Read Angami Naga Pulakeshüzho 7 Bible Online

Pulakeshüzho 7 - Angami Naga bible

Pulakeshüzho 7

¹Jihova nie Kepenuopfüe nie pevielietuoü di lekezhü kijüu nu nie ze vorshü di nie mhodzünu seyie kekra, Hitko, Girgashko, Amorko, Kananko, Perizko, Hivko, Jebusko, nie ki zha mu kuo sekecü seyie thenieko whuo kemesashü di,

²uko pie nie tsüshü di nie uko penyüwa ro, nie uko peka tseiwa morosuo. Nie uko ze dietseidiekho puo rei chü suo, mu yopuo rei uko ngumezhieshü suo.

³Nie nuopfüko pie uko nuoko ki penyishü mu nie nuo thepfuko la uko nuopfüko lie idi uko ze kesekerikecü chü suo zo,

⁴kekreilamonyü ukoe nie nuo khriesako kewhipie uko bu a medzi mo di terhuo kekrei rüsuota zotuo, sitse Jihova noupfhüu nie gei tuvütuo, sidi puoe nie peka mhawatuo.

⁵Derei nie uko gei hakemhie chütuo, nie uko ruosuobako bierhuowatuo, mu uko tsieseko dutshedutsha phawatuo, mu uko Asherako wiwatuo, mu uko miarhiko mipie thewatuo.

⁶Kekreilamonyü nie-e Ukepenuopfü mhodzünu seyie kemesa puokecü la, Jihova nie Kepenuopfüe kijü nu themia kekrei pete donu nu nie kedapie puo kinyi mu puo themia chülieketa la.

⁷Jihova puo kekhrie pie nie gei keshü mu nie kedakelie ha, nie mia kekreimia ki krakuo mu ikecü la mo, nie-e themia donu ketsatho kroyo puo zo.

⁸Derei Jihova nie khriekecü la, mu puo nie puonuoko ki rüsekeshüu khapie bakecü la, Jihovae puo dzie kuo phikecü pie nie zeparlie, di kediekechü kiu nunu, Ijipt kediu Faro dzie nunu nie rhalie.

⁹Süla Jihova nie Kepenuopfü sü Ukepenuopfü zocü siliecie, pelelie kesü Kepenuopfü, puo khrie mu puo diezeyakezhamia gei we phou nyie puo ketso rei puo dietseidiekho-u mu puo kekhrie ketho khapie baya,

¹⁰mu mhotsou puo ngukemecü zhakhra chüshü di uko pekawaya, puoe puo ngukemecüu zhakhra chüshü menuolie lho, puoe mhotsou puo zhakhra chüshütuo.

¹¹Süla thie a n ki diekhakeshü tuoi diekhakeshüko, thezhoko, mu kepetha dieko chüüze menuolie morosuo.

¹²Siro nie-e kepetha die hako rünyü mu chüüzelie ro, Jihova nie Kepenuopfüe nie puonuoko gei dietseidiekho-u mu puo kekhrie ketho-u khapie batuoü di rüsekeshüu puoe nie gei khapie ba zotuo;

¹³puoe n khrietuo, japie n tsütuo, mu n chü pekruoshütuo; puoe n puonuoko tsütuoü di rüsekeshü kijüu nu japie n phou geinu kepar siu, mu n kijü siu, n lha mu n khubedzü mu n tier, n kicükiri mu n kuo mu temvü kro-u pete chü pekrashütuo.

¹⁴Nie-e themia pete mho thejapfütuo nie donu thepfumia rei thenumia rei morei nie kiri donu rei nuojü jütuo.

¹⁵Mu Jihova n kinu kechükenyü sephretatuo, mu puoe no sikecü Ijipt nu kechü kesuoko puo rei pie n gei shülie lho, derei puoe süko pie n ngukemecüko pete gei shütuo.

¹⁶Jihova nie Kepenuopfü khapie nie dzienu keshü themia pete pekawatuo, uko ngumezhie suo, morei uko rhuoko rüsuolie lho, süu nie la ciephrie puo chütatuokecü la.

¹⁷Nie-e nie nou nu, “Seyie hako a ki zhakuo, a kikidi uko vie lielietuo mu?” iba rei,

¹⁸nie uko preita suo, derei Jihova nie Kepenuopfüe Faro gei mu Ijipt pete gei kedipuo chüshü shikecü rükrashü morosuo,

¹⁹kemezhiekecü kezha kevor nie mhi pie kenguko, zasiko, u ngoko, mu Jihova nie Kepenuopfü puo dzie kekuo mu puo bou yhapie nie ze kepar-u rükralie. Jihova nie Kepenuopfü sükemhie chüpie no uko preikebako pete gei shütuo.

²⁰Sizomonyü Jihova n Kepenuopfü thepetheruo ketsepie uko donu shü di rheiba di u kinu rüshükebako pekawa.

²¹Noe uko prei hie, Jihova n Kepenuopfü zha mu kemeriekecü Kepenuopfü, puo nie donu bakecü la.

²²Jihova nie Kepenuopfü seyie hako rülili di n mhodzünu nu whuowatuo; no vapuochü uko pejüwalie kenjü, nhachüko n la krathortalie vikecü la.

²³Derei Jihova n Kepenuopfü uko khapie n tsüshütuo, di uko pekawa kemochie uko bie kemide phishütuo.

²⁴Mu puoe uko kediko khapie n dzie nu shütuo, mu no teikhro nu uko za pejüwatuo; no uko pekawa kemochie miapuorei n mhodzü thalie kenjü.

²⁵Noe uko rhuo miarhiko mi pie thewatuo, nie süko gei keba suna rei rakachü rei mehou suo, morei nie thuo nie la süko lielie suo, süu pie n mawaketuo la; süu we Jihova n Kepenuopfü la we mha kerütse zokecü la.

²⁶Mu noe mha kerütsekecü pie n kinu vor di süu tuoi rüsepfüta suo; no süu rütserücie bei zo morosuo, süue rüsekepfü vie zokecü la.