Read Angami Naga Johan 12 Bible Online

Johan 12 - Angami Naga bible

Johan 12

¹Ciekevo nyiketuo zha sorou baluokecü nu Jisue kesia nunu chü perheikeshüu, Lazar ki Bethani nu vorlie.

²Sünu ukoe puo la theva mhacau keseshü. Martha-e merei ba, mu Lazar rei mizhü ki Jisu ze kebako mia puo.

³Süki Mariae nard mpie zokecü tier puoma kere phipfü bou puo pie vor, di rupie Jisu phi[23] kenheshü di puo thapie süwa. Sitse kibou pete tier re kevi thuo tshuta.

⁴Derei puo siedziko mia puo (puo sewatuoükebau) Judas Iskariot sie,

⁵“Kiüdi tier hau pie raka denari[24] krie se nu zelie di khapie kejümiako tsü mo ga?” sita.

⁶(Puo hau kepu, kejümiako rüli lecü la mo, derei puoe kerügumia; puo priesabou seya mu sünu kelerko huo rügulieyacü la.)

⁷Sitse Jisu sie, “Puo kha hiecie! Puoe a kekhrunyie keseshüketuo la hau se vor zo.

⁸Kejümia we nie ze sei batuo, derei a nieko ze sei balie lho” sita.

⁹Judako krodi puo puoe sünu baücü silie tse Jisu rübei la monyü Jisue kesia nunu chü perheikeshü Lazar rei sa mehotuoü vor.

¹⁰Süla zievo kezhakoe Lazar rei dukhriwaketuo rhüta.

¹¹Puo la Judamia kekra rüdi se Jisu peletakecü la.

¹²Süsie nhie thenyi nu la vor keba krodiu Jisu Jerusalem nu vorkezhü silie.

¹³Süla uko puo ze kesetuoü kukuo co rhopie mu shiekhoui di sie, “Hosana! Niepuu za se vorkezhü Israel kediu, thejakepfütho” si tuota.

¹⁴Jisu gada yopuo ngulie di süyo gei balie. Süu dze thupiekezhü:

¹⁵“Michie hiecie, Zion nuopfü, Harie, n kediu gadanuo yopuo gei ba di vorzhü ho!” si.

¹⁶Tseki zowe puo siedziko hako ca silie mota; derei Jisu zayie chükelie sie, ketholeshü nu kepu hau thupieketuo mu chüshü zokecü ukoe rükralie.

¹⁷Siro Jisu mekhru nunu Lazar kielie di kesia nunu puo chü perheikeshü ki puo zeketuo krodiu thuo puo zhapu chütuota.

¹⁸Siro puoe zasi hau chükeshü sikelie la krodiu vor puo ze kese.

¹⁹Süla Farisiko sie huoniehuo ki, “Nie mhapuorei chülie kenjüte. Lere, kijüu puo siemedzi tuote” sita.

²⁰Thenyi nu rüsuotuoü kekhoko donu Grikmia huo tuo.

²¹Uko Galil kijü Bethsaida nunu kevor Filip ki vo di sie, “Kezhau, hie Jisu ngu nyüyalie” sita.

²²Filip vo Andria ki pushü; süsie Andria mu Filip unie vo Jisu ki pu lashü.

²³Sitse Jisu sie unie ki, “Themia Nuou bu zayie chülieketuo teiu vorte.

²⁴A nnie ki pu toushütuo, telhashü puo te kijü tsu di siashü mo liro puo rübei sei baya, derei süu siashü ro, puo si kekra vülieya.

²⁵Kehoupuorei puo thuo puo phou khrieyakezhamia pejüwatuo, mu kehoupuorei kijü hau nu u phou ngumecüyakezhau pekrupie kechachie kerhei nu shülietuo.

²⁶Kehoupuorei a lie chüyakezhamia a siemedzituo, mu a kituomia a kebara batuo. Kehoupuorei a lie chükezhamia a Puou rei sümia rhutuo.

