Read Angami Naga Pulakeshüzho 33 Bible Online

Pulakeshüzho 33 - Angami Naga bible

Pulakeshüzho 33

¹Ukepenuopfü themiau Mosae puo se mhodzü theja hau japie Israel nuonuoko tsüshü.

²Puoe sie: Jihova Sinai geinu tsur, Seir geinu teikeso chü hie gei zie tsur, Paran kijüthou geinu zieshü, kemesako phrühulie kelho puo zetuo, puo vie zokecüko thuo puo zatsatuo.

³U we, themia pete donu rei puo khriekepfüu,[27] kemesako pete pie n dzie nu shü; süla ukoe n siemedzi, n kinu chatha ngulie.

⁴Jakob kro-u bu se puo viechünu di, Mosae thezho puo khapie hie peleshü.

⁵Sidi themia krütako kengulie, Israel seyie pete keze puochülie tse, Jeshurun nu kedi puo sier.

⁶Reuben bu rheikelieu chülie, sia kata hie, puo thuo tsa zorei.

⁷Mu puoe Juda la hau pu di: He-i Jihova, Juda pfhe rünyüshücie, puo themiako ki puo ze vocie. Puo la puo dzie chüpekuo shücie, mu puo khruohi di puo keperhieko petsoushücie.

⁸Mu Levi la hau pushü: N Thumim se Levi tsücie, mu n Urim se n gei kedietho-u tsücie, no Masa nu puo dojükecüu, mu Meriba dzü nu puo ze kegeikecüu;

⁹Puo puo mu puo zuo ki pu di, “A unie rünyülie lho” iketau, puo siezedzürie sanyü moketau, puo nuonuo zorei si moketau. Ukoe n dieu mu n dietseidiekho-u sebacü la.

¹⁰Ukoe n chathako pie Jakob pethatuo, mu n zhopie Israel pethatuo, ukoe mharekethengu pie n mhodzünu shütuo mu n ruosuoba gei mote kethe ruosuo khashütuo.

¹¹He-i Jihova, japie puobo-u tsücie mu puo dzieko mhatho lieliecie; puo keperhieko, puo mecüyakecüko chie vütshewalie, uko bu la sier moketuo la.

¹²Benjamin la puo pu di: Jihova khriekepfüu zo, puoe rülei tshüipfü baya; Kerükrietho Kepenuopfü[28] thuo zhate puo wepie baya, puo khriekepfüu puo bouka nie geinu puo bashüya.

¹³Josef la puo pukeshü: Puo kijü bu Jihova theja pfücie, tei pesogei keba, mu kesou pekhro nu keba mha kevi khe bu puo vie chücie,

¹⁴niaki vie puosikevü kevithoko, mu thekhrüko vie vükeshü keviko,

¹⁵mu thiedzütho kijüthouko geinu ngukelie mha kevithoko, tuo seiketuo kijüthouko, u ketshukelhuo kechüko rei sa.

¹⁶Kijü nu vie kevithoko pete mu Sinai gei keba ngukemezhie sa. Theja hako bu Josef tsü gei vorlie, mu puo vi kreikhrokecüu siezedzürie donu kedinuou teikhie gei vorlie.

¹⁷Puo wekevi thudonuo nuorie tuoi zo, therhu sü puo vie! Puo kia sü nhathudo kia tuoi zo; puo kia pie mia thutuo, sidi süko whuopie kijü vala nu shüwatuo, Efraim phrühulie kelhoko sü si zotuo, Manasseh mia nyienyieko si zotuo.

¹⁸Mu puo Zebulun la pukeshü: Zebulun, n neiliecie, no tuokepra nu mu Isakar n pfhekiu nunu.

¹⁹Unie-e themia kiepie kijüthou gei shütuo, sünu puotoukecü ruosuo chütuo; kekreilamonyü dzükezha nu kinyiko, mu theshünyo nu keviekeba kinyiko mete cütuo.

²⁰Mu Gad la puoe pukeshü: Gad chüpezhakeshüu thejapfütuo! Gad sü losha puo tuoi zhüya, puoe mia bou chiekhuwaya mu mia tsüru ciekhrawaya.

²¹Puoe puo thuo puo la kevitho-u kedalie, krütau ya la khapiekezhüu puoe seyie nu peyuko ze vor, puoe Jihova kethocau se mha chüshü mu Israel la khakeshü chathako seshü.

²²Mu Dan la puoe pukeshü: Dan sü losha nuo puo zo, Bashan nunu proukepar.

²³Mu Nafatali la puoe pukeshü: O Naftali, n noulie pekreikeshü la n nei mu Jihova theja pie n ketshu chükeshü la niakratsa mu pekhrotsa lielie.

²⁴Asher la puo pukeshü: Asher bu thepfunuoko mho theja pfülie puo bu puo siezedzürie khriekepfüu chü mu puo bu puo phipie tier nu selie.

²⁵N dahouko thegi mu merenyi pie chütuo, n kekuo rei n teisozhako tuoituo.

²⁶Ukepenuopfü kemhie miapuorei tuo mo, O Jeshurun, puoe n khruohituoü di teigei pfüya, tei pete nu zapuzayie chü di.

²⁷Puo kerieki rhuoko penyüwate,[29] mu thiedzü kekuoko[30] bietshewaya,[31] puo n mhodzü kinu n ngumvümia whuowaya di “Pekawalie” sishü.

²⁸Süla Israel khrukhre bate, mhapuorei Jakob kebachüu kebvü mote, lhacülhale mu khubezu kijü, teigei nu thezei tsuryakezha kijüu.

²⁹Noe n neiya, O Israel! N tuoikecü supuo tuo ga? Jihova bu kelaliekecü themia, n kekhruohi zhüu, no kuokelie zhiechau! N ngumvükoe u hulie pie n ki vortuo, mu noe uko chie kedetuo.