kezha hau pfüthe kevo ki, cie hiediako nu Jihova nie Kepenuopfüe nie ze tuo; nie mhapuorei tsopfhüta mo,” sishü.

⁸Sidi hiekoe Araba chau, mu Elath tsiu Ezion-geber khawa di u yiemia Seir nu keba Esau nuonuoko pfüthe vo. Hiekoe Moab rayhachü chau ze vo tse,

⁹Jihova a ki: “Moab keyhu hie morei uko ze terhüchü hie, ae uko kijü puorei khapie nie bu nie vie chülie lho, ae Lot nuonuoko bu se uko vie chüketuo la Ar khapie uko tsüwaketa la” sishü.

¹⁰(Thiedzü themia kezhakecha kekra Emimko sünu lhou,

¹¹ukoe Anakmia tuoi Refamia üya, derei Moabmia we uko üse Emimmia üya.

¹²Hormia rei thiedzü Seir nu lhou derei Esau nuonuoko uko kijü lielie di uko pekawa mu uko chü nu bata; Israelkoe Jihova se uko ketsü kijüu nu chükeshü tuoi).

¹³Süla “Tsie sielie di Zered rü cie pralie,” sishü. Süla hiekoe Zered Rü cie pralie.

¹⁴Mu hieko Kadesh-barnia nunu tuoshü di Zered Rü ciekelie ketso, Jihova rüse di pukeshü tuoi terhümiaviko phou-u pete razhüchü nunu kaüjüketa ketso, cie serethethata.

¹⁵Sidi razhüchü nunu uko phewawa di uko pejüwa kemochie Jihova dzieu uko petsouta.

¹⁶Sidi terhümiavimia ketuo pete sia mu kaüjüta tse,

¹⁷Jihova a ki,

¹⁸“Nieko thie Ar nunu Moab kijürie pfüthe votuo,

¹⁹derei nie Ammon nuonuoko penuo vo zorei uko keyhu morei uko ze terhüchü hie, ae Ammon nuomia kijü puorei pie nieko tsü di nieko bu nie vie chülie lho, ae süu khapie Lot nuomia tsüwaketa la, uko bu uko vie chütuoü di.

²⁰(Süu üse Refamia kijü üsiya thiedzü Refamia sünu lhou, derei Ammonko süko üse Zamzummia üya,

²¹themia sükoe kuo mu kra, mu Anakmia tuoi u da rükrie, derei Jihova uko pekawa di ukoe süko vie lielie, di uko chünu lhouta.

²²Seir gei lhoukeba Esau nuomia la puoe Horko pekawa di uko vie lielie di tsie ketso rei uko bu uko chünu bata.

²³Siro Gaza ketso natse nu lhouketuo Avimiako uko we Kaftor nunu kevor Kaftorko uko pekawa di uko chü nu bata.

²⁴Sielie di tuoshülie, di Arnon Rüu ciepralie, harie, Amormia Heshbon kediu Sihon mu puo kijü khapie n dzienu shüwate, süu lie zolie. Mu terhü chü di puo ze kesulie.)

²⁵Ae thie teiso mia bu nie prei mu nie ngu merielieketuo khapie teikhro kebako gei shütuo, mia nieko dze sishü ro petatuo, di nieko la meyhumezhietuo.”

²⁶Siro ae Kedemot rayha nunu dieliemia bu vitho dieko se Heshbon kediu Sihon ki shü di sie:

²⁷“A bu n kijü pfüthe vocümu; a chadiu zekecü zotuo, a rürei se thezatsa morei thevitsa pralie lho.

²⁸A bu cüketuo la kecüca ze pie a tsücie, mu a bu krieketuo la dzü ze pie a tsücie, a bu a phi pie tuo praliecümu;

²⁹Seir nu keba Esau nuomia mu Ar nu keba Moabko rei cha khapie a ketsü tuoi, a bu Jordan cie se Jihova hie Kepenuopfü se hie ketsü kijü nu pralie kemochie” sishü.

³⁰Derei Heshbon kediu Sihon-e uko bu puo kijü pfüthe vo mvüta; Jihova nie Kepenuopfü thie ha tuoi, puo pie nie dzienu shüwakecü le di puo nou chü perewa mu puo melou chü pekhrükewake la.

³¹Mu Jihovae a ki, “Harie, a Sihon mu puo kijü pie n tsüshüzhie, puo kijü pebalieketuo la pevie sedeliecie” sishü.

³²Sitse Sihon uko ze Jahaz nu terhü chütuoü di puo themia pete ze par.

³³Mu Jihovae úko Kepenuopfü puo pie u tsüshü; sidi uko puo mu puo nuonuoko mu puo themia peteko penyüwa.

³⁴Mu süu va úko puo nadiko pete penyülie, di nadi pete, thepfu rei thenu rei mu nhicunuomia rei pekawa, puo rei lhieshü mota.

³⁵We periko mu nadi penyükelieko mu mha vakelieko rübei pie u thuo u vie chü.

³⁶Arnon Rüu khieki keba Aroer nunu, mu razha nu keba nadiu nunu Galid ketso u la nadi kuothorkecü puorei tuo mo; Jihova úko Kepenuopfü pete pie u tsüshü.

³⁷Nie Amon nuomia kijü rübei penuo vo mo, sünu Jabok rü khie pete, mu kijüthou nadiko pete, mu Jihova úko Kepenuopfü u bu vonukeshü mhie di.