Read Angami Naga Pulakeshüzho 4 Bible Online

Pulakeshüzho 4 - Angami Naga bible

Pulakeshüzho 4

¹Harie Israel, tsie Jihova nie puonuoko Kepenuopfü khapie nie tsükeshüu nu nie rheiba di le pevielieketuo la, ae thezho mu diekhakeshüko pie nie pethakeshüko le terüliecie.

²Nie dieca puo rei pie a nie ki diekhakeshüko pe sa hie, morei sünunu chüseta hie, Jihova nie Kepenuopfü diekhakeshüko, a die khashü nie ketsüko zelieketuo la.

³Jihova Peor nu Baal gei kedipuo chüshü shikecü nie mhi pie nguwate; Jihova nie Kepenuopfü Peor nu nie Baal medziketa pete pekawa.

⁴Derei nieko, Jihova nie Kepenuopfü mengutsapfükelieko thie ketso rei rheiba zo ho.

⁵Harie, Jihova a Kepenuopfü a ki diekhakeshü tuoi, ae thezhoko mu ahza pie nieko pethashü, süusü nie vo pevielietuoükezhü kijüu nu chüüzelieketuo la.

⁶Süko zelie mu medzilie, süu pie themiako mhingu nu nie mhasimhale chütuo, mu ukoe thezho hako pete sishü ro sie, “Ketho zo, seyie kezha hau sü mhasi mu mhacamhala kesi themia kro puo zo” situo.

⁷Kekreilamonyü Jihova úko Kepenuopfü sü we puo kiekeshü ki u penuokeba tuoi seyie kezha kikecüpuo u rhuo u penuoketuo ba ga?

⁸Mu a thie thezho pie nieko mhodzünu keshü tuoi mezhükecü thezho mu ahza nyikecü seyie kezha kikecüpuo ba ga?

⁹Menuou menuolie, mu pecü phi di nie kelhou seliecie, nie mhi pie ngukeshüko rükra mota molieketuo la, sidi süko bu nie rheichie nie nou kinu tuota molieketuo la süko pie nie nuonuo mu nie tsunuoko pesishülie,

¹⁰nie Horeb nu Jihova nie Kepenuopfü mhodzünu thakecü nhie, Jihova a ki, “Themiako kengupie a ki shülie, uko bu a die rünyülieketuo la, uko bu kijü nu lhouketuo chie a prei seilieketuo la, sidi süu pie uko nuonuoko pethalieketuo la,” si.

¹¹Ru niekoe penuo vor di kijüthou phi nu thalie, mu kijüthou-u zeiboui, kimhoukeshü chü mu thedzükezei chü di tu kho tei meluo tso.

¹²Sitse Jihova miu donu nu nie ki pu. Nie die pfhephrau si, derei mharhi puorei ngu mo, pfhephra puo rübei zo.

¹³Mu puoe puo dietseidiekho-u se nie pesishü, nie bu chüüzenu di diekhashü, süu diekhakeshü kerko;[5] mu puoe tsiekra kenie geinu süko thushü.

¹⁴Mu Jihovae süki a bu thezhoko mu diekhakeshüko se nieko pethashünu di a ki diekhashü, nie bu nie-e vo di pevielieketuo kijüu nu süko chüüzelieketuo la.

¹⁵Süla nie kireiliecie, Jihovae Horeb nu miu donu nu nie ki diepukeshü nhie nie mharhi puorei ngukemo la,

¹⁶nie thuo nie la miarhi huo rhi di mha kesuo chüwa molieketuo la menuoliecie, thepfumia rhi rei thenumia rhi rei,

¹⁷kijü nu khunuo kehoupuo rhi rei, teikhrie gei pruoketuo puoshü kenyi pera rhi rei,

¹⁸kijü gei gouketuo kehoupuo rhi rei, kijü khro dzü nu ketuo khuo kehoupuo rhi rei.

¹⁹Mu nie nie mhi pie tei mehoshü di nie seketsipie nie bu niaki morei khrü morei themvüko mu teigeiketuo kro pete ngushü di, Jihovae khapie teiko khro themia pete tsükeshüko rüsuo mu theketa molieketuo la menuoliecie.

²⁰Derei Jihovae thie ha tuoi nieko pie puo vie zokecü themia chüketuo la, Ijipt nunu thegi kelho khou nunu nie ze parlie.

²¹Siro Jihova nie la a gei puo nei mota di puoe a bu Jordan cielie lhoü di; mu a bu Jihova nie Kepenuopfü se nie phruokeshü kijüu nu le lhoü di rüsewa.

²²Kekreilamonyü a we kijü hau nunu siatatuo, a we Jordan ciepra suote; derei nie we pra di kijü kevi süu pevielietuo.

²³Süla nie kireilie, Jihova nie Kepenuopfü nie ze dietseidiekhoko rükra mota hie di, Jihova nie Kepenuopfü nie bu chü hienukeshü mha kehoupuorei rhita molieketuo la.

²⁴Jihova nie Kepenuopfü mha the pejükecü mi puo, urokenyi Kepenuopfü puo zokecü la.

