Read Angami Naga Pulakeshüzho 26 Bible Online

Pulakeshüzho 26 - Angami Naga bible

Pulakeshüzho 26

¹Noe Jihova n Kepenuopfü se n phruokeshü kijüu nu vorlie sidi süu pevielie mu sünu lhoulie ro,

²noe Jihova n Kepenuopfü se n ketsü kijüu nunu vülie kerieko pete huoyoyo pie merha puo nu shülie di se Jihova n Kepenuopfü puo za bu ba seiketuo la kedakeshü thechüu nu votuo.

³Mu no süteiki zievo chükebau ki vo di puo ki, “Jihova se n tsütuoü di u puonuoko ki rüsekeshü kijüu nu vorkelie la, a thie Jihova n Kepenuopfü thezieshüzhie” situo.

⁴Siro zievo-ue n dzie nunu merhau pielie di khapie Jihova n Kepenuopfü ruosuobau mhodzünu shütuo.

⁵Mu noe Jihova n Kepenuopfü mhodzünu sie, “A puotsa we Arami-amia puo zo, mu puoe Ijipt nu tsu di sünu lhou, mia keduoyo zo, sidi puo seyie kezha, kekuo mu kekra puo chülie.

⁶Ijiptmiakoe thepie kere khapie hieko geishü di hieko pese mu hie bu kemezhie phi.

⁷Mu hie Jihova, hie puonuoko Kepenuopfü ki chashü ru, Jihova hie pfhe rünyü, di hie kemezhiekecü, hie mhatho kere mu hie pesekecüko mehoshü;

⁸Sidi Jihovae puo dzie kekuo se mu puo bou yhapie mu kekuo kezha, zasi mu mha u ngoko se di Ijipt nunu hieko ze parlie;

⁹Sidi puoe hie ze thechü hau nu vorlie, di mithunudzü mu mepfhidzü krukezhü kijü hau pie hieko tsüshü.

¹⁰Mu harie, ae tsie, no Jihova pie a tsükeshü puosi rüchü kerietho-u se vorshüe” di putuo. Sidi noe süu pie Jihova n Kepenuopfü mhodzünu khashütuo, di Jihova n Kepenuopfü mhodzünu rüsuotuo.

¹¹Mu noe Jihova n Kepenuopfü mha kevi se n ketsü, mu n kinumia, no rei mu Leviu rei mu nie donu keba chazou-u rei ketsü pete la n neituo.

¹²Siro cie se cie ker nu za puo khakeshü cie, noe n liecie pete gei ker za puo khashüwa di Leviu, chazou-u, mu puo puo kejü, mu samipfü tsüshü di uko bu n rüna nunu cü pevülie kevi chüshü ro,

¹³noe Jihova n Kepenuopfü mhodzünu nu sie: “Ae n ki nunu kemesa nyako separte, sizomonyü ae no a ki diekhakeshüko pete ze di, süko pie Leviu, chazouu, puo puo kejüu mu samipfü tsüwate, ae no diekhakeshüko puorei vajowa mo, mu rükra mota mo.

¹⁴Ae kesia krü keba ki ker za puo khakeshüu cü mo, morei a mesa mo keba ki süu puorei bie mo, morei puorei pie kesiamia tsü mo. Ae Jihova a Kepenuopfü pfhe zetuo zo, ae no a ki diekhakeshü tuoi n kepu pete chüliete.”

¹⁵N kebachü kemesau, teigei nu mehoshü di, japie n themiako Israel mu noe hie puonuoko ki rüsekeshü ki ze hie tsükeshü kijüu, mithunudzü mu mepfhidzü kekru kijüu tsüshücie.

¹⁶Thie teiso ha Jihova n Kepenuopfü n bu thezho hako mu diekhakeshü hako chünu di diekhashü, süla noe n melou pete se mu n ruopfü pete se menuo di süko chülie morosuo.

¹⁷No thie Jihova n Kepenuopfü zoü di mu puo chako nu tuolietuoü, puo zhoko, puo diekhakeshüko, puo kepethadieko zelietuoü mu puo pfhe rünyütuoü di phrashüte.

¹⁸Mu Jihova n ki pukeshü tuoi, thie no üse puo themia pekrei zoü di, mu no puo diekhakeshüko pete ze morosuo üdi pushüwate;

¹⁹puoe thetshe, zayie mu therhu mu n chü kerükrie pie puo thuo chükeshü seyie pete mho shütuo, n bu puo pukeshü tuoi, Jihova n Kepenuopfü la themia kemesa kro puo chüketuo la.