Read Angami Naga Johan 17 Bible Online

Johan 17 - Angami Naga bible

Johan 17

¹Jisu die hako pukeshü sie, puo tosie teigei meho di sie, “A Puo, puoteiu vorte; Nuou bu n chüpie zayie chüshülieketuo la no Nuou pie zayie chüshücie,

²No themia[38] pete mho kekuo pie puo tsüwa di puo bu kechachie kerhei pie süko tsülieketuo chüshüwaketa la.

³Siro uko bu Ukepenuopfü puo rübeisie ketho kejüu mu no puo ketsekeshü Jisu Khrista sikelie süusü kechachie kerhei zo.

⁴No a bu chünukeshü mhatho-u chü tseiwa di kijü nu n za chü kemeyieshüwata zo.

⁵Süla a Puo, kijüu chükelie mhodzü a n ze zayie chü kevor tuoi tsie a bu n ze zayie chüliecie.

⁶“No kijü hau nunu themia khapie a ketsüko ki a n zau pie pesipengushüwate. Süko n vie ze, mu no süko khapie a tsüshü, tsiu ukoe n die ze vor zo.

⁷Uko tsiewe no mha khapie a ketsü peteko n ki nu vor zo ükecü siliete;

⁸kekreilamonyü no se a tsükeshü dieko a pie uko tsüshüwate, mu uko süko zelie, sidi ukoe a n ki nu vor kethota zo ükecü siliete; mu uko no a ketseshü zo ücü pelete.

⁹A uko sounu chaya; a kijüu sounu chaya mo, derei no pie a ketsüko sounu chaya, kekreilamonyü ukoe n vie.

¹⁰A vie pete n vie, mu n vie pete sü a vie zo; mu a uko geinu zayie chü bata zo.

¹¹Mu tsie a kijü nu ba salie lhote, derei uko kijü nu ba zotuo, mu a n kinu vortazhie. Kemesa Puou, no kha a tsükeshüko, süko bu avu tuoi puo chülieketuo la no a za nunu süko rüguo ze tuoliecie.

¹²A uko zeketuo chie no khapie a ketsüko n zau nu uko khapie baliete. A uko rüguo se tuo zo, mu kethodie bu tseilieketuo la jütaketuo nuou[39] zo kemosie miapuorei pejüwa mo.

¹³Derei tsie a n ki vortatuoü bate, mu a keneiu bu uko ketshu chülieketuo la kijü nu baluokecü nu mhako pushüwate.

¹⁴A n dieu se uko tsüwate, mu kijüu uko ngumecüya kekreilamonyü a kijüu nunu vor kemo tuoi uko rei kijüu nu mia mocü la.

¹⁵A n bu kijüu nunu uko chü seta monyü kerüzhü ki nu uko rüguose balienu di chaya.

¹⁶A kijü haunumia kemo tuoi, uko rei kijü haunumia mo.

¹⁷Ketho-u se uko chü kemesaliecie, n dieu ketho zo.

¹⁸No a ketsepie kijüu nu keshü tuoi, a rei uko ketsepie kijüu nu shüwate.

¹⁹Uko bu rei ketho-u nunu u chü kemesalieketuo la a thuo a chü kemesa se tuo zo.

²⁰“A hako rübei la zomonyü uko die nunu a pelelieketuoko la rei chaya,

²¹uko pete bu puo chülieketuo la. Sidi a Puo, a n nou ba mu no a nou keba tuoi uko bu rei avu nou baliecie; sidi kijüu bu no a ketseshükecü peleliecie.

²²Avu puo zokecü tuoi uko bu rei puo chülieketuo la no zayie pie a ketsüu a khapie uko tsüwate.

²³A uko nou ba mu no a nou ba, süu geinu uko bu keze puo chü tseilieketuo mu kijüu bu no a ketseshü ükecü mu no a khrieyakezha tuoi uko khrieya ükecü silieketuo la.

²⁴A Puo, no uko khashü a ketsüko a uko bu rei a kebara ba nyüya, sidi uko bu no kha a ketsü zayieu meholieketuo la, kekreilamonyü no kijüu chükelie mhodzü rei a khrietuotakecü la.

²⁵“Kemiatho Puou, kijüu we n siya mo, derei a we n si ba, mu no a ketseshü ükecü hako we si ba.

²⁶A uko bu n zau siliete, mu süu mia silie zotuo, sidi no se a khrie vorkecü kekhrieu bu uko nou balie mu a bu uko nou balieketuo la.”