Read Angami Naga Pulakeshüzho 30 Bible Online

Pulakeshüzho 30 - Angami Naga bible

Pulakeshüzho 30

¹Siro ae n mhodzünu keshü mha hako pete, theja rei mu rüse rei, n gei vorwa, mu Jihova n Kepenuopfü n whuopie shükewa seyieko donu nu noe süko rükralie,

²sidi Jihova n Kepenuopfü ki la vorlie, no rei n nuonuo rei a thie n ki diekhakeshü peteko nu, n melou pete se mu n ruopfü pete se puo pfhe zelie ro,

³siro Jihova n Kepenuopfü n pelhou lashütuo, mu n ngumezhie lashütuo, sidi puoe n whuopie cürekewa seyie peteko donu nu n pfhü kengu lalietuo.

⁴Nieko mia huo vo tei kela nu tuota rei Jihova n Kepenuopfüe sümia rei pfhü kengulietuo, mu sünu nu puoe n ze la vortatuo,

⁵mu Jihova n Kepenuopfü n ze la vor puonuoko pie u viekecü kijüu nu la vorshütuo, sidi n bu süu pie n vie chütuo, n chü pekruoshütuo, sidi n chü pekrapie n puonuoko ki krashütuo.

⁶Siro Jihova nie Kepenuopfü nie bu nie melou pete se mu nie kerheiro pete se Jihova nie Kepenuopfü khrielie di rheilieketuo la nie melou mu nie nuosenuoyie melou zhürewatuo.

⁷Sidi Jihova rüse hako pete pie nie ngumvümia gei, mu nie mecü mu nie peseyakecü peteko gei shütuo.

⁸Sidi noe la vor di Jihova pfhe zelietuo, mu puo diekhakeshüko, a thie n ki khakeshüko pete chülietuo,

⁹mu Jihova nie Kepenuopfü nie dzie mhatho pete nu, nie phou si kevü nu, nie kiri si kevü nu, mu nie kijü sikevü nu nie chü pekruo penyishütuo; Jihova nie puonuoko gei puo neikecü tuoi nie chü pekruokeshü puo nei lalietuo.

¹⁰Nie Jihova nie Kepenuopfü pfhe ze di thezho leshüda hau nu thupiekeba, puo diekhakeshüko mu puo zhoko zelie mu nie melou mu nie kerheiro pete se Jihova nie Kepenuopfü kitsa vorlie ro.

¹¹Ketho zo, a thie diekhakeshü se n ki khakeshüu n la rethor mo zo, morei peciethor mo.

¹²Süu teigei ba di no, “Supuo nie hie la teigei kho di hie ki se tsurshü hie bu rünyülie mu chüüzelietuo ga?” itacü pfü mo.

¹³Mu siro dzükezha ciekevo nu ba di noe, “Supuonie dzükezha cie vo di süu se hie ki vorshü di hie bu rünyülie mu chüüzelietuo ga?” itakecüpfü mo.

¹⁴Mo zo, dieue n penuo phi ba, n tie nu ba, mu n nou ba mu no chülie vi zo.

¹⁵Harie, a thie n mhodzünu kerhei mu kevi; kesia mu kesuo khashüe.

¹⁶Noe a thie n ki pukeshü, Jihova n Kepenuopfü diekhakeshüko zelie di puo khrielie, puo chako nu tuolie, mu puo diekhakeshüko, puo zhoko mu chathako zelie ro; noe rheilietuo mu kruolietuo, mu no tsie pevielietuoü di, vokezhü kijüu nu Jihova n Kepenuopfü jashü n tsütuo.

¹⁷Derei n noue rüdita, noe rünyü mvüta di terhuo kekrei rüsuo mu süko lie chüta ro,

¹⁸a thie n ki pushüzhie, no kaüjütatuo; no Jordan cielie di le pevielietuoü kezhü kijüu nu rhei chalie lho.

¹⁹A nieko mhodzünu kerhei mu kesia, theja mu rüse khashüükecü a thie nieko zhapu la tei mu kijü kieshüzhie; süla kerhei kedaliecie, no rei mu n nuosenuoyie bu rei rheilieketuo la,

²⁰Jihova n Kepenuopfü khrielie, puo die zelie, puo kutopfülie, süu n la kerheiro zo, mu n kelhou teisozhako zo, sitse noe Jihovae rüse di n puonuoko Abraham, Isak mu Jakob tsütuoükeshü kijüu nu lhoulietuo.