Read Angami Naga Johan 13 Bible Online

Johan 13 - Angami Naga bible

Johan 13

¹Siro Jisue kijü hau khawa di Puou ki votaketuo teiu vor tso baketa Ciekevo nyiu mhodzü silieta. Puoe kijü nu keba puo themiako khrie vor zo; mu süko khrie vo thela tso zo.

²Satan-e Judas Iskariot-u Simon nuou bu puo sewaketuo keleu se puo noushüwata, mu mhacü keba ki,

³Puoue kekuo pete khapie Jisu dzienu shüwaketa, mu puoe Ukepenuopfü kinu vor zokecü mu Ukepenuopfü ki la votaketuo puoe si ba,

⁴süla puo mizhü[26] geinu sielie di puo boulie peso-u rhuowa, sidi, pfhe yopuo pie puo chie phapfülie.

⁵Süsie dzü rupie dzieteikhou puo nu shülie di puo siedziko phi khrü mu pfhe puo chie phapfüketuoyo pie uko phi süsü vota.

⁶Si vo Simon Pitor tsolie tse puo sie, “Niepuu, no a phi khrütuo le?” ita.

⁷Jisu sie, “No tsie a chü kebau ca si ba mo, derei no hasie nu silietuo” sishü.

⁸Sitse Pitor puo ki, “N bu mhakipuorei a phi khrülie lho” sita. Jisu sie, “A bu n khrü mo liro a kitsa n ya jü zo” isi.

⁹Sitse Simon Pitor puo ki, “Niepuu, a phinie zomonyü a dzie mu a tsü rei sacie” sita.

¹⁰Jisu puo ki, “Kehoupuorei dzü rüluwa ro puo phinie sie kekreitsa khrü sa morei vi; puo mesa tsei ba zo; siro nieko mesa ba; derei pete zo mo” sita.

¹¹Kekreilamonyü puoe puo sewaketuou si ba; süla puo sie, “Nieko pete mesa zo ba mo” idi kepu zo.

¹²Puo uko phi khrükewa sie puo boulie boulie lalie, sidi ke balie di uko ki, “A nieko gei chükeshüu nieko puoca si ba mo?

¹³Nieko a üse, Kepethau mu Niepuu iya, mu süu puotou zo, a süu zocü la.

¹⁴A nie Niepuu mu kepethau zo di nieko phi khrü üro nieko rei huoniehuo phi khrü zhü zo.

¹⁵A nie la thakie puo chüshü, süla nieko rei a nieko gei chükeshü mhie chüliecie.

¹⁶A nie ki pu toushütuo, mia diemia puo Niepuu ki zha mo, mu mia lie kechüu rei mia puo ketsekeshüu ki zha mo.

¹⁷Nie hako si di chüü zeya liro, nieko thejakepfütho.

¹⁸A nieko pete dze pu ba mo; ae kedalieketako a thuo si ba. Derei ketholeshü nu, ‘A niekhrüda kecüu[27] puo phichapie a tsie’ ikecü dieu bu tseilieketuo la.

¹⁹Süu chüketa mhodzü a tsie nie ki puya; sitse süu chüketa ki, a süu zokecü nie bu pelelieketuo la.

²⁰A nieko ki pu toushütuo, kehoupuorei ae ketsekeshüu zekelieu a zelieya; mu kehoupuorei a zekelieu a ketsekeshüu rei zelieya” sita.

²¹Jisu hau pukeshü sie puo noukemezhie phi di, “A nieko ki pu toushütuo, nieko donu mia puo a sewatuo” sita.

²²Süki puo siedziko sie huoniehuo meho di puo supuo pu ba shi lelie mo bata.

²³Ru puo siedziko mia puo, Jisue puo khrieyakezhau puo merü khieki vakhriepfü ba.

²⁴Sitse Simon Pitor thedo chü puo kie di puo bu Jisue supuo dze pu ba shiü ketsonuta.

²⁵Süla Jisu khie tou nu keba puo siedzi süu reipra di puo ki, “Niepuu, süu supuo ga?” idi ketsota.

²⁶Süla Jisu sie, “A niekhrüda huoyo petselie di pie puo tsüshüketuou sü puo zo ho” sita. Sidi puo niekhrüda huoyo chüpie petselie di süyo khapie Simon Iskariot nuou Judas tsüshü.[28]

²⁷Siro niekhrüdayo pielie mumetha Satan puo nou leta. Süla Jisu sie puo ki, “No chüketuou chü mhailiecie” sishü.

²⁸Sirei mizhü vakhriepfü kebako miapuorei kedipuo la Jisue hau pie puo ki pu shicü silie mo.

²⁹Huomia sie, Judas-e uko rakabou seyakezha la, Jisue puo ki, “Thenyiu la úko se morokesuoko khrülienu”; morei mha huo pie mhakejümiako tsünu pu ba nhiecü leta.

³⁰Süla Judas-e niekhrüda pielie mu tuo mhai kitie prata. Mu süsü thevata.

³¹Puo paketa sie, Jisu sie, “Tsie Themia Nuou zayie chüliete, mu Ukepenuopfü rei puo geinu zayie chü bate.

³²Puo geinu Ukepenuopfü bu zayie chülie liro Ukepenuopfü rei puo geinu puo bu zayie chülietuo mu puo bu zayie chü mhashütuo.

³³Harie nhicuko, a nieko ze ba pechalie lhote. Nieko a pfhütuo, derei a Judako ki kepu tuoi a tsie nieko kirei puya; ‘Nieko a kevo nu vorlie kenjü.’

³⁴A nie bu chülienukeshü die kesa puo khashüzhie, nieko huoniehuo khrieliecie. A nieko khrie kevor tuoi nieko rei huoniehuo khrielie morosuo.

³⁵Nieko huoniehuo khrielie liro, süu geinu nieko a siedzimia ükecü mia pete bu silietuo” sita.

³⁶Simon Pitor sie puo ki, “Niepuu, no kirapuo votieya ga?” isi. Jisu sie puo ki, “A kirapuo votieya shi no tsie sünu a medzi vorlie kenjü, derei hasie no a siemedzilietuo” sita.

³⁷Pitor sie puo ki, “Niepuu, kiüdi a tsie n siemedzi vorlie kenjü ga? A n la a phou khashütuo” sita.

³⁸Jisu sie puo ki, “No a la n phou khashü zotuo le? A n ki pu toushütuo, no thevü kekhou mhodzü va se a melietatuo” sita.