Read Angami Naga Pulakeshüzho 32 Bible Online

Pulakeshüzho 32 - Angami Naga bible

Pulakeshüzho 32

¹Harie teiko, nie nyie kedeishücie, a die pushütuo, mu kijüu bu a tie nu die rünyüshücie.

²A kepethadie bu teirü tuoi tetsurcie, a diepu bu thezei tuoi krütsurlie, tei rümhie pie nhanuothe keva tuoi, tei rütsur nha the kepar keva tuoi.

³Ae Jihova za pu keyieshüketuo la; kezha zau pie Ukepenuopfü tsüketuo la.

⁴Tsiekrieu, puo mhatho sü vi lotso, puo chako pete mezhü. Kemiatho Kepenuopfü, puo gei kecürü tuo mo, puoe dietho mu mezhü zo.

⁵Derei ziezhü moketa nuonuoko tijüpie puo tsü, uko ziezhükemo mu rüpfhikecü seyie.

⁶Kenya mu mharhi sikemo themia, hai di Jihova pu chü laya me? Puo sü nie puou, nie pelhoukeshüu, nie chükeshüu mu pesiekeshüu mo me?

⁷Teisozha keviko rükrashücie, phou kekra teicieko leshücie, n puo ketsolie, puo n ki pushütuo; phichüko ketsolie, uko pushütuo.

⁸Kerükrietho-ue[25] seyieko ya chükeshü ki, puoe themianuo kho kekreikeshü ki, therie rhiepie themiako tsüshü, Israel nuonuoko ketsa kekra le di.

⁹Jihova yau sü puo themiako zo, Jakob sü pie puo phruokeshüu zo.

¹⁰Puo thuo kijü kesia nunu puo ngulie, mhapuorei lhoukemo rayha nunu; puoe puo yapieshü, puo meho menuoshülie, puo mhishülou kekhrie tuoi puo khrielie.

¹¹Tsüürapfü puo kru nu puo nuo yukreishü di puo nuonuo mho pruo zhayakezha tuoi. Süu puoshü lhashü di uko pie puo shütie gei shülie, di uko ze pruo sieshüyakezha tuoi,

¹²Jihova rübei puo chatha zetuo, terhuo kekrei puorei puo zetuo mo.

¹³Puoe puo pie kijü kerükrie zhü nu shü, sidi puo bu lie nu rüchükelieko cü; tsiekrie geinu mepfhidzü mu tier se puo theke;

¹⁴kirinuoko geinu puo nudzükha, kiriko geinu puo nudzü, tekuonuo, mu tekuochü luokecüko, Bashan nu tekuochüko mu mvüdoko geinu rei, thoulha kemesathoko rei sa, se puo theke; khube zie nunu se kepar khubezu kevithopfü pie krie.

¹⁵Jakob cü pevülie, mu Jeshurun luolie tse, phichapie mia mesüta. Noe luota, zhata, mhekeshü chülieta, cüpie pholieta! Sitse puoe puo chükeshü Ukepenuopfü khawa, sidi puo kelakelie Tsiekrieu kreta.

¹⁶Ukoe terhuo krei sekecü pie puo nou vapesuo; kerütse mhathoko chüpie puo neikemo chü.

¹⁷Ukoe ruosuo chüpie terhuotemi tsü, siyakemo rhuo, tsie nu keler terhuo kesako, n puonuokoe preituoyakemo terhuoko.

¹⁸No n pelhoukeshü Tsiekrieu sanyü mota, mu no n penuokeshüu Ukepenuopfü rükra mota.

¹⁹Jihovae süu ngushü di puo rota, sidi süko meliewa, puoe puo nuo thenu rei thepfu rei melieta.

²⁰Sidi puoe sie: A uko kinu a zie kevielietatuo, uko thelau kimhietuo shi mehoshütuo, ukoe ziezhükemo phou puo zo, kedietho ugei tuokemo nuonuo phre.

²¹Uko sü terhuo kemo pie a nou vakemeyie mu miarhi se a nou vakerüpeshü. Süla a rei themia kemo kro puo pie uko nou vapesuoshütuo. A seyie kenya kro puo pie uko petsoushütuo.

²²A nouyie nu mi puo thushüte, süu tutsu Sheol kesoutho nu tso, kijüu mu puo gei kelhouko thepejüwa, mu kijüthou mvüdzeko theshü.

²³Mu ae mha kesuo pie uko petsoushütuo; ae uko gei a theütsie cieshütuo.

²⁴Merü pesuo votakecü puota, thepetheruo. Nhachü kekhrie hu ketsepie uko petsoutuo, mu nyophenu gutuoyakezhako geinu therei rei sa.

²⁵Chazou nu ro zhiecha nunu pekashütuo, kibouko nu ro kemeriekecü, khriesamia mu rüümia rei, kenunuomia mu tsüpouko gei rei.

