Read Angami Naga Pulakeshüzho 25 Bible Online

Pulakeshüzho 25 - Angami Naga bible

Pulakeshüzho 25

¹Mhanuü mia kenie donu dienyata, di dienya kinu vor, mu capikoe u nie donu dienyakecü di mia puo pejo mu kekreiu pu kemezhü shütuo.

²Kejo-u vüshü morosuota ro, capiue puo bu zhülie di puo kejo de ki le di puo mhodzü kinu süde pie puo vütuo.

³Va hiedia ketso puo vülie vi, derei süzie suo, puo vü pekrathorta ro, n mhingu kinu n zanuou zha sete.

⁴Thudo bu telha nyükeba ki puotie pera lho.

⁵Siezedzürie keze ba di mia puoe puo nuo thepfumia jü di siata ro, siekatau kimiapfü bu ki süu ciepra kekreimia kinyilie lho. Puo nupfu siezeu thuo puo ki votuo, sidi puo liepie puo kimia chülietuo, derei puo nupfu siezeu bu chüyakezha mhatho chüpie puo gei shütuo.

⁶Sidi Israel nu puo za bu jüta moketuo la puoe thepfumia penuoshü kerieu bu puo dzürie siaketau za setuo.

⁷Mu themiaue puo dzürieu kimiapfü lie nyü mo ro, puo dzürieu kimiapfüe kharu nu pra di phichüko ki, “A nupfu siezeu puo dzürieu za bu Israel nu tuo seiketuo puo medo mo, puoe mia nupfu siezeu mhatho chüpie a geishü nyü mote” idi putuo.

⁸Sitse nadiu nu phichüko puo kielie di puo rüchütuo, mu puoe thethochü zo di sie, “A puo lie nyü mo” ibeita ro,

⁹puo dzürieu kimiapfüe phichüko mhodzünu tuo puo ki phituo, di puo phi geinu puo phikou rhuowatuo, sidi mhitsie pie puo zie vatuo, mu puo die kela di sie, “Themia puo dzürieu kicükinu piesieshü nyükemo-u gei hakemhie chütuo” isituo.

¹⁰Sidi Israel nu puo phikou rhuokewau kikru za pie “puo phikou rhuokewau kikru” isituo.

¹¹Mia puoe mia ze kegeita, mu puo kimiae puo vükezhü kekreiu dzie nunu puo nupfu kelalietuoü phi di puo dzie pie vo luu neidze kenyie pielie ro,

¹²no süpfü dzie dathewatuo; puo ngumezhie morei vi.

¹³No n likhuo nu mhamesi kemejü tsie kenie, puo zha mu puo cükecü setuo suo.

¹⁴No n kinu mha medokecü kekreikecü kenie, puo zha mu puo cükecü pieba suo.

¹⁵Jihova n Kepenuopfü se nie ketsü kijüu nu nie rhei chalieketuo la, no mhakemesi kemejü puotoukecü mu mha kemedo puo toukecü setuo.

¹⁶Sikecü chüyakecüko pete mu diethokemo chüyakecü pete Jihova n Kepenuopfü mhodzü ki kerütse zocü la.

¹⁷No Ijipt nunu parkezhü ki Amalek n gei kedipuo chüshü shikecü,

¹⁸puo Kepenuopfü rei prei mo di chala nu no lho mu mezieketuo ki n bie, di kenuotsa ketuoko pete biekewa rükrashücie.

¹⁹Süla Jihova n Kepenuopfü n bu n vie chünu di n ketsü kijüu we n houpfü keba n ngumvümiako kinu kerülei khapie n tsüshü ro, noe tei khro Amalek kerükra pete vapejüwa morosuo; no süu chü rükra mota suo.