Read Angami Naga Johan 11 Bible Online

Johan 11 - Angami Naga bible

Johan 11

¹Mia puo za Lazar ükezhau Bethani nu lhou ru mhachülieta, hau Maria mu puo dzüriepfü Martha unie rünau

²Maria ha thiedzü tier kethengu pie Niepuu kenhe di puo tha pie puo phi sükeshüpfü; mu puo prüu Lazar mhachüzhü.

³Süla puo üpfünie mia ketsepie Jisu ki shü di, “Niepuu, no puo khrieyakezhau mhachüzhüte” sishü.

⁴Jisu die hau sikelie ki sie “Kechü hau kesia shie monyü Ukepenuopfü zayie mu sü geinu Ukepenuopfü Nuou bu zayie chülieketuo la zo” sita.

⁵Jisue Martha mu puo siezepfü tsiu Lazar uko khrie vor zo,

⁶siürei puo Lazar mhachü zhüketa dielieu sikelie sie rei zha kenie puo kebachüu nu ba sata.

⁷Süsienu puoe pethakelieko ki, “Úko Judia nu la vo khe” sita.

⁸Sitse puo pethakelieko sie, “Rabi, tsie kinu Judako sünu nu ketsiepie n vatuoü sie ze, mu no sünu la votuo le?” sita.

⁹Jisu sie, “Khunhie bavüdo kerekenie teiso baya mo me? Süla teiso nu tuoyakezhamia u phi mesüya mo, ue kijü kezieu nguyakezha la.

¹⁰Derei teizei nu tuoyakezhamia u phi mesüwaya, kezieu uko nou tuo kemo la” sita.

¹¹Mha hako pukewa sie, puo uko ki, “Uko zeu Lazar zezhüte, derei a vo puo kesou lashütuo” ishü.

¹²Sitse pethakelieko sie “Niepuu, puo zekezhü zo liro puo mha puoreita lho” sita.

¹³Jisu puo siaketa dze pu zo, derei ukoe puo zekezhü dze pu ükecü leta.

¹⁴Süla Jisu mezhükhro uko ki, “Lazar siate,

¹⁵mu nieko la a sünu ba mokecü a nei, nieko bu pelelieketuo la. Derei úko puo ki vo khe” sishü.

¹⁶Sitse Thoma, Nuobi[21] ükezhau sie puo zeko ki, “Úko rei puo ze sünu vo di siata khe” sita.

¹⁷Siro Jisu vorlie tse, Lazar khrukewa zha diata ükecü silie.

¹⁸Bethani-e Jerusalem kepenuo ki maildo kenie[22] mese ki ba,

¹⁹mu Judako kekra Martha mu Marianie prüu la unie nou thupeluotuoü vor ba.

²⁰Siro Martha-e Jisu vorkezhü sishü tse pa puo ze kese, derei Maria kinu ba zo.

²¹Sitse Martha sie Jisu ki, “Niepuu, no haki ba ro a prüu siatalie lho mu ru!

²²Derei tsie zorei no Ukepenuopfü ki mhakehoupuo cha rei puo khashü zoketuo a si ba” sita.

²³Jisu puo ki, “N prüu la sielietuo” sishü.

²⁴Martha puo ki, “U, thelanhie rheilakesieu nu puo rei rhei la sielieketuo a si ba” sita.

²⁵Jisu puo ki, “A rheilakesieu mu kerheiu zo; kehoupuorei a pelekelieu siata zorei rhei lalie zotuo,

²⁶mu kehoupuorei rhei keba nu a pelekelieu mhakipuorei siatalie lho. No hau pele zo mo?” sishü.

²⁷Sitse hapfü sie puo ki, “U Niepuu, no Khristau, Ukepenuopfü Nuou kijü nu vorketuou ükecü a pele tou zo” sita.

²⁸Martha hau pukeshü sie la kinu le puo siezepfü Maria noupu di puo ki, “Kepethau vorte mu puo n kie tha ho” sishü.

²⁹Mu puo süu sishü tse rükri puo ki pa.

³⁰Süki Jisu rünau nu ler moluo, mu Martha ze kesekecü chüu nu tha zoluo.

