Read Angami Naga Pulakeshüzho 3 Bible Online

Pulakeshüzho 3 - Angami Naga bible

Pulakeshüzho 3

¹Süsie hie rürei se Bashan cha nu kho, mu Bashan kediu Og Edrei nu u ze terhü chütuoü di puo themia pete ze par.

²Derei Jihova a ki, “Puo prei hie, ae puo mu puo themia pete mu puo kijü kha pie n dzie nu shüwate mu noe puo gei rei Heshbon nu keba Amorko kediu Sihon gei chükeshü mhiei chüshütuo,” sishü.

³Süla Jihova úko Kepenuopfüe Bashan kediu Og rei mu puo themia peteko rei khapie u dzienu shü mu we puo geigei vo puorei peshashü puo tsü mo.

⁴Süteiki we puo nadiko pete lielie, pete kesa hiesorou, uko kinu nadi puorei lielie kemo ba mota, Bashan nu Og kediu rüvie, Argob kijü pete lielie.

⁵Hako pete nadi dahou chü kerükriekecü rüna, kharu kenienie mu cakha nyi phre, süko zokemo kijü rüna kekra sa.

⁶Mu uko süko peka phrewa, Heshbon kediu Sihon pekakewa mhiei, nadi pete, thepfumia rei, thenumia rei, mu nhicumia rei peka phrewa.

⁷Derei periko pete mu nadiko nu mha vakelie pete liepie u vie chülie.

⁸Sidi süuva ukoe Jordan tse kepratsa keba Amorko kedi kenie dzie nunu kijü lielie, Arnon razha nunu Hermon kijüthou ketso kijüko,

⁹(Sidonkoe Hermon Sirion üya; mu Ammonmiako Senir üya),

¹⁰Kijü kemezhü gei keba nadiko pete mu Gilid pete mu Bashan pete, Saleka mu Edrei ketso, Bashan mu Og kedi rüvie nu keba nadiko.

¹¹(Refamia lhou pesha keba Bashan kediu Og rübei zota; harie, puo zhü thegi pie chü, süu Amon nuonuoko Raba nu ba. Puo kecha thu thepfü, puo kezha thu dia, themia miakrau thu pie mejükeshü.)

¹²Süteiki hiekoe kijü lielieketako liro, ae Arnon Rüu khie keba Aroer mho pesotsa[3] kijüko mu Gilid kijükhru ketou puo üse puo nadiko sa pie Reubenko mu Gadko tsüshü,

¹³mu Gilid kijü keshako, mu Og kedi rüvie Bashan pete pie Manasseh seyie tietsako tsüshü, süu Argob kijü pete (Bashan kijü süu pete üse Refamia kijü üya.

¹⁴Manasseh nuou Jair-e Argob kijü pete, süusü Bashan Geshurko mu Makatko rie ketso lielie di rünako za pie puo za kie di Havot-jair[4] tholie, tsie ketso rei süu kieya.)

¹⁵Ae Gilid pie Makir tsüshü,

¹⁶mu Gilid kijü nunu Arnon Rüu tietsa ketso pie Reubenko mu Gadko tsüshü, kerüu metsuo pie therie chü di Jabok rü ketso;

¹⁷mu Jordan pie therie chü di Araba rei sa, Kineret nunu Araba dzükezha ketso, niathutsa Pisga tsiekhie khro nu keba Kesia Dzükezha ketso.

¹⁸Mu süki a nieko ki diekhashü di sie: “Jihova nie Kepenuopfüe nie bu pie nie vie chütuoü di kijü hau khapie nie tsüshü; nie donu terhü nu pralie keviko pete bu u rünyie selie di Israelmia nie siezedzürieko mhodzü tuoshülie.

¹⁹Derei nie nupfünuoko, nie nuonuo kecüko mu nie kiriko (Ae nie khurinuo kekra bacü si) bu we a pie nie tsüwaketa nadiko nu ba zolie,

²⁰Jihova kerülei khapie nie ketsü tuoi nie siezedzürieko rei tsüshü kemochie, mu uko rei Jordan khie kekreitsa, Jihova khapie uko ketsü kijüu pevielie kemo chie” si.

²¹Mu a süki Joshua ki diekhashü di sie, “Jihova nie Kepenuopfü kedi hanie gei kedipuo chüshü shikecü nie mhi pie nguwate; sükemhiei Jihova no votuoüzhükecü kedi rüvieko gei rei chüshütuo.

²²Nie süko prei morei vi, Jihova nie Kepenuopfü thuo nie la kegeizhü zokecü la.”

²³Siro a süki Jihova ki cha di sie,

²⁴“He-i Jihova Kepenuopfü, no n kezha mu n dzie kekuo pie n thekeu pekieshüte; teigei shierei kijü shierei terhuo kikecü puo nie mhatho haikecü no chükeshü mhie kekuo mhathoko chülie vituo ga?

²⁵A n ki chaya, a bu pra di Jordan khie lutsa kijü keviu kijüthou rüna keziviu, mu Lebanon ngushücümu.”

²⁶Derei Jihova nieko la a gei puo nei mota di a die rünyü mvüta; sidi Jihova a ki, “Puo mesete; mha hau dze a ki pu la hieta.

²⁷Pisga mezü gei sielie, di kisietsa rei, pesotsa rei, pekhrotsa rei mu niathutsa rei mehoshülie, n bu Jordan hau cie pralie lhokecü la.

²⁸Derei Joshua pethashülie, di puo chükethepfu mu chüpekuoshülie; puoe themia hako mhokezha chü di pratuokecü la, mu puoe uko bu no nguketuo kijüu pevielietuokecü la” sita.

²⁹Süla hieko Beth-peor rütsietsa razhau nu bata.