Read Angami Naga Johan 18 Bible Online

Johan 18 - Angami Naga bible

Johan 18

¹Jisu die hako pukeshü sie, puo siedziko ze di Kidron rü lutsakhie tezie puo kebau nu vota, sidi puo mu puo siedziko rei sünu le.

²Siro Judas, puo teshüketuou rei thechü süu si ba, kekreilamonyü tsiemelie Jisue puo siedziko ze thechü sünu voya.

³Süla Judas-e zievo kezhako mu Farisikoe ketsekeshü rüpfhünuo mu thenamia, u rünyie kesepfü, mitu mu mibou pie ketuo kro puo ze sünu vorta.

⁴Jisue puo gei kedipuo chü vortuo shicü pete si ba, süla puo tuo pra di uko ki, “Nieko supuo pfhüya ga?” ishü.

⁵Sitse uko sie, “Nazaretmia Jisu zo” si. Jisu sie, “A süu[40] zo” sishü. Judas, puo sewaketuou rei uko ze süki tha.

⁶Siro Jisu uko ki, “A süu[41] zo” ishü tse uko mela tsu kijü zhüta.

⁷Siro Jisu lasie uko ki, “Nieko supuo pfhüya ga?” ishü. Sitse uko sie, “Nazaretmia Jisu[42] zo” si.

⁸Jisu uko ki “A nieko ki, a süu zo icü pushü ze, mu nieko a pfhütuo ro, themia hako bu tuotacie” sita.

⁹Hau pukeshü “No khapie a tsükeshüko a miapuorei pejüwa mo zo” ikecüu bu tseilieketuo la zo.

¹⁰Süki Simon Pitor-e zhiecha puo pfütuo, puo süu zoupie phichükezhau thekeu du di puo nyieto puo zatsa metakreiwa. Kituo süu za Malka.

¹¹Sitse Jisu sie Pitor ki, “N zhiechau pie puokou nu shüwalie. Puou kha a ketsü hieu a krie motuoü me?” sita.

¹²Süki rüpfhünuoko mu uko mhokezhau, tsiu Judamia thenako Jisu telie di puo phalie.

¹³Sidi ukoe puo ze Ana ki vo rie, puoe Kaifanuo meiu, sücie phichü kezhatho-u chü ba.

¹⁴Kaifae Judako ki themia pete bu siaketau ki mia puo bu themia pete la siaketau we vikuotuo üdi pukeshüu zo.

¹⁵Simon Pitor mu siedzimia kekrei puo Jisu medzi vozhü. Siedzi kekrei süu phichü kezhatho-u ze kesi pevikecümia puo, süla puoe Jisu ze phichü kezhau kitiezha nu leta,

¹⁶derei Pitor-e chazou careu khieki tha. Süla phichü kezhatho-u ze kesikecüu pa care kepfhepfü rüchüwa di Pitor ze kinu lerta.

¹⁷Süki thenu süpfü sie Pitor ki, “No rei themia hau siedzimia zo die?” si. Sitse puo sie, “A mo zo” sita.

¹⁸Süki kituoko mu thenako rei mekukecü la thezhü mi chülie di süu peguo tha; ru Pitor rei uko ze mi peguo tha.

¹⁹Süki zievo kezhatho-u Jisu ki puo siedziko mu puo mia kepetha dze ketsota.

²⁰Sitse Jisu sie, “A mhotsou kijüu ki mha pu; a Judamia pete vor kenguyakezha sinagog nu mu rüsuokiu nu mia petha vorya. A mhapuorei pekhre di pu mo.

²¹Siüro kidi no a ketsoya ga? A die kesiko ki ketsocie; uko a kedipuo pu shi si ba” siwa.

²²Puo die hako pushü tse, süki ketha thenamia puo dziezhü shüpie puo vü di sie, “No zievo kezhatho-u ki die hakemhie putuo le?” sita.

²³Jisu sie, “A mha pu kekrüwa ro, kekrüüketa zhapu khashücie. Derei a pukeshüu puotou liro no kiüdi a vüya ga?” sita.

²⁴Sitse Anae puo bu puo phapfü zo di ketsepie zievo kezhatho-u Kaifa ki shüwata.

²⁵Süki Pitor mi peguo tha zoluo. Sitse uko puo ki, “No rei puo siedziko mia puo zo monyü?” sita. Puo mo üdi sie, “A mo zo” si lata.

²⁶Phichü kezhatho-u kituoko mia puo, Pitor-e puo nyieto metakewaunuo kinumia puo, süki tha di sie, “No tezieu nu puo zeketuo ki a n ngu mo üme?” sita.

²⁷Pitor moü lata, sishü tse thevü khouta.

²⁸Süsie uko Kaifa kinu nu Jisu ze Pilat kinu[43] vota. Süki khiserünata. Mu ukoe kibou[44] nu le mo, kekreilamonyü ukoe u perhuwa mo di Ciekevonyiu cüketuo la.

²⁹Süla Pilat uko ki pa di sie, “Nieko kedipuo se themia hau pejoya ga?” ita.

³⁰Sitse uko sie, “Themia hau themia kesuo puo zo mo liro hie puo ze n ki vorlie lho” sita.

³¹Sitse Pilat uko ki, “Siro nieko thuo puo ze vo nie zho-u nunu puo dienya kecüliecie” sishü. Sitse uko sie, “Hie bu kesia siazha pie mia tsülie kevi kekuo pie hie tsü mo” ishü.

³²(Mha hau chüketa Jisue puo kedipuo se chü di siatuo shi di pukeshüu bu tseilieketuo la zo.)

³³Sitse Pilat la kibouu[45] nu leta, di Jisu kielie di sie, “No Judako kediu me?” si.

³⁴Jisu sie, “No ketsokecü hau n thuo n geinu par mo, kekreimia huo n ki a dze pukeshü puo ga?” sita.

³⁵Pilat sie puo ki, “No a üse Judamia üya me? N themiako mu phichü kezhako thuo n tepie a dzie nu keshü zo. No kedipuo chüwata ga?” sita.

³⁶Sitse Jisu sie, “A kedi-e kijü hau nunu mo. A kedi kijü hau kedi liro mia bu a tepie Judamia ki shü molieketuo la a siedziko mia ze keperhielie zotieciü. Derei a kedi-e kijü hau nu mo zo” si.

³⁷Sitse Pilat sie, “Siro no kedimia me?” sita. Jisu sie puo ki, “No a üse kedimia üdi pu. Hau la a penuo vor, mu hau la a kijü nu vor, ketho-u zhapu chüshüketuo la. Ketho-u kitsatie ketha kheko a die rünyüya” sita.

³⁸Sitse Pilat sie puo ki, “Ketho-u sü kedipuo ga” sita. Puo mha hau pukewa sie, puo Judako ki la par di uko ki, “A zowe puo kejo puorei ngulie mo.

³⁹Derei nieko zho nu a bu Ciekevo teiki kediemia puo khashüketuo ba, süla a bu nieko la Judako kediu khashüwa nyüya me?” sita.

⁴⁰Sitse uko melie u rhiechü di sie, “Themia hau monyü Barabas khashüwalie” sita. Barabas-e mia vie sekecümia puo.