Read Angami Naga Pulakeshüzho 6 Bible Online

Pulakeshüzho 6 - Angami Naga bible

Pulakeshüzho 6

¹Siro nie bu vo pevielietuoükezhü kijüu nu chüüzeketuo la Jihovae a bu pie nie pethashünu di diekhakeshü, thezho mu chatha khakeshüko hako;

²nie mu nie nuonuo, tsiu nie tsunuo bu puo zhoko mu diekhakeshü pete nie kelhouchie ze di Jihova nie Kepenuopfü preituolieketuo la; mu nie bu rheichalieketuo la.

³Süla harie Israel, rünyüliecie, di süko chüüzetuoü menuoliecie, Jihova nie puonuoko Kepenuopfüe nie ki phrakeshü tuoi mithunudzü mu mepfhidzü kekru kijüu nu nie vo lhoulietuo mu kruo philietuo.

⁴Rünyüliecie, harie Israel, Jihova úko Kepenuopfü Jihova puo zo.

⁵Mu noe n melou pete se, n ruopfü pete se mu n kekuo pete se Jihova n Kepenuopfü khrietuo.

⁶A thie n ki diekhakeshüko pie n melou nu tuotuo.

⁷No n pecü se n nuonuo pethatuo, mu no n kinu ba rei tsu rei, cha nu tuo rei, zhütsu rei mu sie rei süko dze putuo zotuo.

⁸Noe zasi chüketuo la süko pie n dzie gei khepfütuo; mu süko pie n mhinie donu n teikhie rütso chütuo.

⁹No süko thupie n kikha coko gei mu n careko gei shütuo.

¹⁰Siro Jihova n Kepenuopfüe n puonuo, Abraham, Isak mu Jakob tsütuoü di rüsekeshü kijünu n ze vorshü; noe chükemo rüna kezha kevi bakecü,

¹¹nie-e chükemo mha doneiü chü pie tshupfü keba kiko, noe thie kemo dzükhou, noe pelhoushü kemo lie mu oliv zie, sidi noe cü pevülie tse,

¹²Jihova, Ijipt nunu, kediekechü kiu nunu n ze parkeshüu rükra mota molieketuo la menuoliecie.

¹³No Jihova n Kepenuopfü preituo, puo lie chütuo, mu puo za rübei se rüsetuo.

¹⁴No terhuo kekrei nie khie nie mhou keba themia rhuoko siemedzilie lho,

¹⁵kekreilamonyü nie donu keba Jihova nie Kepenuopfü puo rokenyi puo zo. Jihova n Kepenuopfü nouyieu n gei sierta di puo bu kijüu zie geinu n pekawa rei si mo mu.

¹⁶Nie Jihova nie Kepenuopfü kedolie lho, nie Masa nu puo kedokecü tuoi.

¹⁷Nie Jihova nie Kepenuopfü diekhakeshüko, mu zhapudieko, mu thezhoko, nie pecü se di ze morosuo.

¹⁸Nie Jihova mhingu ki mezhü mu viükecüu chülie morosuo, Jihova nie puonuoko ki rüse di khakeshü kijü keviu nu lelie di pevielie mu nie vi zo volieketuo la.

¹⁹Mu Jihova phrakeshü mhiei nie ngumvümia pete whuowatuo.

²⁰Siro thiesie n nuoe sie, “Jihova úko Kepenuopfü n ki diekhakeshü zhapuko, thezhoko mu kepethadieko ca kedipuo ga?” idi ketso ro.

²¹Noe sie n nuo ki, “Hie Ijipt nu Faro die chütuo, ru Jihova puo dzie kuo sekecü puo pie Ijipt nunu hie shüphralie;

²²mu Jihova hie mhingu kinu Ijipt gei, Faro mu puo kinumia pete gei zasi kemeriecü mu ungomhathoko tsiu kepechü kere se chü pekieshü,

²³sidi puoe sünunu u ze parlie, u ze vo, di u puonuoko ki rüsekeshü kijüu pie u tsütuoü di.

²⁴Mu Jihova u bu thezho hako pete chüüzenu diekhakeshüu sü Jihova úko Kepenuopfü preilie, puo pete nu u dzevi la, puoe thie kemhie u perhei se balieketuo la.

²⁵Mu we menuo di Jihova úko Kepenuopfü mhodzünu diekhakeshü hau, puo u ki diekhakeshüko chüüzelie ro süu pie u miatho chütuo” si.