Read Angami Naga Pulakeshüzho 29 Bible Online

Pulakeshüzho 29 - Angami Naga bible

Pulakeshüzho 29

¹Horeb kijüthou geinu uko ze dietseidiekhokelie zokemo, Kepenuopfüe Moab kijü nu Israelko ze dietseidiekholienu di Mosa ki diekhakeshü hakoha.

²Mosae Israel pete kielie di, uko ki: Jihovae Ijipt nu nie mhingu kinu, Faro gei, puo kituomia pete gei, mu puo kijü pete gei mha chükeshü pete nie nguwate;

³thepie kezha, zasi mu u ngo sekecüko, nie mhi pie nguwate.

⁴Derei thie ketso Jihovae sü lelie kevi melou, ngulie kevi mhi mu rünyülie kevi nyie pie nieko tsüshü mo.

⁵A cie hiedia rayha nu nieko chathatuote. Nie gei nu pfhenei prieta mo; mu nie phi geinu nie phikou suota mo.

⁶Nieko bu niekhrüda cü mo, mu khubedzü morei zu kekuo krie mo, nieko bu a Jihova nie Kepenuopfü ücü silieketuo la.

⁷Mu niekoe thechü haunu vorlie tse, Heshbon kediu Sihon mu Bashan kediu Og ze kegeituoü par, derei we uko penyüwa.

⁸Sidi we uko kijü lielie di khapie Reubenko, Gadko mu Manasseh yie ketou puo phruowa.

⁹Süla diekhakeshü hau dieko menuo di chüüzelie, nie mhakechü pete nu chükhrielieketuo la.

¹⁰Thie nie pete Jihova nie Kepenuopfü mhodzünu tha, nie thinuo krütako, nie donu pehüko mu nie mhatho keseko, Israelmia pete,

¹¹nie nuonuo kecüko, nie nupfünuoko mu solhimia vor nie donu kebako rei, nie sei duyakecüu nunu nie dzü üyakecüu ketso,

¹²nie bu Jihova nie Kepenuopfü dietseidiekho-u mu puo thie nieko rüse di phrakeshüu nu lelieketuo la.

¹³Puo bu thie nie pie puo themia chülieketuo la, mu puo bu nie Kepenuopfü chülieketuo la, mu puoe nie puonuoko, Abraham, Isak mu Jakob ki rüsekeshü tuoi.

¹⁴A thie rüse di nie haki kethako rübei ze ae dietseidiekho rüse hau chüzhü mo,

¹⁵derei thie uko ze Jihova uko Kepenuopfü mhodzünu tha kemoko rei ze chüzhie.

¹⁶We kikidi Ijipt nu lhou shikecü mu we kikidi seyieko donu pfüthe vor shikecü nie-e si ba.

¹⁷Niekoe uko vie kerütseko, sei mu ketsie pie kechü, rakachü mu suna pie kechü, terhuorhiko uko donu bakecüko nguwate.

¹⁸Nieko donu thepfumia puo morei thenumia puo, morei pfutsanuo puo, morei seyie puo thie puo Jihova Kepenuopfü kinu puo nou rüdita di vo terhuo kekrei süko lie chükecü lebata rei si mo, nieko donu therei mu chüthesie mu petheshüketuo puomie kre bata rei si mo.

¹⁹Themia kehoupuorei rüsedie hau sishü zorei, u nou kinu, u thuo u dzüzie chü di, “U nou meteitsapfü di, we kru ba zo” iba di keka se vor phiedzü lie mu keso lie chükezhamia,

²⁰Jihova sümia kejo vashü nyü lho, derei Jihova nouyieu khu sie sümia petsoutuo. Leshüda hau nu thukeba rüse pete puo gei vortatuo mu Jihova sümia za teikhro nu vawatuo.

²¹Jihovae thezho leshüda hau nu thupiekezhü thezho leshüda nu rüse pete tuoi, puo peka pejüwatuoü di, Israel seyie pete donu nu puo chü kreilietuo.

²²Thephou kesau, nie sie sierketuo nie nuonuoko, mu kepecie nunu kevor chazoumiako, kijü hau gei thesa kesuo vorketa mu Jihova kechü pie puo pechüketako ngutuo.

²³Jihovae puo nouyieu nunu Sodom mu Gomora siro Adma mu Zeboim sa pekakeshü tuoi, sulfur mu metsie bu thekewa kijü tuoi di tsia pie lie nu shü mota, mhapuorei puosi vü mota, nha rei lhou mokecü chükeshü tuoi.

²⁴Uko mu seyieko pete rei sie, “Jihova kiüdi haikecü chüpie kijü hau gei shü shi? Kedipuo geinu thenou kemeyie zhapie haikecü pekieshü shi?” ituo.

²⁵Sidi ukoe sie, “Ukoe uko puonuoko Kepenuopfü, Jihova uko ze Ijipt nunu kepar ki uko ze dietseidiekho chükeshüu khawata,

²⁶vo terhuo kekrei, ukoe siyakemo rhuo, puoe khapie uko tsüshü kemoko liechü mu rüsuotuotakecü la,

²⁷süla Jihova nouyieu kijü hau mhogei tusieta, di leshüda hau nu thupie keba rüseko puo gei se vorshü.

²⁸Jihova puo noupfhü nouyie mu puo nei mo phi di uko mie phewa, di uko kelhoupie kijü kekrei puo nu shüwate sidi thie haite” ituo.

²⁹Kepekhre vieko sü Jihova úko Kepenuopfü vie zo; derei pekiewaketako we kechachie u vie mu u nuonuo vie zo, u bu thezho hau dieko pete chülieketuo la.