Read Angami Naga Pulakeshüzho 9 Bible Online

Pulakeshüzho 9 - Angami Naga bible

Pulakeshüzho 9

¹Rünyüliecie, he-i Israel, no thie Jordan cietuoüzhie, le di seyie n ki zha mu kuokuokecü, nadi kezhako mu dahou hou sekho tei tsokebako lielietuoü di,

²no sikeba Anak nuonuoko, themia zha mu chakecü kro puo, no uko dze “Supuonie Anak nuomia mhodzü thalie ta?” idi kepu sikecüko vie lielietuoü di.

³Süla thie siliecie, nie mha the kepejü mi puo tuoi, nie mhodzünu vozhükecüu sü, Jihova n Kepenuopfü zo, puo n mhodzünu nu uko pekawa mu uko penyüwatuo, sidi Jihovae nie ki phrakeshü tuoi, noe uko whuowa di uko biepejü mhawatuo.

⁴Jihova n Kepenuopfü n mhodzü uko khuphrakewa sie n thuo n nou nu “A kemiatho la Jihova a ze vor a bu kijü hau pebalie;” ikecü leta hiecie, kekreilamonyü seyie hako kerüzhü la Jihova n mhodzünu nu uko whuowazhie.

⁵No kijü hau pebalietuoüzhükecü n mezhü geinu mo morei n nou kemezhü la mo, derei seyie hako kerüzhü la Jihova n Kepenuopfü n mhodzünu nu uko whuowazhie, sidi puoe n puonuoko, Abraham ki, Isak ki, mu Jakob ki, rüsekeshü dieu chü kemeteishütuoü di.

⁶Süla siliecie, Jihova n Kepenuopfü kijü kevi hau n bu wetuoü di pie n tsükeshü n kevi la mo zo, noe n nou kere themia kro puo zo eru.

⁷No nhatsa nu Jihova n Kepenuopfü neikemo chüpie puo nou vakemeyiecü rükralie, mu rükra mota hie, noe Ijipt kijü nunu tuo parkelie teisozhanhie nu thechü hanu vorkelie ketso noe Jihova perhie petsou tuo tso.

⁸Horeb nu zo rei noe Jihova nou vakemeyieshü, di Jihova bu puo neimo vo n pekawatuoü zo sie.

⁹A ketsie tsiekra, Jihova nie ze dietseidiekhokecü tsiekra nie pielietuoü di kijüthou gei khokecü ki, a kijüthou gei teisozha hiedia mu teizeizha hiedia ba; a niekhrüda cü rei mo dzü rei krie mo.

¹⁰Mu Jihova Ukepenuopfü dziekinuo thuo puo gei thukeshü tsiekra nie pie a tsüshü, mu sünie gei Jihovae mechü kehou nhie kijüthou gei mi donunu n ki pukeshü die peteko tuo.

¹¹Mu teisozha hiedia mu teizeizha hiedia tseiketa sie, Jihovae tsiekra nie, dietseidiekho tsiekra nie pie a tsü.

¹²Sidi Jihova sie a ki, “Sielie, di hanu nu ke mhatalie, n themia, noe Ijipt nunu zekeparko mha kesuo chü bate; ukoe a uko ki thakeshü chau nunu rürei mhate, ukoe uko thuo uko la mharhi puo lho sebate” si.

¹³Sizomonyü Jihovae a ki, “Ae themia hako ngushüte, mu harie, ukoe unou khrü sekecü kro puo,

¹⁴a kebvü mo di a bu teikhro uko pekawa mu uko za vawacie, sitse ae n chüpie uko ki zha mu kuokecü seyie puo chüshütuo” si.

¹⁵Süla ae rüreilie di kijüthou geinu ker, mu kijüthou nu mitu bata, mu dietseidiekho tsiekra nie a dzie nu tuo.

¹⁶Mu ae meho sie ru, harie nie-e Jihova nie Kepenuopfü gei phoumawate, di mha lhopie thudonuo puo chü seba, nie-e Jihova diekhakeshü chau nunu rürei mhate.

¹⁷Süla ae tsiekra nie pielie, di a dzienie nunu kelhoushü, di nieko mhingu kinu sünie biephrowa.

¹⁸Sitse ae hadzü tuoi Jihova mhodzünu teisozha hiedia mu teizeizha hiedia zerepfü zhü; niekoe Jihova mhodzünu mha kesuo chü, puo neikemo pete chü di phoumakewa pete la a niekhrüda rei cü mo, dzü rei krie mo.

¹⁹Kekreilamonyü ae Jihova nieko gei puo nei mo mu puo noumeyie sie di nieko pekakewa preita. Derei Jihova süu va rei a pfhe rünyüshü.

²⁰Mu Jihovae Aron gei puo neimo mo vo puo pekakewa le sieta zo: sidi ae süu va rei Aron la rei cha.

²¹Sidi ae kephouma vie niekoe chükelie thudonuoyo pielie di mi nu thewa, di süu bietshiewa, getshie kememhie pie nyophe mhiewa sidi ae puo chuko pie kijüthou geinu krukepar rücü nu shüwa.

²²Siro Tabera nu rei, Masa nu mu Kibroth-hatava nu rei, niekoe Jihova nou vakemeyieshü.

²³Mu Jihova Kadesh-barnia nunu nie ketse di sie, “Kho di a kijü se n ketsüu lielie” ikeshü ki, niekoe Jihova nie Kepenuopfü diekhakeshüu perhie petsouta, di puo pele mo mu puo pfhe rünyü mota.

²⁴A nieko sikelie nhie nu niekoe Jihova perhie petsou tuo zo.

²⁵Süla ae teisozha hiedia mu teizeizha hiedia hako Jihova mhodzü zerepfü zhü, Jihova nieko pekawatuoü keta la.

²⁶Sitse ae Jihova ki cha di sie, “He-i Kepenuopfü Jihova, n themiako mu n kayieko, no n kezha nunu uko rhakelieko, n kekuo dzie se Ijipt nunu ze parkelieko pekawa hiecie.

²⁷N thekeko, Abraham, Isak mu Jakob rükrashücie: themia hako noukere, morei uko kerüzhü morei uko kephouma mehota hiecie.

²⁸Moro noe rüna puo nunu uko ze parketa rünau nu themiako bu sie, ‘Jihova kijü pie uko tsütuoü di phrakeshü nu uko ze vor tsolie kenjüketa la, mu puoe uko ngumecükecü la, puoe nhatsa nunu uko bie khriwatuoü di uko ze kepar zo’ sitatie.

²⁹Uko sü n thuo n kekuo kezha mu n bou yhapie ze parkelie mu n kayieko zo.”