Read Angami Naga Pulakeshüzho 8 Bible Online

Pulakeshüzho 8 - Angami Naga bible

Pulakeshüzho 8

¹Nie le Jihova pie nie puonuoko tsütuoü rüsekeshü kijü pevielie di lhou mu kruolieketuo la, a thie nie ki diekhakeshü pete menuo di chüüzelie morosuo.

²Mu puoe n chükerünuoshütuoü mu n dojü mu n nou kedipuo ba shikecü sishüketuo la Jihova n Kepenuopfü mhotsa nu cie hiedia n zetuokecü no rükra setuoliecie.

³Nie bu themia ha niakhrüda rübei geinu lhouya mo derei Jihova tie nunu kepar die kehoupuo geinu rei lhouyakecü silieketuo la, puoe nie chükerünuo mu nie chükemesashü, di nie siya kemo, nie puonuo rei siya kemo Manna pie nie vachüshü.

⁴Cie hiedia hako nu, nie pfhenei nie geinu rüprieta mo, mu nie phi rümieta mo.

⁵Süla n nou nu siliecie, themia puoe puo nuou pethayakecü tuoi Jihova n pethaya.

⁶Süla noe puo cha nu tuo mu puo prei di Jihova nie Kepenuopfü diekhakeshüko zeliecie.

⁷Jihova nie Kepenuopfü n ze kijü kevi puo, razhako nu mu nie kijüthouko nu rücü dzü, dzüluo, dzü kekru kijü puo nu vorkechü la.

⁸Thoulha mu barli lha, khube mu chiede mu turaü kelhou kijü Olivbo mu mepfhidzü kijü,

⁹tsamere mo di niekhrüda cüketuo kijü, no mhapuorei tsopfhülie kelho, puo tsieko thegi zokecü kijü mu puo kijükhruko gei mese thielie kevi kijü.

¹⁰Mu noe cü di pevülie ro Jihova n Kepenuopfü thezietuo, puoe kijü keviu pie n ketsü la.

¹¹Jihova n Kepenuopfü diekhakeshüko puo kepethadieko mu puo zhoko ae thie diekhapie n ketsüko rükra mota molieketuo la, menuoliecie.

¹²Simo liro, noe cü di pevülie, mu ki kevi chülie di süko nu balie,

¹³mu n thukroko mu n kuokroko kruolie mu n rakachü mu suna kralie mu n vie pete kralie ro,

¹⁴n nou kemiavi sieta di, Jihova n Kepenuopfü Ijipt kijü nunu, kedie chükeba kiu nunu n ze parkeshü rükra motalie vi.

¹⁵Puoe nhatsa zha mu kemeriekecü nunu, tinyhü kerhu[6] mu seba kenyi kijü mu dzü kejü kijü keso nunu n ze parshü, puoe tsiekrie nunu dzü se par n tsü.

¹⁶Nhatsa nu rei n puonuokoe siya kemo Manna pie n vachüshü, puoe n chükerünuoshü mu n dojüshü di thelatsa n la kevi chüshüketuo la.

¹⁷Siro no n nou kinu; “A kekuo mu a dzie kekuo thuo kinyi hau pfhülie” ita molieketuo la menuoliecie.

¹⁸Noe Jihova n Kepenuopfü rükra morosuo, puoe thie ha tuoi, n puonuoko ki rüse di puo dietseidiekho khakeshüu chüshüketuo la n bu ngulieketuo la rei kekuo pie n tsüshüya zokecü la.

¹⁹Mu noe Jihova n Kepenuopfü rükra mota di terhuo kekrei sie medzita ro, nie kaüjüta zotuokecü a thie nie tarhoshü ho.

²⁰Jihova nie mhodzü seyieko bu kaüjüketa tuoi nie rei kaüjütatuo. Jihova nie Kepenuopfü pfhe zekemo sie.