Read Angami Naga Pulakeshüzho 22 Bible Online

Pulakeshüzho 22 - Angami Naga bible

Pulakeshüzho 22

¹No n zanuomia, thudo morei puo kuo rühou takezhü ngu di kevavuolie lho; no süko ze la vor niepumia tsü morosuo.

²No kiri niepuu n kepenuo ki ba mo, mu puo si moro no süu ze n kinu vortatuo, di pie n kinu ba di puo niepuu süu pfhü vorkecü tsotuo, süsie no süu pie puo tsü lawatuo.

³N zanuou gada rei üse sükemhietuo; puo pfhenei rei üse sükemhietuo; n zanuou vie kehoupuorei pejüwa di no ngukelieu üse sükemhietuo; no puo khruohi mota suo.

⁴No n siezeu gada morei puo thudo cha nu tetsuketa ngu di kevavuota suo; no süko phou la sieshü di puo khruohishü morosuo.

⁵Thenumia thepfumia pfhenei se suo, mu thepfumia rei thenumia pfhenei se suo, sükemhie chükecümia Jihova n Kepenuopfü mhodzünu kerütse zo.

⁶No seibo gei morei kijü nu pera kru puo nu puo nuonuo morei puodzü ba di ngulie, mu puo krüpfü puo nuonuo morei puodzü weba ro no puo krüpfü puo nuonuo sa pielie suo;

⁷no puo krüpfü khashüwa morosuo, derei puo nuonuo we n thuo bielie vi; siliro n la rei vituo mu no rhei chalietuo;

⁸No ki kesa puo chü ro, n ki mhogei puokhie houkecü puo chü morosuo, mia bu sügeinu tetsu di thezie thejo-u pie n kiu gei vor molieketuo la.

⁹N khubelie nu tsia kenie khashü keduo suo, n lie nu vükelie pete, no tsia khakeshüu rei mu n khubelieu tieyie rei n vie chü motatuo.

¹⁰No thudo puo mu gada puo bu vocie kerhe di ze liecie suo.

¹¹No chümie mu linen kesa dokecü pfhe dzie suo.

¹²No kedzie pfheu gei puoke diako nu puophrie chü morosuo.

¹³Mia puoe thenu puo lielie di puo ki vo, mu puo mecüta,

¹⁴mu theda pie hapfü data, mu puo za bie pesuo di sie, “A thenu hapfü lielie, di puo ki vo ru, puo phousepfüücü zasi ngulie mote” ita ro.

¹⁵Rüüpfü puo mu puo zuo unie-e puo phouse zasiko se nadiu nu kharu ki vor di phichüko ki shütuo.

¹⁶Sidi rüüpfünuo puoe phichüko ki, “A a nuopfü khapie themia hau ki penyishü, ru puoe puo mecüte,

¹⁷sidi harie puoe kethenga theda pie puo da di sie, ‘A n nuopfü phouse zasiko ngulie mo,’ siüderei a nuopfü phouse zasiko sü haha” ituo. Sidi unie-e zhükhra pfheu kelhapie nadiu phichüko mhodzünu shütuo.

¹⁸Sidi nadiu phichüko themiau telie di puo vütuo;

¹⁹sidi ukoe Israelmia phousepfü puo za pu pesuokecü la puo gei raka shekel krie puo menatuo; sidi süko khapie rüüpfünuo puo tsütuo; mu süpfü bu puo kimia chü zotuo; puo rheichie süpfü vawalie kenjü.

²⁰Derei süpfü gei phouse zasi ngulie mota ketho ro,

²¹ukoe puo ze puo puo kikha ki vortuo, sidi nadiu nu thepfumiakoe ketsie pie puo vakhriwatuo; puoe puo ki nunu thethepfü chü di kephouma mhatho pie Israel nu shükecü la. Hamhie di nie donu nu mha kesuou chükemesawatuo.

²²Mia puoe kekreimia puo kimia zezhü di ngulie ro, unie kenienie bu siatuo, thenupfü zekezhüu mu thenupfü rei, hamhie di noe Israel nunu mhakesuo chükemesawatuo.

²³Mia puoe lietuoü di vakhapie baketapfü, mia puoe nadiu nu puo selie di puo zezhüwa ro,

²⁴nie-e unie, kenienie ze nadiu kharu nu partuo, sidi ketsie pie unie vakhriwatuo, thenupfü rei puo nadi nu ba zo rei mia bu puo khruohinu di pheshielie kemo la, mu thepfuu ro puo zanuou zepfü shükewa la. Hamhie di nie-e nie donunu mha kesuo kelhiwatuo.

²⁵Derei mia puoe mia vakhapiekeba rüüpfü puo terha tuo di ngukelie ki puo tepie zezhüwa ro, puo zezhükewau rübei siatuo.

²⁶Derei rüüpfü gei mhapuorei chülie lho; puoe sia kesü kejo puorei chü mo, süu mia puoe puo zanuou bie di dukhrikewa mhie zocü la.

²⁷Kekreilamonyü puoe terha nu puo selie; mu vakhapie kebapfüe shieshü, derei puo khruohiketuo miapuorei tuo moketa la.

²⁸Mia puoe mia puo vakhapie ba kemopfü puo ze keselie di puo telie, di puo zezhüwa, di mia bu unie ngulie ro,

²⁹puo zezhükewau bu raka shekel hiepengou pie rüüpfünuo puo tsütuo, sidi süpfü bu puo kimia chütatuo, puoe puo shüwaketa la, puoe puo rheichie puo vawalie kenjü.

³⁰Mia puoe puo puo kimia chüwaketapfü lielie kenjü, süu puo puo yau[21] kepese mhatho.