³¹Puo kinu ba di puo nou thupeluo keba Judako Maria rükri sie tuoketa ngu. Sitse uko rei puo siemedzi pa, ukoe puo tuo mekhruchüu nu vo di thekrü chütuoüzhü nhiecü le.

³²Maria vo Jisu chüu tsolie di puo ngulie tse tsu puo mhodzünu khoutoulie di sie, “Niepuu, no haki ba üro a prüu siatalie lho mu ru!” sita.

³³Siro Jisue Maria mu puo zeketuo Judako kraketuo ngushü di puo nou chütei vorta mu puo nou suothorta.

³⁴Sidi puo sie, “Nieko puo pie kirapuo zhü ga?” si. Uko sie puo ki, “Niepuu, vor di mehocie” sishü, ru

³⁵Jisu krata.

³⁶Süla Judako sie, “Lere, puo kiderei puo khrie vor shi ha!” si.

³⁷Derei huomia sie, “Mhicieu mhi chü pevikeshüu, kesia nunu themia hau rei chü perhei lashü lhoü me?” sita.

³⁸Süsie Jisu puo nousuo phi di mekhru ki vor. Süu kecieki puo mu ketsie pie mekapie ba.

³⁹Jisu sie, “Ketsieu phouwacie!” sita. Sitse siaketau üpfü Martha sie, “Niepuu, puo re menazhütatie, puo siaketa zha diate eru!” sita.

⁴⁰Sitse Jisu puo ki, “A n ki no pele liro, no Ukepenuopfü zayie ngutuo, ishü moü me?” sita.

⁴¹Süla uko ketsieu phouwa. Mu Jisu tosie di, “A puo, no a kecha rünyüyakezha la a n thezieya.

⁴²No a pfhe rünyü seiyakecü a si, derei haki ketha krodiu bu noe a ketsekeshü pelelieketuo la a hau kepu zo” si.

⁴³Puo hau pushü di shie puo rhie chü di sie, “Lazar, parlie” sishü.

⁴⁴Sitse siaketau puo phi puo dzieko pfhe se kezipfü mu pfhe yopuo se puo zie kezipfü, di par thata. Sitse Jisu sie uko ki, “Puo phreishü di puo bu tuolie” sishü.

⁴⁵Süla Maria ze kevor Judamia kekra Jisue kedipuo chüshü shicü ngu, di puo pelelie.

⁴⁶Derei süko huo Farisiko ki vo di Jisue kedipuo chüshü shicü pu.

⁴⁷Süla Farisiko mu zievo kezhako vo mechü kehouu kieshü di sie, “Úko kedipuo chü ro vi ta? Themia hau zasi kekra chüshü baketa la.

⁴⁸We puo bu hi zo vo liro themia pete puo peletatie, mu Rommia vor rüsuokiu mu u seyie pekawatie” sita.

⁴⁹Derei uko donu Kaifa, sücie zievo kezhatho chü kebau, sie, “Nieko mhale mo pie kizo ga?

⁵⁰U themia pete pekakewau ki mia puo bu siaketawe vikuoketuo nieko le mo me?” sita.

⁵¹Derei puo hau kepu puo thuo puo geinu monyü, sücie zievo kezhatho chü keba kize Jisu bu seyieu la siashüketuo siedzekesi die pukeshü zo.

⁵²Mu seyieu la rübei zomonyü cüre tuoketa Ukepenuopfü nuonuoko ze vor puo chülieketuo la.

⁵³Süla sünhie yawinu uko puo dukhriwaketuo rhü tuota.

⁵⁴Süla Jisue Judako donu mia mhingu chü sa mo di vo rayha kepenuoki Efraim ükecü rünau nu pethakelieko ze di sünu bata.

⁵⁵Süki Judako Ciekevo-u penuota, mu themia kekra thenyiu mhodzü u chü kemesaketuo la rüna nunu tuo Jerusalem nu vota.

⁵⁶Sitse uko vo rüsuoki nu tha, mu Jisu pfhü di huoniehuo ki, “Nie kedipuo le ga? Puo thenyi nu vor lho zo die mu?” sita.

⁵⁷Sidi Zievo kezhako mu Farisiko Jisu telieketuo la puo dze kesimia kehoupuo bu rei süu se uko ki punuta.