Read Angami Naga Johan 1 Bible Online

Johan 1 - Angami Naga bible

Johan 1

¹Sietsenu Dieu tuo, mu Dieu Ukepenuopfü ze tuo, mu Dieu Ukepenuopfü zo.

²Puoe sietsenu Ukepenuopfü ze tuo.

³Puo geinu mha pete chülie, mu chükelieko puorei puo sa mo di chü mo. Lhou parkelieu,

⁴puo gei kerhei tuo, mu kerheiro süu themia pete kezieu zo.

⁵Kezieu kezei va pezie tuoya mu kezeiu süu soulie mo.

⁶Ukepenuopfüe mia puo ketseshü, puo zae Johan.

⁷Puo kezieu zhapu chütuoü vor, puo geinu mia pete bu pelelieketuo la.

⁸Puo we kezieu mo, derei puo kezieu zhapu chütuoü kevor zo.

⁹Kezie ketho süu mia pete va pezietuoü kijü nu vor.

¹⁰Puo kijü nu tuo, mu puo geinu kijü chülie ürei kijüu puo silie mo.

¹¹Puo thuo puo vieko ki vor,[1] derei puo themiako puo zelie mo.

¹²Sirei puo zekelie khe, puo za nunu pelekelieko, puo süko bu Ukepenuopfü nuonuo chütaketuo kekuo khashüwate;

¹³sükoe chüüzie nunu, morei themia medo nunu monyü Ukepenuopfü nunu penuokelie zo.

¹⁴Siro Dieu chüüphou mevi vor hie donu lhou, mu hie puo zayieu, ngukemezhie mu ketho bu tshukepfü, puo nuo pfuliu zo ükecü zayieu ngu.

¹⁵(Johan puo zhapu chü shiekhoui di sie, “ ‘Mia puo a sie vorzhü, derei puo a ki zhakuo, a penuokelie mhodzü puo tuota zokecü la’ idi a puo dze kepuu sü hau zo” sita.)

¹⁶Puo tshupfüketuo geinu we ngukemezhie sie rei ngukemezhie ngu phrelie.

¹⁷Mosa geinu thezho-u khashü; derei ngukemezhie mu ketho-u we Jisu Khrista geinu zo.

¹⁸Miapuorei mhakipuorei Ukepenuopfü ngu mo. Süu Ukepenuopfü Nuo pfuliu, puo Puo ze kenouliethokecüu[2] thuo puou pie mia bu puo sikelie chükeshü zo.

¹⁹Siro Jerusalem nu Judakoe zievoko mu Leviko ketsepie Johan ki shü di puo ki, “No supuo ga?” idi ketsokeshü ki Johan-e zhapu chükeshü die haha zo.

²⁰Süki puo mha pushü mu phra mvüta mo zo, derei sie, “A Khristau mo ho” idi pu.

²¹Sitse uko puo ki, “Siro ki-a? No Elija me?” ita. Puo sie, “A süu mo” si. Süsie “No siedzekesimia me?” ita. Puo sie, “Mo” ishü.

²²Sitse uko puo ki, “Siro no supuo ga? Hie ketsekeshümia ki pu la morosuo mu. No n thuo n üse supuo üya mu? ilata.

²³Sitse puo sie, “Mia rayha nu shiekhoui di, ‘Nieko Niepuu cha chü kemezhüliecie’ iketuo pfheu sü a zo” idi thiedzü siedzekesiu Isayae pupiezhü.

²⁴Sükoe Farisiko kinu ketseshü.

²⁵Sitse uko sie puo ki, “Noe Khrista rei mo, Elija rei mo, siedzekesiu rei mo üro, no kiüdi mia dzülu khashüya ga?” idi puo ketsota.

²⁶Johan sie uko ki, “A we dzü nunu mia dzülu khashüyakezha zo, derei nieko donu nieko puo si kemo puo tuo.

²⁷Puo a sie vorzhü, a puo phikou pha rei phreilie sü mo” sita.

²⁸Mha hako Johan mia dzülu khakeshü Jordan rüu khie niathutsa Bethani nunu chü.

