Read Angami Naga Pulakeshüzho 20 Bible Online

Pulakeshüzho 20 - Angami Naga bible

Pulakeshüzho 20

¹No n ngumvümia ze terhü chütuoü pra di, gura mu gari mu rüpfhünuo n rüpfhünuo ki krakuokecü puo ngu ro, uko preita hiecie, Jihova n Kepenuopfü Ijipt kijü nunu n zeparkeshüu n zetuo zokecü la.

²Mu nie terhü nu pratuo ro, süki zievo-ue themiako penuo vo rüpfhünuoko rüchütuo,

³sidi sie uko ki “Rünyüliecie, harie Israel, nieko thie nie ngumvümia ze terhü chütuoü di patazhie, nie melou thachüta hie; mia prei hie, mu michie hie, morei uko le kemideta hie,

⁴Jihova nie Kepenuopfü nie ze vo nie la nie ngumvüko ze kegei di nie bu kuoliekezhau chütuocü la” si.

⁵Siro kezhakoe chüpahiko ki, “Ki kesa puo chülieta di süu seüde mhatho chüliekemo themia huo baya me? Puo bu puo ki nu la volie, puo terhü nu siata di kekreimia puo bu süu seüde mhatho chüta rei si mo eru.

⁶Siro khubelie puo cieshü di puosi cü moluokecü themia huo ba me? Puo bu rei puo kinu la volie, puo terhü nu siata di kekreimia puo bu puo sounu cüta rei si mo eru.

⁷Siro thenu vakhapie ba di lie moluokecü themia ba me? Puo bu puo kinu la volie, puo terhü nu siata di kekreimia puo bu süpfü lielie rei si mokecü la” si.

⁸Siro kezhakoe chüpahiko ki die hako pu sa di, “Supuonie mia prei mu puo melou thachü ba ga? Puo bu puo kinu la votalie, puo zeko melou bie kethachüwalie vikecü la” si.

⁹Kezhakoe chüpahiko ki diepu tseiwa tse ukoe uko mho krüta kedalietuo.

¹⁰Nie nadi puo perhietuoü di süu penuo volie ro, kezekevi die pie sünu kebako ki pucie.

¹¹Mu ukoe kezekevi dieu lielietuoüta di kharu khrüshü n tsü ro, sünu keba themiako pete kemvü chü pie nie lie chütuo, sidi uko nie theketuo.

¹²Derei süko nie ze vitho chü mvü di nie ze kegeituo üro, nie süu retuo;

¹³sidi Jihova nie Kepenuopfü süu khapie nie dzienu shüwa ro, nie zhiecha pie thepfumia sünu keba pete dukhriwatuo.

¹⁴Derei thenuko, kecünuoko, kiriko mu nadiu nu keba mha pete, mu terhü mhava pete nie liepie nie vie chülietuo, sidi nie ngumvümia vie vakelieko, Jihova nie Kepenuopfü se nie ketsüko nie thuo nie la setuo.

¹⁵Seyie nadi hako zokemo, nie ze kepecie keba nadi peteko gei hakemhie chütuo.

¹⁶Derei Jihova nie Kepenuopfü nie bu nie kayie chütuoü di se nie ketsü seyie süko nadiko nu we nie u keha kenyi puorei perheishülie lho:

¹⁷No süko peka lotsowalie, Hitko, Amorko, Kananko, Perizko, Hivko, Jebusko, Jihova nie Kepenuopfü nie ki diekhakeshü tuoi:

¹⁸Simoüro uko bu uko rhuoko la nanyü chüyakecü kerütse thoko pete pie nie pethawa di, nie bu Jihova nie Kepenuopfü gei kephouma thochütalie vi.

¹⁹Noe nadi puo lielietuoü di süu re pecha phi rei, no seidurü pie seibo kebako pekawalie lho, no süko si cülie vikecü la. No süko wiwa suo. Seibo süko themia üdi no puo re ba me?

²⁰No sikeba nhasibo kemo seiboko rübei no wi pie cahou chü di no puo rekeba nadiu bielie kemochie houlieketuo la.