²⁵Nie nuonuo mu nie tsunuo nyilie di kijü süu nu lhou kevavuo di nie-e mha kehoupuorei rhi di chüzhü kemo chü mu Jihova nie Kepenuopfü mhodzünu mha kesuo chü di puo neikemo chü ro,

²⁶nie Jordan tse pra di pevietuoükezhü kijüu nunu kaüjü mhataketuo, a thie tei mu kijü kiepie a zhapu chüya, nie sünu lhou pechalie lho, derei nie peka lotsowatuo.

²⁷Siro Jihova nie chüpie themiako donu cürewatuo, sidi Jihova nie whuopie seyie kekrei donu shü di nie bu mia donu ketsa kro chü di lhoutuo.

²⁸Sidi nie sünu sei mu ketsie se chükecü, themia dzie se chükecü, mhangulie mo, mhapu si mo, mhachülie mo, mhare sikemo terhuomia theketuo.

²⁹Derei sünunu noe Jihova n Kepenuopfü pfhütuo, mu no n nou pete se, n ruopfü pete se puo pfhü ro puo ngulietuo.

³⁰No kemezhiekecü nu keba ki, mu mha hako n gei phirkelie nhie, noe Jihova n Kepenuopfü ki la vortuo, di puo die zelietuo.

³¹Jihova n Kepenuopfü sü mia ngumezhieyakezha Kepenuopfü puo zokecü la; puoe n khawalie lho morei n pekawalie lho morei puoe rüse di n puonuoko ze dietseidiekhokeshüu rükra motalie lho.

³²Mu tsie no voketa teisozhako ketsoshülie, Jihovae themia chüpie kijü geikeshü teiso yawinu siro tei tietsa nu kekreitsa ketso mia ketsolie, mha kezha haikecü tuo mo kishi morei mhara nu puo dze rei si mo.

³³Themia huo nieko sikeshü mhiei mi nunu terhuo mia pfhe sishü di rheibakecü huo nyi mo ki shi?

³⁴Morei Jihova nie Kepenuopfü Ijipt nu nie mhi kinu nie la mha pete chükeshü tuoi terhuo puorei seyie kekrei puo donu nu mhadojükecü, zasi, ungothoko, mu terhüchü di kekuo dzie se, mu puo bou yhapie, mu kemeriekecü chü di puo thuo puo la seyie puo zekelie ba me?

³⁵Nie bu Jihovae Ukepenuopfü zoükecü silieketuo la süu chüpie nie pengushü; puo sie kekrei puorei jü.

³⁶Nie pethashüketuo la teigei nu puoe puo pfhe pie nie bu sishü, mu kijü geinu puoe nie bu puo mi kezhau ngushü, mu nie-e miu donu nu puo dieko sishü.

³⁷Puoe nie puonuoko khrie di uko se uko yiemia, nie kedalie, di puo thuo puo sa di puo kekuo kezha se di Ijipt nunu nieko ze parlie.

³⁸Mu tsie ha tuoi uko kijü khapie nieko phruoketuo la nieko ki zha, mu kuo phikecü seyieko whuowa.

³⁹Süla thie si mu le toulie, di süu pie nie nou shülie, Jihovae tei pesogei mu kijü pekhro nu Ukepenuopfü zoücü, kekrei puorei jü,

⁴⁰Süla nie puo zhoko mu puo diekhakeshüko a thie pie nie ki pukeshüko zelie morosuo, nie mu nie sie vorkezhü nuonuoko bu vi zo volieketuo; mu Jihova nie Kepenuopfüe kechachie se nie tsükewa kijüu nu nie kelhouzha bu chalieketuo la.

⁴¹Süsie Mosae Jordan tsekepra niathutsa nadi se kha kreipie bawa.

⁴²Mia biekhrikewamia, kengumvütuo mo mu u kenyü chü mo di u zanuomia biekhrikewamia bu ta nadi hako huonu vo di u kerheiro kelalieketuo la.

⁴³Rüna süko rayha kijü, kethekhra gei keba Bezer, Reubenmiako la, Gilid nu keba Ramoth Gadmiako la, mu Bashan nu keba Golan Manassehko la.

⁴⁴Hauha Mosae Israel nuonuoko mhodzünu khakeshü thezho-u:

⁴⁵Hako Mosae Israel nuonuoko Ijipt nunu kepar ki uko ki pukeshü zhapuko, thezhoko, mu diekhakeshüko.

⁴⁶Mosa mu Israel nuonuokoe Ijipt nunu kepar ki puoe penyükewau Heshbon nu keba Amorko kediu Sihon kijü, Jordan tsekepra Bet-peor rücie razhau nu.

⁴⁷Sidi ukoe puo kijü mu Bashan kediu Og kijü lielie, hanieha Jordan niathutsa keba Amorko kedi nie zo.

⁴⁸Arnon Rü khie Aroer nunu Sirion Kijüthou (süu Hermon) ketso,

⁴⁹Mu Jordan tsekepra tsiekhie khro Araba dzükezha ketso.