Read Angami Naga Pulakeshüzho 28 Bible Online

Pulakeshüzho 28 - Angami Naga bible

Pulakeshüzho 28

¹Mhanuü no Jihova n Kepenuopfü pfhe rünyü di a thie n ki pukeshü, puo diekhakeshüko ze menuolie ro, Jihova n Kepenuopfü n chüpie kijü nu seyie kekreiko pete mhoshütuo.

²Mu no Jihova n Kepenuopfü pfhe zelie ro, theja hako pete n gei vor mu n tsolietuo:

³No phe nu thejapfütuo mu terha rei thejapfütuo.

⁴N phou sikevü, mu n kijü sikevü, mu n khunuo sikevü, n kiri mu n kuonuoko kruokecü nu thejapfütuo.

⁵N rhau rei mu n thou kenekhou rei thejapfütuo.

⁶No tuo ler rei thejapfütuo mu tuopra rei thejapfütuo.

⁷Jihova thuo n mhodzü kinu ngumvümia n petsou kesieko penyüwatuo; ukoe cha puo ze di n petsou lertuo, mu cha thenie ze di n mhodzünu tatuo.

⁸Jihova n lhakiko nunu no mhakechü peteko gei theja bu vorketuo diekhashütuo: mu Jihova n Kepenuopfü se n ketsü kijüu nu, puoe jashü n tsütuo.

⁹Jihovae n ki rüseshüketa tuoi, noe Jihova n Kepenuopfü diekhakeshüko piebalie mu puo chako nu tuolie ro, puoe puo thuo puo la n chüpie kemesa themia kro puo chüshütuo.

¹⁰Mu kijü nu themia petekoe, Jihova zau se n kieyaükecü ngulietuo, di ukoe n preituo.

¹¹Mu Jihovae khapie n tsütuoü di n puonuoko ki rüsekeshü kijüu nu, n chü pekruoshütuo, n phou sikevü nu, n kiriko sikevü nu, n kijü sikevü nu,

¹²Jihovae puotei touki n kijü la teirü khashüketuo la, mu n mhatho peteko gei jashü ketuo la, puo kinyi bou keviu teiko khrüshütuo; mu noe n viepie seyie kekra thepushütuo; derei mia vie thepulie lho.

¹³Mu Jihovae n pie puotsüu chüshütuo; puomeiu chülie lho, kerietho chütuo, thelatho nu tuo lho; noe Jihova n Kepenuopfü diekhakeshüko, a thie se n ki pukeshüko zelie mu süko chülieketuo la menuolie.

¹⁴Mu a thie n ki diekhakeshüko dieca puo nunu rei rürei se thezatsa morei thevitsa va se terhuo kekrei lie chütuoü uko sie vota molie ro.

¹⁵Derei noe Jihova n Kepenuopfü pfheu rünyü mo, mu menuo di a thie n ki pukeshü puo diekhakeshüko mu puo zhoko pete chüüzelie moro, rüse hako pete n gei vor mu n tsotuo.

¹⁶No phenu rei terha rei rüsepfütuo.

¹⁷N rhau rei mu n thou kenekhou-u rei rüsepfütuo.

¹⁸N phou sikevü mu n kijü sikevü mu n khunuo sikevü, n kiri mu n kuonuo kruokecü nu rüsepfütuo.

¹⁹No ler rei rüse pfütuo.

²⁰No a khawaketa mu n mhatho kesuo la, Jihova n gei mu n tho n chü peteko gei keka, kemichie mu khriekemo ketseshü di n bu ka mu jü mhatatuo.

²¹No pevielietuoü di vokezhü kijüu nunu n cüpejüwa kemochie Jihova thesau bu n ze tuotatuo.

²²Jihovae u cüpejükecü, ruki, rümiekecü, lepie uthe zokecü, mu teikuo, cieürie mu nouketa pie n pechütuo, sidi no jüta kemochie sükoe n whuotuo zotuo.

²³N tsü mhogei merenyi pie tei chütuo, mu n khro kijüu thegi pie chütuo.

²⁴Jihova n kijü nu teirü pie nyophe chüwatuo, sidi teigeinu nyophe bu n gei tsur di n pekawa zotuo.

²⁵Jihova n chüpie n bu n ngumvümia lhotatuo; no cha puo ze uko whuo pratuo, mu cha thenie ze uko mhodzü tatuo, n bu kijü nu kediko mhodzünu u phou kemehou puo chütatuo.

