Read Angami Naga Pulakeshüzho 27 Bible Online

Pulakeshüzho 27 - Angami Naga bible

Pulakeshüzho 27

¹Sitse Mosa mu Israelmia phichükoe themiako ki diekhashü di sie: A thie nie ki diekhakeshüko pete chüüzelie.

²Mu nie-e Jordan cie se Jihova nie Kepenuopfü se nie ketsü kijüu nu prakelie nhie, nie ketsie kezhazhakecü pfhelie, di puo kenyhü pie nyhülie;

³mu nie Jihova nie puonuoko Kepenuopfü nie ki phrakeshü tuoi mithunudzü mu mepfhidzü krukezhü kijü puo, Jihova nie Kepenuopfü se nie ketsü kijüu nu letuoü di ciepfülie ro, nie süko gei thezho hau dieko pete thulie morosuo.

⁴Süla nie Jordan ciepfülie ro, a thie Ebal geinu nie ki diekhakeshü tuoi nie ketsieko pfhelie morosuo, di puo kenyhü pie nyhülie.

⁵Nie sünu Jihova nie Kepenuopfü la ruosuoba, thegi pie chükemo ketsie ruosuoba puo chüliecie.

⁶Nie ketsie phrokemo[23] pie Jihova nie Kepenuopfü la ruosuoba puo chütuo: Sidi sügeinu kethe ruosuo chüpie Jihova nie Kepenuopfü tsütuo,

⁷siro nie vitho ruosuo khashütuo, di sünunu süko cütuo, Jihova nie Kepenuopfü mhodzünu nie nei di.

⁸Mu nie-e ketsieko gei thezho hau dieko pete thu kemesa seshütuo.

⁹Siro Mosa mu Levimia zievoko Israel pete ki: Harie Israelko, kemekrie di rünyülie, nieko thie Jihova nie Kepenuopfü themia chüte,

¹⁰süla nie-e Jihova nie Kepenuopfü pfhe zelie morosuo, di a thie nie ki pu keshü, puo diekhakeshüko mu puo zhoko chülie morosuo.

¹¹Siro sünhie Mosae themiako ki pu di sie,

¹²Nie Jordan ciepralie ro, themia hako bu Gerizim kijüthou gei thalie di japie themiako tsütuo; Simeon, Levi, Juda, Isakar, Josef mu Benjamin,

¹³mu themia hako bu rüse la Ebal kijüthou gei thatuo: Reuben, Gad, Asher, Zebulun, Dan mu Naftali.

¹⁴Mu Levikoe Israelmia pete ki melie peto di hakemhie pushütuo:

¹⁵“Jihova mhodzü ki terhuo miarhi chükecüu, mha kepie chü rei, lhopie chü rei, thedzie pie rhikecü kehoupuorei pekhre sekebau rüsepfücie” sishütuo. Mu themia petekoe “Amen” idi pushütuo.

¹⁶“Puo puo mu puo zuo rhukemo-u bu rüsepfücie.” Mu themia petekoe “Amen” idi pushütuo.

¹⁷“Puo zanuou kijü rie biekedi kewau bu rüsepfücie.” Mu themia peteko “Amen” sishütuo.

¹⁸“Mhiciemia puo chatha kekrükeshüu bu rüsepfücie.” Mu themia petekoe “Amen” isituo.

¹⁹“Solhimia, puo puo kejüu mu samipfü gei kethoca chüshü moketau bu rüsepfücie.” Mu themia petekoe “Amen” idi putuo.

²⁰“Puo puo kimia zezhükecüu bu rüsepfücie puoe puo puo vie zokecüpfü pfhenei hiekecü la.” Mu themia petekoe “Amen” idi putuo.

²¹“Khunuo kehoupuorei zezhükecüu bu rüsepfücie.” Mu themia petekoe, “Amen” idi putuo.

²²“Puo üpfü, puo puo nuopfü shierei morei puo zuo nuopfü rei, zezhükecü bu rüsepfücie.” Mu themia petekoe, “Amen” idi putuo.

²³“Puo kimianuo zuo zezhükecüu bu rüsepfücie.” Mu themia petekoe, “Amen” idi pushütuo.

²⁴“Pekhre di puo zanuou biekecüu bu rüsepfücie.” Mu themia petekoe “Amen” idi putuo.

²⁵“Jo kemomia puo dukhriketuo la theso piekelieu bu rüsepfücie.” Mu themia petekoe, “Amen” idi putuo.

²⁶“Thezho hau dieko chü mu zekemo-u bu rüsepfücie.” Mu themia petekoe, “Amen” idi putuo.