Read Angami Naga Johan 16 Bible Online

Johan 16 - Angami Naga bible

Johan 16

¹“A mha hako se nieko ki pukeshü nie bu nie nou kekrüta molieketuo la.

²Mia sinagogko nunu nieko whuowatuo. Ketho zo, kehoupuorei ue Ukepenuopfü kikeshü lietho puo ba zo ükecü kele tei puo vortuo.

³Uko mha hako chükecüe ukoe Puou morei a si mocü la zo.

⁴Derei mha hako chü kevor teiki nieko bu a pukeshüko rükralieketuo la a die hako pie nieko ki pushü ho. “A sietsenu mha hako pie nieko ki pu mo, kekreilamonyü a nieko ze tuo zocü la.

⁵Derei a tsiewe a ketsekeshüu ki votatuoü bate, sirei nieko miapuorei ‘No kirapuo votieya ga?’ idi ketso mo zoluo.

⁶Derei a nieko ki mha hako pukeshü la nieko nou kemezhie phi bate.

⁷Sirei a nieko ki pu toushütuo; a tuotakecü we nieko la kevi zo, kekreilamonyü a tuota mo liro Ukil-u[37] nieko ki vorlie lho; derei a tuota liro, a puo ketsepie nieko ki shütuo.

⁸Mu puo vor ro kijüu kephouma mu kemiatho mu kepejo dze tha toupie kieshütuo;

⁹kephouma dze süu uko a pele kemo la;

¹⁰Kemiatho dze süu a Puou ki votaketuo mu nieko a ngu sa motaketuo la;

¹¹Kepejo dze süu kijü hau nu kediu pejopie baketa.

¹²“A tsierei mha kekra nieko ki puketuo baluo, derei nieko tsie süko le kekralie lho.

¹³Sirei ketho Ruopfüu vorkelie ki puo thuo nieko cha thapie ketho ükecü khe nu shülietuo; puoe puo thuo puo kele nu mha pu monyü puo rünyükelieko pie putuocü la, mu puoe thiesie mhachü vorketuo pupie nie kie zotuo.

¹⁴Puo a bu zayie chütuo, kekreilamonyü puo a vieko pie nieko pesipengushüketuo la.

¹⁵A Puou vie pete sü a vie zo. Süla puo a vieko pie nie pesipengushüketuo a pushü zo.

¹⁶“Puotei huoyo sie nieko a ngu motatuo; siro puotei huoyo sie nieko a ngu latuo” si.

¹⁷Süki puo siedziko huoniehuo ketso di, “Puo u ki, ‘Puotei huoyo sie nieko a ngu motatuo, mu puotei huoyo sie nieko a ngu latuo’; mu ‘A Puou ki votatuoü batacü la’ idi kepucau kedipuotemu?” si.

¹⁸Sitse uko, “Puoe sie, ‘Puotei huoyo’ idi kepucau kedipuotemu? Puo kedipuo pu ba shi we puoca silie mote” si bata.

¹⁹Jisue uko puo ki mha ketso nyü keba si, süla uko ki, “Puotei huoyo la nieko a ngu motatuo, mu puotei huoyo sie nieko a ngu latuo” ikeshü hau nie donu kepu ba me?

²⁰A nieko ki pu toushütuo, niekoe kra mu thekrü chütuo, derei kijüue puo neituo, niekoe nie nou suotuo, derei nieko nousuo rüdi la vo kenei chütatuo.

²¹Thenumia nuonuovachü chükelie ki puotei tso vorketa la puo noukemezhie bataya, derei puo nuo penuolieketa sie mia puo penuopie kijü nu shülieketa la puo keneipfü puo mezhieko rükra motaya.

²²Süsü tuoi nie rei tsie thenou suo ba; derei a nieko ze kengu latuo, süki nie nei phituo, mu miapuorei nieko geinu nie kenei süu chü setalie lho.

²³Sünhie, niekoe mhapuorei a ketso sa motatuo. A nieko ki pu toushütuo, nieko Puou ki mha kehoupuorei cha ro, Puoe a za nunu süu khapie nie tsütuo.

²⁴Nieko tsie ketso a za nunu mhapuorei cha mo zoluo; nieko kenei bu tseilieketuo la chacie, siro nie ngulietuo.

²⁵“A mha hako kedievi di pie nie ki puya. Derei a kedievi mo di Puou dze pu kemecietsuoishüketuo tei puo vorzhie.

²⁶Sünhie nieko a za nunu mha chatuo; süu a nie sou nu puo ki mha chaketuou pu ba mo;

²⁷Puou nieko khrieya, nieko a khrieya mu a Puou ki nu par zokecü pele vor zocü la.

²⁸A Puou ki nu par di kijü hau nu vor zo; mu a kijü hau khawa di Puou ki la votatuoü bate” sita.

²⁹Sitse puo siedziko sie puo ki, “No tsiewe kedievi mo di mha pu kemecietsuoishü bate.

³⁰No mha pete sikecü hie si bate; noe mia bu n ki mha ketso morei vi ükecü chüshüte; hau la hie bu noe Ukepenuopfü ki nu vor zo ükecü pelete” sita.

³¹Jisu uko ki, “Nieko tsiewe pelete le?

³²Puotei puo vorzhie mu tsierei vor bata zo, sükisü nieko ta cürese nie thuo nie kinu vo phretatuo di a bu a rübeitatuo. Derei a a rübeitalie lho, Puou a zeketuo la.

³³Nie bu a geinu nouneu ngulieketuo la a nieko ki die hako pushü ho. Nieko kijü hau nu kemezhie zotuo. Derei thepfulie; a kijü hau ki kuoliete!”