²⁶Mu n kesia mo pie teirako pete mu kijü nu ketuo nhachü pete va chütuo, mu süko whuoketuo miapuorei tuo motatuo.

²⁷Jihovae meneliekelho Ijipt nu teichüpfü mu mezune, mepfhekecü mu kemeso pie n geishütuo.

²⁸Jihovae kenya, mhicie mu u melou kerüvo pie n geishütuo.

²⁹Mu noe khinhie gei rei mhiciemia kezei nu kesekevuo tuoyakecü tuoi kesekevuo tuotatuo, derei noe n cha ngulie lho; mu mia bu n pese mu n vie selielietuo zotuo, mu n ya pielieketuo miapuorei tuolie lho.

³⁰No thenu puo lietuoü vakhashütuo, mu kekreimia puo puo ze zhüwatuo, no ki puo chüshütuo, derei sünu le lhoulie lho; no khubelie puo cieshütuo, derei khubesiko riepie n vie chülie lho.

³¹N mhi kinu n thudo dukhrishütuo, derei no süu cülie lho; n mhodzü kinu n gada te setatuo, mu kha lapie n tsülie lho, n kuonuoko pie n ngumvümia tsüwatuo, mu n khruohiketuo miapuorei tuolie lho.

³²N nuonuo thepfuko rei thenumia rei khapie themia kekrei tsüwatuo; mu no uko mengu di zhate uko meho di n mhi mezietatuo, mu süu khalieketuo kekuo puorei n dzienu balie lho.

³³No siyakemo seyie puo thuo n kinyi sikevüko mu n mhatho siko pete cülietuo; sidi mia bu n pese mu n kedepfü tuotatuo.

³⁴Sidi n mhi pie kenguko thuo n chü penyawatatuo.

³⁵Jihovae meneliekelho tichü pie n khoudza gei mu n phi geishütuo, n phizhü nunu kho n tsüle ketso.

³⁶Jihovae no mu n kediu, n thuo khapie n mhogei kebau, ze no rei mu n puonuoko rei siyakemo seyie puo ki vorshütuo, mu sünu noe sei mu ketsie pie kechü terhuo kekrei lie chütuo.

³⁷Mu Jihova n ze voshüketuo themiako donu, noe mha kethekhrü puo, mia kepetha die puo, mu mia krenyü puo chütatuo.

³⁸Noe tsia kekra se lie nu tsutuo, mu keduo yopuo retuo; kekreilamonyü kuprie thuo süu cü pejüwaketuo la.

³⁹No khubelie cieshü di puo tho chütuo, derei khubedzü krielie lho morei puosi rei rie kengulie lho, zochü thuo cü phrewaketuo la.

⁴⁰No n kijü pete Oliv bo batuo, derei no puo tier pie n kenhelie lho; n Olivbokoe puosi rürie phretaketuo la.

⁴¹No nuo thepfu mu thenu penuotuo derei süko pie n vie chü n neilie lho, mia bu uko tepie kediechütaketuo la.

⁴²Cievü thuo n seibo mu n lie nu nhasiko pete pevielietuo.

⁴³Nie donu chazoumiako nie mho rükrie miemietatuo, mu nie rünuo miemietatuo.

⁴⁴Puo mhapie n theputuo, mu no puo thepulie lho; puoe puo tsüu chütuo, mu no puomeiu chütuo.

⁴⁵Rüse hako pete n gei vortuo, mu n medzituo zotuo mu n tsolietuo, sidi no kaüjütatuo, noe Jihova n Kepenuopfü pfhe, puo n bu chüüzenu di diekhakeshüko mu puo zhoko rünyü mokecü la.

⁴⁶Sükoe n gei mu n se n yie gei kechachie la zasi puo mu u ngo puo chütuotuo.

⁴⁷Noe n ketshukelhuo pete ngukelie rei n nou n nei di Jihova n Kepenuopfü liechü kemo la.

⁴⁸Süla noe terhü merü di, methuo mu mha pete nu tsopfhü di n ngumvümia, Jihova ketsepie n petsoukecüko lie chütuo; mu n pekawa kemochie puoe thegi vocie puo pie n vo gei shütuo.

⁴⁹Jihova kepetse nu, kijü kela nunu, no puo die sikemo seyie puo, tsüü kethu chü, ze vor n petsoutuo,

⁵⁰puo dzükezie jü zokecü seyie, phichümia rei rünyü mo, mu nhicumia rei ngumezhieya mo.