²⁶Ae uko biekezawa di themia donu uko dze si sakemo chüwaketuo le sie,

²⁷derei ae uko ngumvümia keka separkeshü preite, sükoe mhale kekrü di sie, “U dzie kuo ba zo, hau chükeshüu Jihova mo,” italie vicü la.

²⁸Ukoe mharhi sikemo seyie puo zo, uko donu kesikelemia tuo mo.

²⁹Ukoe mhasicü we, ukoe hau sikelie mese, uko thiesie rüli lelietuociü.

³⁰Kimhie di mia puo thuo thenyie whuoliekecü, mu mia kenie thuo mia nyie ker whuolieyakecü, uko Tsiekrieu thuo uko zewata mo, mu Jihova uko khawata mocü we?

³¹Ketho zo, süko tsieu we u Tsiekrieu mhie mo, u ngumvüko kenyamia zo.

³²Uko khubeko liro Sodom khube mvüu nunu par, mu Gomora khube zieko nunu par, uko khubesiko we khubesi therei geinu par, puo phroko pfhümezha.

³³Uko zuko we tinyhü therei mu nyhübvü therei kerhupfü.

³⁴Mha hau a gei kengupie ba mo me? A kinyibou nu kha tsapie ba mo me?

³⁵Khepu sü a mese, zhadakevü rei; uko phi tsierhiekeshü ki la; uko kataketuo zhau penuoketa la, mu uko gei phirketuou phir mhatuo.

³⁶Ketho zo, Jihovae puo themiako ca chüshü, mu puo thekeko ngumezhieshütuo, puoe uko kekuo puorei tuo moketa ngushü ro, kedieu rei, kediekemo-u rei.

³⁷Sitse puoe sie: Uko rhuoko, uko puo rüzhükelie tsieu kirapuo tuota ga?

³⁸Uko ruosuoko nu puoshuoko supuo cülie ga? Mu uko kekrie ruosuo nu khubezu supuo krielie ga? Uko bu sie di nie khruohiliecie, uko bu nie keya chüliecie!

³⁹Tsie A sü, A zokecüu siliecie, a sie terhuo kekrei jü; a biekhrishü mu chüperhei lashüya, a bie kerüzashü chüpevi lashüya; mu a dzie nunu shüphra se talieketuo puorei tuo mo.

⁴⁰A dzie yhase teitsa va di, di rüseshüya: A kechachie rheituoyakezha tuoi,

⁴¹Mu a zhiecha kerü kemephrielie di, a dziepie thecau theze kemeteilieta ro; a keperhiemia gei a khepulie tuo, mu a rütsekecüko gei kheu chüshütuo.

⁴²A theütsieko bu thezie krie mezeshütuo, mu a zhiechae ngumvümia u tsütha kechako, dukhrikewako mu kedieko zie geinu.

⁴³Teiko puo tsheliecie puo themiako, puo rüsuoliecie, terhuoko rei sa siliecie! Puoe puo nuonuoko[26] zie khepukecü la, mu puo keperhiemia gei puo khepuya, mu puo rütsekecü kheu chüpie tsüya, mu puo themiako la kijüu chü kemesashütuo.

⁴⁴Mosae Nun nuou Joshua sa ze di vor themiako kesi kinu tsali hau dieko pete phrüshü.

⁴⁵Mu Mosae Israel pete ki die hako pu tseishüwa tse,

⁴⁶puoe uko ki: “A thie nieko ki kepu dieko se nieko nou shüliecie, süko pie nieko nuonuo ki diekhashülieketuo la, uko bu thezho hau dieko pete menuo di zelieketuo la.

⁴⁷Hau nie la mhathomharo puo mo, derei nie kerheiro zo, mu sügeinu nie-e Jordan cievo pevielietuoü kezhü kijü nu rhei chalietuo.”

⁴⁸Mu Jihovae teisozha sünhie Mosa ki,

⁴⁹“Moab kijü Jeriko rütsie nu keba Abarim kijüthouro gei keba Nebo kijüthou gei sielie; di ae khapie Israelmiako bu uko vie chünu di uko ketsü Kanan kijüu tsatie mehoshülie,

⁵⁰sidi n dzürieu Aron Hor kijüthou gei nu siata di, vo puo yiemiako salieketa mhiei, no kijüthou melikesie geinu siatuo, sidi n yiemiako salietatuo;

⁵¹kekreilamonyü nnie kenienie Zin nhatsa nu Meriba-kadesh dzü khieki Israelmiako mhodzünu a kemesau sethalie moketa la.

⁵²Noe pecie nunu kijüu we ngutuo derei no sünu lelie lho; a khapie Israelko tsütuoü kezhü kijüu.”