²⁹Süsie nhie puo Jisu puo ki vorkezhü ngulie di sie, “Harie, kijüu kephouma chü setakezha Ukepenuopfü Kuonuou sü!

³⁰Hauha a puo dze pu di, ‘Mia puo a sie vorzhü mu puo a ki zhakuo, a penuokelie mhodzü puo tuota zokecü la’ ikeshüu zo.

³¹A thuo rei puo süu zo ükecü silie mota zo; derei puo pie Israelmia pesishüketuo la a dzü nunu mia dzülu khashü kevor zo” sita.

³²Mu Johan zhapu chü sa di, “Ruopfüu teigeinu mekhru mhiei ker di puo gei bakelie ngu.

³³Mu a rei puo silie mota zo, derei a ketsepie a bu dzü nu mia dzülu khashünukecüue sie a ki, ‘No Ruopfüu ker themiau gei bakelie ngulietuo, mu süu Kemesa Ruopfü nunu mia dzülu khashüketuou ho.’

³⁴A thuo süu nguwate, süla a nie ki puo Ukepenuopfü Nuou[3] zo ükecü zhapu chüya ho” sishü.

³⁵Süsie nhie Johan puo siedzimia kenie ze tha ru,

³⁶Jisu reketuo meho di, “Lerie, luu Ukepenuopfü Kuonuou zo” sita.

³⁷Sitse pethakelienie süu silie, sidi sie Jisu siemedzita.

³⁸Süla Jisu reipra unie puo siemedziketuo ngulie di sie, “Nnie kedipuo pfhüya ga?” idi ketso. Sitse unie sie puo ki, “Rabi (puoca Kepethau) no kirapuo baya ga?” sisie.

³⁹Puo unie ki, “Vor di mehocie” ishü. Sitse unie vo di puo kebachü ngulie; sidi unie sünhie puo ze bata. Süki thehesie keba dia meseta.

⁴⁰Siro Johan diepu si di puo siemedziketanie mia puo ro Simon Pitor siezeu Andria.

⁴¹Puo vo puo dzürieu Simon pfhülie rie di sie puo ki, “Hie Messiah nguliete” (Puoca kenhekelieu.)

⁴²Sidi puo Simon ze Jisu ki vorlie, sitse puo puo meho di sie, “No Johan Nuou Simon te ha. N üse Kefa (puoca Pitor[4]) ütuo” sishü.

⁴³Süsie nhie Jisu Galil nu voketuo rhülie. Sitse puo Filip ngulie di sie puo ki, “A siemedziliecie” sishü.

⁴⁴Mu Filip-e Bethsaidamia, Andria mu Pitor unie ramia.

⁴⁵Filip-e Nathaniel ngulie di puo ki, “Hie thiedzü Mosa Thezho nu mu siedzekesiko puo dze thupieketuou nguliete, puo Josef nuou Jisu Nazaret-u zo” sita.

⁴⁶Sitse Nathaniel sie puo ki, “Nazaret nunu mha kevi parlie vi me?” isi. Filip sie puo ki, “Vor di mehocie” ita.

⁴⁷Sitse Jisu Nathaniel puo ki vorkezhü ngu tse, puo dze pu di, “Haki Israelmia ketho, mha kese puorei puo gei tuo kemo puo vorzhie” sita.

⁴⁸Sitse Nathaniel puo ki, “No kimhie di a silie ga?” idi ketso. Sitse Jisu sie “Filip n kiekelie mhodzü no chiedebo khro keba ki a n nguwe” si.

⁴⁹Sitse Nathaniel puo ki, “Kepethau, no Ukepenuopfü Nuou zo! No Israel kediu zo!” sita.

⁵⁰Sitse Jisu puo ki, “No chiedebo-u khro keba ki a n nguwaketa pukeshü la no pelete me? No hau kirei mha kezha phi ngu satuo” sita.

⁵¹Sidi puo sie puo ki, “A nieko ki ketho-u puya, tei khrüshü di nieko bu Themia Nuou mho gei Ukepenuopfü dieliemiako khomuke keba ngutuo” sita.