⁵¹Mu ukoe n kiri lhoukelieko rei, mu n lie nu vükelie nhasiko rei cülietuo, n pekapejüwa kemochie; mu ukoe n bu jüta kemochie, telha rei khubedzü kesa rei, tier rei, n kiri kruokelie rei, mu n kuonuoko puorei khapie balie lho.

⁵²Ukoe n kijü pete nu n kuda kerükrie, no pelekebako tetsuta kemochie, n rüna pete nu n retuo; mu ukoe Jihova n Kepenuopfü se n ketsü kijü pete nu n rünako nunu n retuo.

⁵³Mu n ngumvümia n re pie n bu meyhumezhie zo vo noe n thuo n chü n phousi Jihova se n ketsü n nuo thenu mu thepfu rei chü cütuo.

⁵⁴Nie donu themia mhakesitho mu puozho puorüli kevitho-u zorei puo siezedzürie, puo khrieyaükezha puo kimia, mu puo nuonuo kebako mhodzü kinu kecüca kevietatuo,

⁵⁵mhapuorei ba sa mo keta la puoe puo thuo puo nuonuo chü cükebako puorei pie uko tsülie lho.

⁵⁶Nie donu thenu mhakesitho mu puozho puorüli kevithopfü, menethor zokecü la puo phi pie kijü rei kedeya kemopfüe puoe khrieyaükecü puo nupfu, puo thuo puo nuou, mu puo thuo puo nuopfü kinu kecüca kevietatuo,

⁵⁷nuozekelie sie puo donie donu nu puo lha krükeker-u rei kevie, puo thuo penuokeshü puo nuonuo rei kevie, kekreilamonyü mhapuo rei ba sa moketa la puoe pekhre di süko cü baketa la, nie ngumvümia nie rüna re di nie bu kemezhie pie si zo tsuketa la.

⁵⁸Mhanuü noe Jihova n Kepenuopfü zapuzayiekechüu mu puo za u ngokecüu prei di leshüda hau nu thupie keba thezho hau dieko chüüzelieketuo leterlie moro;

⁵⁹Jihova n gei mu n se n yie gei mia mhiekemo kepechü mu mhakere, thesa, mu kechü kere ba cha phikecü se vor tshushütuo.

⁶⁰Sizomonyü noe preituoyakezha puo Ijipt kechüko pete se n gei vortuo, sidi süko bu n kutopfü tuotatuo.

⁶¹Mu siro Jihova thezho leshüda hau nu thupie tuokemo kechü neiü mu thesa neiü se n gei vorshü di n pekawatuo.

⁶²Sidi nie teigei themvü tuoi krodi chüketuo, keduo yopuo zotatuo, noe Jihova n Kepenuopfü pfhe zekemo la.

⁶³Mu Jihova n chü pevishü mu n chü pekruoshüketuo puo neiketuo tuoi, sütuoi Jihova kepeka se n gei kevor mu n biepesuowaketuo puo neitatuo, sidi noe vo pevielietuoü kezhü kijüu nunu n phe kelhouwatuo.

⁶⁴Mu Jihovae n kezapie kijü kela puo nunu kekreitsa ketso themia neiü donu shüwatuo; mu sünu noe sei mu ketsie pie kechü, no rei mu n puonuoko rei siyakemo terhuo kekrei lie chütuo.

⁶⁵Mu seyie süko donu no kerüü puorei ngulie lho, mu n phizhü bu rüleiliekecü rei jütatuo, derei Jihova sünu pekecü melou puo, merükecü mhi, mu thedzükekou nou se n tsütuo.

⁶⁶N kerheiro n mhodzü ki kemichie nu ba zotuo; khinhie rei theva rei no n noumeca ba zotuo, mu n kerheiro la khrukhrekecü jütatuo.

⁶⁷Noe khise sie, “Thevatieluoü tse” itatuo, mu thevatie sie, “Khiseluoü rei” itatuo, n melou ki michie kecüko la, mu n mhipie mha nguketuoko la.

⁶⁸Jihovae rou nunu n ze Ijipt nu la votatuo. A n ki phrashükemo cha puo nunu, mu sünunu noe n thuo n themia thenu thepfu rei zepie n ngumvüko die chütuo ütuo, derei kekhrümia jütatuo.