Read Angami Naga Johan 14 Bible Online

Johan 14 - Angami Naga bible

Johan 14

¹“Nieko nou kemezhieta suo, Ukepenuopfü pele balie, a pele rei balie.

²A Puou kinu themiaba ba phi. Si moükecü sie we a nieko ki pushüwata zotuoweü, siro a vo nieko ba kesetuoü batacü la.

³Siro a vo di nieko ba keselieta ro a la vor di nieko ze a ki votatuo, sidi nie bu rei a kebara balietuo.

⁴Siro nieko a voketuo chau si ba” sita.

⁵Sitse Thoma sie puo ki, “Niepuu, no kirapuo votieya shi hie si mo. Hie kikemhie di cha süu silie ta?” sita.

⁶Jisu sie puo ki, “A chau, ketho-u mu kerheiro-u zo. A geinu zo kemosie miapuorei Puou ki vorlieya mo.

⁷Nieko a si liro, a Puou rei si zotuo. Nieko tsiewe puo siliete mu puo ngu reiwate” si.

⁸Filip sie, puo ki, “Niepuu, Puou pie hie pengushücie, siro hie nei tseitatuo” sita.

⁹Jisu sie puo ki, “A puotei hachie nieko ze tuota rei Filip, no a si mo le? Kehoupuorei a nguwaketamia, Puou rei nguwate. Siro no kiüdi ‘Puou pie hie pengushücie’ iya ga?

¹⁰A Puou nou ba mu Puou a nou bacü no pele mo me? A nieko ki pukezha dieko a thuo a die monyü a nou keba Puou thuo puo mhathoko chü tuoya ze.

¹¹A Puou nou ba mu Puou a nou bakecü peleliecie; si moü rei, mhathoko la zorei a peleliecie.

¹²A nieko ki pu toushütuo, kehoupuorei a pelekelieu a chüyakezha mhathoko chütuo, mu puo süko kirei zhakuokecü mhatho chütuo, kekreilamonyü a Puou ki votatuoü bate.

¹³Mu nie a za nunu mhakehoupuorei cha ro, Nuou geinu Puou bu zayie chülieketuo la a süu chüpie tsü zotuo.

¹⁴Nieko a za nunu mha kehoupuorei cha ro, a süu chüshü zotuo.

¹⁵“Nieko a khrieya ro, nieko a die khakeshüko zetuo.

¹⁶Siro a Puou ki chatuo, mu puo Ukil[29] kekrei puo khashütuo, mu puoe nieko ze sei tuo zotuo.

¹⁷Hauha ketho Ruopfüu, kijüu puo zelie kenjükecüu zo, süue puo nguya mo, morei puo si reiya kemo la. Nieko we puo si ba, puo nieko ze tuoya, mu nieko nou tuo zotuocü la.

¹⁸“A nie kha kemerüwalie lho zo; a nieko ki vortuo.

¹⁹Zha keduoyo sie kijüu a ngu sa motatuo, derei nieko we a ngutuo, a rheiketuo tuoi nieko rei rheituo zotuocü la.

²⁰Sünhiesü a Puou nou tuokecü, tsiu nieko a nou tuokecü mu a nieko nou tuokecü silietuo.

²¹Kehoupuorei a die khakeshüko ngulie di süko chüü zeyakezhamia a khrieya; mu a khrieyakezhamia a Puou rei sümia khrietuo mu a thuo a pie uko pengushütuo” si.

²²Juda, (Iskariot kemo-u) sie, puo ki, “Niepuu, no n thuo n pie kijüu monyü hie pengushüketuo kikidi silie ta?” sita.

²³Jisu sie puo ki, “Kehoupuorei a khrieyakezhamia a die zetuo, siro Puou rei sümia khrietuo, mu hienie sümia ki vo di sümia ze batatuo.

²⁴Kehoupuorei a khrieyakemomia a dieko rei zeya mo; mu nie silieketa die süu a die mo, derei a ketsekeshü Puou die zo.

²⁵“A nieko ze keba nu die hako pie nie ki pushüwate ho.

²⁶Derei Ukil-u[30], Kemesa Ruopfüu, Puou a za nunu ketseshüketuou thuo mha pete pie nie pethalietuo, mu a nie ki pukeshü pete nie bu rükralietuo.

²⁷A nouneu khapie nieko tsüya, a thuo a nouneu khapie nie tsüya. Kijüue khapie mia tsüyakezha tuoi a pie nie tsütuoüzhü mo. Nie nou kemezhieta suo mu michie rei ta hie.

²⁸A nieko ki, ‘A tuotatuo, derei a nieko ki la vortuo’ ikeshüu siliete. Nieko a khrieya liro, a Puou ki votatuoükeba la nie neituo, Puou a ki zhakuokecü la.

²⁹A mha süko chüketa mhodzü tsie se nieko ki pushüwate, süu chüketa ki nieko bu pelelieketuo la.

³⁰A nieko ze kerüchü pecha ba salie lhote, kijü hau nu kediu vortazhücü la. Puo a mho puo kekuo ba mo;

³¹derei a a Puou diekhakeshü kemhie chüya, kijüu bu a Puou khrieyacü silieketuo la. Úko sie di tuota khe.