Read Angami Naga Pulakeshüzho 21 Bible Online

Pulakeshüzho 21 - Angami Naga bible

Pulakeshüzho 21

¹Jihova n Kepenuopfü n bu pevielietuoü di se n ketsü kijü nu, mia puo mia bu puo dukhripie zhü di ngulie, mu puo dukhrikewau si mota ro,

²nie phichüko mu capimiako par di dukhrikewau houpfükeba nadiko kidepuo kepecie nu ba shikecü mejütuo.

³Sidi dukhripie kezhüu penuothokecü nadiu nu phichüko bu thuünuo puo ze mhachü mo zoluokecü, liecie vocieu pie puo gei shü mo zoluokecü puo selietuo;

⁴sidi nadi sünu phichükoe thuü nuoyo ze dzü krukezhü razha, kijüu cie mo mu tsia khashü mokecü puo nu tsurlietuo, sidi razha süu nunu thuünuoyo vo zawatuo.

⁵Mu Levimia zievokoe sünu penuo vortuo, Jihova n Kepenuopfüe puo chalie chüketuo la mu Jihova za nunu jashüketuo la uko kedaliete, siro uko ketho nunu dienya kehoupuorei mu keboukecü pete caketuo la uko kedaliete.

⁶Mu dukhriwaketau penuothokecü nadiu nu phichüko pete razhau nu thuünuo puo vo zakewayo mho geinu uko dzie meteituo;

⁷sidi ukoe putuo: “Hieko dzie pie thezie hau pekrushü mo, mu hie mhi rei pie süsü kechü ngu mo.

⁸Harie Jihova, n themia Israelko no uko rhalieketako phou kemesa ruosuo lielie, mu kejo chükemo zie pekrukeshüu la kejo-u pie n themia Israelko geishü hiecie” isituo. Sidi thezie pekrukewau la jokecüu vashü uko tsütuo.

⁹Sidi no Jihova mhingu ki mezhükecüu chükelie la, jokemo-u zie pekrukeshüu nu thejo-u nie donu nu chü kemesawatuo.

¹⁰N ngumvümia ze terhü chüpra di Jihova nie Kepenuopfü uko khapie nie dzie nu shüwa, di nie uko tepie nie diechülie.

¹¹Sidi tekelieko donu thenu kezivipfü puo ngu mu puo ngu n neita ro puo pie n kimia chülie vi.

¹²No puo ze kinu vortatuo, sidi puo tsü thiewatuo, mu puo dzietse lewatuo,

¹³mu puo kedie pfhenei kediwa di n kinu batatuo, sidi khrü puo pete puo puo mu puo zuo krütuo, süsie no puo ki volie vi mu puo nupfu chülie vi, sidi puo n kimia chütatuo.

¹⁴Süsie no puo ngu n nei mota ro, no puo bu puo medora votalie; no puo zecülie lho, no puo pie n die kemhie chülie lho, no puo zhasewaketa la.

¹⁵Miapuoe thenu kenie lie, mu puo ngu puo nei mu kekreiu ngu puo nei mo, mu sünie-e thepfumia penuo pie puo tsü phre, mu thepfu nuorieu puo neikemopfü nuo ro,

¹⁶puoka kezapie puo nuonuoko yathocü nhie puo puo keneipfü nuorieu pie puo neikemopfü nuorieu, phichükuokecüu mhodzü shülie lho.

¹⁷Derei puoe puo neikemopfü nuou pie nuorieu chü zotuo, sidi puo vie pete za kenie[20] pie puo tsütuo, puoe puo phou kekuo ki zasi nuorieu zokecü la; nuorieu ya sü puo vie zo.

¹⁸Mia puoe puo nuo ketsülu mu mia die rünyükemo puo ba di puo puo die rei ze mo, puo zuo die rei ze mo mu unie puo petha zorei unie rünyü mota ro,

¹⁹puo puo mu puo zuo unie-e puo telie di ze nadiu nu phichüko kebachüu nu kharu ki vortuo;

²⁰mu unie sie phichüko ki, “Harie hienie nuo hau ketsülu, mu hienie die zeya mo; puo cahuocaya, mu kemezemia puo zo” isi.

²¹Sitse nadi nu themiakoe pete ketsie pie puo vakhriwatuo; sidi noe nie donu nu kesuou chü kemesawatuo; mu Israel pete süu si di michielietuo.

²²Siro miapuoe sia kezhü tho puo chü di puo pesiawa, mu no seibo puo gei puo goushü ro,

²³puo mo-u bu teizeizha pete seibo gei zhalie lho derei no sünhie puo khruwatuo, goukewamia sü Jihova rüse pfü zokecü la; hai di no Jihova n Kepenuopfü n bu n kayie kijü chünu di se n ketsüu perhuwa molietuo.