Read Angami Naga Pulakeshüzho 5 Bible Online

Pulakeshüzho 5 - Angami Naga bible

Pulakeshüzho 5

¹Süsie Mosae Israelko pete kieshü di, uko ki: Harie Israelko, rünyüliecie, thezhoko mu diekhakeshüko a thie nieko nyie kinu pukeshüko, süko silie, mu menuo di medzilie,

²Jihova úko Kepenuopfü Horeb geinu u ze dietseidiekhoshü.

³Dietseidiekho süu Jihova u puonuoko ze chü mo derei u ze chü, u pete thie ketso rheikebako ze chüwe.

⁴Jihova kijüthou gei mi donu nu mhotsou nie ze kerüchü.

⁵(Mu a süki Jihova die pie nieko pesishütuoü di Jihova mu nieko donu thalie; mu niekoe mi la michieta, di niekoe kijüthou-u gei kho moketa la) Mu puoe sie;

⁶Ae Jihova nie Kepenuopfü, Ijipt kijü nunu, kediekechü ki nunu nieko ze parkeshüu.

⁷Nie-e a kemo terhuo kekrei puorei nyilie lho.

⁸Nie thuo nie la rhikecü, tei pesogei keba mhiekecü kehoupuorei, morei kijü khro keba mhiekecü, morei kijü khro dzü nu keba mhiekecü puorei nie bu rhi selie lho.

⁹Nie nerhu tsu süko rüsuo morei süko lie chülie lho, ae Jihova nie Kepenuopfü puo rokenyi Kepenuopfü puo zo, u puonuoko kejo la phou se phou dia ketso rei a mecükecüko gei siazha khashüya,

¹⁰derei a khrie mu a diekhakeshüko zeyakezhamia phou thenyie gei kekhrie ketho se pekieshüya.

¹¹Nie-e Jihova nie Kepenuopfü za kemethuo nu se suo. Jihovae kemethuo nu puo za seyakecüu pejo mo di khawa lho.

¹²Jihova nie Kepenuopfü nie ki diekhakeshü tuoi, sabat se kemesa di zelie.

¹³Zha sorou no mhachü di n tho pete chütuo;

¹⁴derei zha thenie nhie we Jihova nie Kepenuopfü la sabat te, sünhie nie mhatho puorei chü suo, nie rei, nie nuo thenu rei thepfu rei morei nie theke thenu rei thepfu rei, nie thudo rei, nie gada rei, morei nie kiri, morei chazoumia nie cahou nu kebamia bu rei mhachü suo, nie theke thenu rei thepfu rei nie tuoi rüleilieketuo la.

¹⁵Nie rei Ijipt kijü nu mia theke chükecü, mu Jihova nie Kepenuopfü sünunu puo dzie kekuo mu puo bou yha se n ze parkelie rükratuo morosuo, süla Jihova n Kepenuopfü nie bu sabat zhau zenu di diekhashü.

¹⁶Jihova n Kepenuopfü n ki diekhakeshü tuoi, n puo n zuo rhulie; Jihova n Kepenuopfü se n ketsü kijüu nu lhou cha mu mezhü di lhoulieketuo la.

¹⁷No mia dukhri lho.

¹⁸Morei pieü chü lho.

¹⁹Morei rügu lho.

²⁰Morei n zanuomia ngukemvü ketijü zhapu chü lho.

²¹Morei n zanuou kimia mehou lho. Morei puo ki puo lie, puo theke thenu rei thepfu rei puo thudo, morei puo gada morei n zanuou vie kehoupuorei mehou lho.

²²Die hako Jihova kijüthou gei mi donu nu, kimhou, mu zeibouikecü donu nu, puo pfhe peto di nie kehou pete ki pushü; mu puoe kekrei pu sa mo. Mu puoe tsiekra kenie geinu thulie di pie a tsüshü.

²³Siro kezei nunu, kijüthou-u gei mitukeba nunu mhapfhe puo si tse, nieko donu phichüko, seyie krütako a ki vor;

²⁴mu nie-e sie, “Harie, Jihova úko Kepenuopfü puo kesokezie mu puo kezha pie hie pengushüte, mu hie miu donu nu puo pfhe sishüte; hie thie Ukepenuopfü themia ze kerüchü zorei themia rhei balieyacü ngushüte.

²⁵Süla hie kidi siatatuo ga? Mi kezha hau u the pejüwaketuo la, hie Jihova úko Kepenuopfü pfhe si la ro, siata zotuo.

²⁶Kekreilamonyü kerhei Kepenuopfü mi donu nu diepukeshü hie we sikecü mhie si di rhei ba zokecü chüüphou chükepfü donu sumia ba ga?

²⁷Penuo phi di Jihova úko Kepenuopfü pushüketuoko rünyüliecie; sidi Jihova úko Kepenuopfü n ki pushüketuo pete hieki pu lashücie; siro hie-e süu rünyü di chülietuo” sishü.

²⁸Mu Jihovae nieko a ki kepu dieko sishü; sidi Jihova sie a ki: “A themia hako die, uko n ki kepuko sishüte; uko kepuko pete mezhü zo.

²⁹He-i, uko bu haikecü noule se sei di a prei mu a diekhakeshüko zeücüwe, uko thuo rei mu uko nuonuoko rei kechachie lhou rüülie tuo muru!

³⁰Phi di uko ki, ‘Nie pfheki nu la votalie’ siwalie.

³¹Derei no we a khieki thalie, siro ae diekhakeshüko mu thezhoko, mu kepethadieko n bu pupie uko kieketuoko se n ki pushütuo, uko bu ae se uko tsüketuo kijüu nu chüüze tuolieketuo la” sishü.

³²Süla Jihova nie Kepenuopfü nie ki diekhakeshü tuoi chülieketuo la menuolie morosuo; nie rürei thezatsa morei thevitsa prata suo.

³³Nie Jihova nie Kepenuopfü nie ki diekhakeshü chau nu tuolie ro, nie rheilietuo, mu nie kijüu pevietuoükezhüu nu lhou chalietuo.