²⁷“A nou kehoukeruo chüte. Mu a bu kedipuo puta, ‘A puo, bavüdo hau nunu a kelaliecie’ ituo me? Mo, hau la bavüdo hau nu kevor ze.

²⁸A Puo n za bu kemeyieu chüliecie!” sita. Sitse teigei nu mhapfhe puo, “A süu bu zayie chüwate, mu a süu bu zayie chü lashütuo” isi vor.

²⁹Süki ketha themia kro-u rei süu si, sidi süu üse teikese pfhe zo üta, kekreiko sie, “Teigeidieliemia puo puo rüchü zo” sita.

³⁰Derei Jisu sie, “Mhapfheu a la monyü nieko la kevor zo.

³¹Tsie kijü hau nyie pepicü teiute, tsie kijü hau nu kediu whuowatuo.

³²A we kijü hau nunu a piesiekeshü ki a thuo themia peteko[25] teshü ze a ki vortatuo” sita.

³³Puo hau pukecü puo kedipuo se chü di siatuo shikecü dze pukeshü zo.

³⁴Süla krodi-u sie puo ki, “Hie thezho-u nunu sikelie Khrista kechachie tuo zotuo üya. Siüro kiüdi Themia Nuou piesie morosuo üta ga? Themia Nuo hau supuo ga?” sita.

³⁵Sitse Jisu sie uko ki, “Kezieu puotei huoyo keyieza di nieko ze bate, kezeiu bu nie gei vor molieketuo la kezieu keba ki nieko süu nu tuoliecie, kezei nu tuoyakezhau puo kirapuo vozhü shicü siya kemo la.

³⁶Nieko kezieu nuonuoko chülieketuo la kezieu keba ki kezieu peleliecie” sita. Jisu mha hako pukeshü sie tuo uko rüshüta.

³⁷Puo uko mhingu ki nu zasi kekra chüshü zorei uko puo pele mvüta.

³⁸Hau thiedzü Isaya siedzekesiu pupiekezhü: “Niepuu supuonie hie pukeshü dieu pelelie ga? mu Niepuu bou kekuo se suomia pesipengushü ga?” isikeshü dieu bu tseilieketuo la zo.

³⁹Siro ukoe pelelie kenjüketa kekreilamonyü Isayae pu sakeshü,

⁴⁰“Ukoe u mhi pie ngu, tsiu uko melou pie lelie di rürei a ki vor, a bu uko chü keshürhokeshü keprei la uko mhi chü pecie, mu uko melou chü pekhrüwate” isipiezhü.

⁴¹Isaya hau pukeshü kekreilamonyü puoe puo zayieu ngu di puo dze pushü.

⁴²Sirei themia kekra kekuo kesemia huo rei sa pelelieta. Derei Farisiko la mu sinagog nunu uko whuokewa keprei la mhotsou puo phra mota.

⁴³Ukoe Ukepenuopfü tshepfükelieu kirei themia tshepfü nyükuoketa la.

⁴⁴Siro Jisu shiekhoui di sie, “Kehoupuorei a peleyakezhau a zo monyü a ketsekeshüu rei peleya.

⁴⁵Mu kehoupuorei a nguyakezhau a ketsekeshüu rei nguya.

⁴⁶A pelekelie kehoupuo bu rei kezei nu ba sa molieketuo la a kijü kezie chü di vor zo.

⁴⁷Kehoupuorei a dieu rünyülie di süu zeya mo zorei a puo capi chülie lho, a kijüu pejoketuo la vor mo, derei kijüu kelalieketuo la kevor zo.

⁴⁸Kehoupuorei a melie mu a dieu zeya kemomia nyie pepiketuo puo ba; a pukeshü dieko thuo thelanhie süu capi chütuo,

⁴⁹a thuo a medo nunu die süu pu monyü a ketsekeshü Puou thuo a bu kedipuo pu mu kedipuo pie mia pechüpetsoshü morosuo shikecüko khapie a tsüwaketa la.

⁵⁰Mu puo diekhakeshüu sü kechachie kerhei zokecü a si ba, süla a mha kepuko, Puou a ki pukeshüko se puya” sita.