Read Angami Naga Pulakeshüzho 24 Bible Online

Pulakeshüzho 24 - Angami Naga bible

Pulakeshüzho 24

¹Miapuoe thenu puo lielie rei hapfü zho kesuo huo ngulie di puo ngu puo neimota, di puo vakewa leshü puo thupie puo dzienu shü di puo ki nunu puo ketsewa; mu hapfü puo ki nunu tuota,

²di vo thepfu kekrei puo ki nyita.

³Mu puo nupfu kerieu puo ngu puo nei mota di puo vakewa leshü puo dzie nu shü di puo ki nunu puo ketsewa; (morei puo nupfu kenieu rei puo liepie puo kimia kechüu siataü mha ro,)

⁴puo nupfu puo ketsekewa kerieu, puo lie lapie puo kimia chülie kenjü, puoe rhuketa la; kekreilamonyü süusü uko Jihova mhodzünu mha kerütse zokecü la; mu noe kejo se Jihova n Kepenuopfü pie n phruokeshü kijüu nu vorlie lho.

⁵Mia puoe thenu liekelie yasa chüba ro, puo bu terhü nu pralie lho morei thepie puorei pie puo pelelie lho; puo bu cie puo rüü di puo kitiekinu batuo, sidi puo kimia puoe liekeliepfü ze puo nei batuo.

⁶Miapuorei telha kegetsie morei kegetsie peso-u khepie setalie kenjü, siliro puoe mia puo kerheiro khe seketa mhie zo.

⁷Mia puoe puo seyie Israelmia puo telie di puo pie puo diemia tuoi di puo zewa ro, miateu bu siatuo, sidi noe nie donunu mha kesuo kelhiwatuo.

⁸Mpa kechü la n kireilie, Levimia phichüko nie ki kepuko ze menuolie, ae uko ki diekhakeshü tuoi, nie menuo di chülie morosuo.

⁹Ijipt nunu nieko parkezhü ki chala nu Jihova n Kepenuopfü Miriam gei kedipuo chüshü shikecü rükraliecie.

¹⁰Noe mha kehoupuorei pie n zanuou thepushü ro, khepiekezhüu lieketuo la no tuo puo kinu le suo.

¹¹No kitie tha di, no mhapie puo thepukeshüu bu khepiekezhüu se par n tsütuo.

¹²Mu puoe kejümia puo ro, no puo khepiekezhü pfheu lielie di se vozhüta suo.

¹³Niaki kele ki no khepiekezhü pfheu kha lashü puo tsüwa di puo bu puo pfhe se puo whezhü di japie n tsülie tuo; sidi Jihova n Kepenuopfü mhodzünu no theja ngulietuo.

¹⁴No zhakhramia, mhakejü ketsopfhümia, n siezedzürie shierei morei chazoumia n kijü n rüna nu kebamia shierei u zhakhra chüshü mota suo.

¹⁵Noe puo zhakhra chüpie puo krakelie nhie niaki kele mhodzü puo tsü morosuo; puoe mhajü di süu merü di lhou keba la; si kemosie puoe Jihova ki n gei kenya di rükhruoshütuo, sidi no phoumalietuo.

¹⁶U nuonuo la u krü bu sialie lho, morei u krünuo la u nuonuo bu sialie lho, themia kehoupuorei puo thuo puo kephouma la sia zotuo.

¹⁷No chazoumia morei u krünuo kejümia mezhü pejü suo, morei thepu la samimiapfü puo pfhe lielie suo.

¹⁸Derei noe Ijipt nu mia die chütuo di Jihova n Kepenuopfü sünunu n rhaliekecü rükra morosuo; süla ae n bu hau chünu diekhashüzhie.

¹⁹Noe n lie nu telha retuo di telhakre puo vawa ro, no süu re latuoü di la philie lho; süu pie rüsorünau, puo krü kejüu, mu samipfü ya chütuo; Jihova n Kepenuopfü bu n dzie mhatho pete nu ja n tsülieketuo la.

²⁰No n Olivbo puosi vürie ro, puo coko vüwaketa sie vü la hie, vü kepeshako rüsorünau, puo krü kejüu mu samipfü ya chütuo.

²¹No n khubelie nu khube rie ro, no puosi rie lalie lho; chazou-u, puo krü kejüu mu samipfü ya chütuo.

²²No Ijipt kijü nu mia diechü zoükecü rükra morosuo; süla ae n bu hau chünu diekhashüzhie.