Read Angami Naga Johan 10 Bible Online

Johan 10 - Angami Naga bible

Johan 10

¹“A nieko ki ketho-u puya, kehoupuorei careu ze tekuo bouu nu le mo di cha kekrei ze meli leyakezhamia kerügumia mu mia vie sekecümia zo.

²Careu ze di leyakezhau tekuoko kepfheu zo.

³Care kepfheu care khrüshü puo tsüya mu tekuoko puo pfhe silieya, puoe puo kuoko za kie di uko kieya, sidi chatha ze parshüya.

⁴Puo süko ze phre pralie ro süko mhodzü rie di uko shüta ze tuoya mu tekuoko rei puo siemedziya, kekreilamonyü sükoe puo pfhe siyakezha la.

⁵Süko kekreimia siemedzita monyü ta sümia therütaya, süko kekreimia pfhe siya kemo la” sita.

⁶Jisue uko ki dievi hau pushü, derei uko puo kepuca silie mota.

⁷Süla Jisu la sie uko ki, “A nieko ki pu toushütuo, a tekuoko careu zo.

⁸A mhodzü kevormia pete kerügumia mu mia vie sekecümia zo; süla tekuoko süko pfhe rünyü mote.

⁹A careu zo, kehoupuorei a geinu keleu kelalie zotuo, mu puo tuo ler mu tuo pra di puo ca ngulietuo.

¹⁰Kerügumia rügutuoü, mia dukhrituoü mu mha pekatuoücü la rübei voryakezha zo. A zowe süko bu kerhei ngulie mu u ketshukelhuo ngulieketuo la kevor zo.

¹¹“A tekuo kepfhe keviu zo, tekuo kepfhe keviue tekuoko la puo phou khashüya.

¹²Kuopfhemia kemo, mia bu puo zhakhrü zeketuou mu tekuoko puo vie kemo-u we socie vorkezhü ngukeshü ki puo tekuoko khawa di tataya; sidi socie bu tekuoko telie mu uko phruokecürewaya.

¹³Mia bu puo zhakhrü zeketuou tataya, kekreilamonyü puoe tekuoko rüli leya kemo la.

¹⁴A tekuo kepfhe keviu zo. A a vieko si mu a vieko rei a si ba,

¹⁵a Puou a si keba tuoi a rei a Puou si ba. Mu a we a kuoko la a phou khashütuoüzhie.

¹⁶A kuo kro hau nu ba kemo tekuo kekrei rei ba saluo. A süko rei ze vorlie morosuo, mu süko a pfhe rünyütuo. Sidi tekuo kro puo chü, kepfhe rei puotatuo.

¹⁷Puou a khrieya, kekreilamonyü a a phou khashütuoüzhü mu a süu ngu lalietuo.

¹⁸Miapuorei a kinu süu lielieya mo[20] a thuo a medota di süu khashütuoüzhü, mu a süu khashüketuo kekuo ba mu chü lalieketuo kekuo rei ba. A a Puou kinu chünukeshü hau ngulie.”

¹⁹Die hako la Judako chükho kekrei lawa.

²⁰Uko mia kekra sie, “Puo terhuokesuo zeya mu mecie mote! Kiüdi puo die rünyütuo ga?” sita.

²¹Kekreiko sie, “Die hako terhuokesuo bu u kebi zeketuomia die mo; kimhie di terhuokesuo puoe mhiciemia mhi chü pevishütuo ga?” sita.

²²Süki Jerusalem nu rüsuoki Chü kemesakecü nyiu nyi. Süu teisei ki ta,

²³mu Jisu rüsuokiu nu Solomon kifükhro ükezhau nu tuo vozhü.

²⁴Süla Judako vor puo houpfülie di puo ki, “No kichiepuo hie bu mhalelie kemo chü ba zotieya mu? No Khrista üliro hie ki pu kemesashücie” sita.

²⁵Sitse Jisu uko ki, “A nieko ki pushüwate, mu nieko pele mote. A a Puou za nu mhachüyakezhako sü a zhapuko zo,

²⁶derei nieko peleya mo, kekreilamonyü nieko a kuoko kemo la.

²⁷A kuoko a pfhe rünyüya. A süko si ba, mu uko a siemedziya.

²⁸A kechachie kerhei se uko tsüya, mu uko mhakipuorei katalie lho. Siro miapuorei a dzie nunu süko sesetalie lho.

²⁹Mhapuorei a Puoue khapie a tsükeshüu ki kezha jü mu miapuorei Puou dzie nunu süko sesetalie lho zo.

³⁰A mu Puou hienie sü puo zo” sishü.

³¹Süki Judako ketsie pie puo vatuoü lata.

³²Sitse Jisu sie uko ki, “A a Puou kinu kevor mhatho kevi kekra pie nieko kieshü. Nieko mha kiu la ketsie pie a vatuoüya ga?” sita.

³³Sitse uko la sie puo ki, “Mhatho keviko la hie ketsie pie n vatuoü tha mo, derei no Ukepenuopfü ketha die pute, kekreilamonyü no themia puo zo di n thuo n chüpie Ukepenuopfü üketa la” sita.

³⁴Jisu sie uko ki, “Nieko zho-u nu thupiekezhü, ‘A puya, nieko terhuomia zo’ isi mo me?

³⁵Ukepenuopfü die khapie tsüwaketako üse ‘terhuomia’ üdi pu zo, mu ketholeshü dieu bakelie jü zo,

³⁶Siro ‘A Ukepenuopfü Nuou zo’ ikeshü la niekoe Puou thuo keda kreilie di ketsepie kijü nu keshüu üse Ukepenuopfü thaü tuo le?

³⁷A a Puou mhathoko chüya mo liro, nieko a pele hie.

³⁸Derei a süko chüya liro, nieko thuo a pele morei, mhathoko we peleliecie, sitse niekoe Puou a nou ba mu a rei Puou nou bakecü silietuo,” sishü.

³⁹Sitse uko puo telietuoü lasie, derei puo uko dzie nunu tata.

⁴⁰Süsie puo lasie Jordan rü lutsakhie Johan-e therieki mia dzülupie mia ketsü thechüu nu vo di sünu bata.

⁴¹Süla themia kekra puo ki vor di sie, “Johan zowe zasi puorei chü mo, derei Johan themia hau dze kepu pete ketho phreta ze ha” si bata.

⁴²Sidi sünu themia kekra puo pelelie.