Read Angami Naga Johan 19 Bible Online

Johan 19 - Angami Naga bible

Johan 19

¹Süsie Pilat Jisu ze vo di puo vüwa.

²Mu rüpfhünuokoe zohu kechielie di keditsüre puo chüpie puo tsü geishü, süsie pfhenei meriemegekecü puo pie puo bu selie;

³sidi puo ki phirür di sie, “Harie, Judako kediu!” si. Sidi dziezhü shüpie puo vü.

⁴Siro Pilat la par di uko ki, “Harie, a puo kejo puorei ngulie kemo nieko bu silieketuo la a puo ze nieko ki partuoüzhie ho” si.

⁵Sidi Jisu, bu zohu tsüre pfü mu pfhenei meriemegekecüu se di tuo par. Sitse Pilat uko ki, “Themiau sü harie” sishü.

⁶Siro zievo kezhako mu thenako puo ngushü tse, shiekhoui di, “Puo gouwacie! Puo gouwacie” sita. Pilat uko ki, “Nieko thuo puo ze vo di puo gouwalie, a we puo pejolieketuo ca puorei ngulie mo ho” sishü.

⁷Sitse Judako puo ki, “Hie thezho puo ba, mu thezho süu medzi liro puo sia zhüte, kekreilamonyü puo puo thuo puoü Ukepenuopfü Nuou üdi pute” sita.

⁸Siro Pilat hau sikelie ki, puo michie mieita.

⁹Sidi puo kibouu[46] nu la le di Jisu ki, “No kirapuonu vor ga?” sidi ketso. Derei Jisu puo ki mhapuorei pu la mota.

¹⁰Süla Pilat puo ki, “No a rüchü lho me? A n khashüwalie kevi mu n gouwalie kevi kekuo bakecü si mo me?” sita.

¹¹Jisu puo ki, “Pesogeinu kha n tsü kemo we no a gei kekuo puorei balie lheciü, süla a tepie n dzie nu keshüu kephouma rekuo” sita.

¹²Sitse süyawinu Pilat puo khashüwaketuo pfhü sie, derei Judako shie di, “No themia hau khashükewa sie, no Kaisar khriethomia mote! Kehoupuorei puo thuo puo üse kedimia üyakezhau sü Kaisar kepetsoumia zo!” sita.

¹³Pilat die hako silie tse, Jisu ze parlie, di puoe dienya kecüyakezha Ketsie Badze morei Ibri[47] die nu Gabatha üyakezha gei thebau nu balie.

¹⁴Sünhie Ciekevo-u la mhakesekecü teisozha; mu süki khinhieluota. Puo sie Judako ki, “Harie nieko kediu sü!” sita.

¹⁵Sitse uko shiekhoui di sie, “Puo bu ba hie! Puo bu ba hie! Puo gouwalie” sita. Sitse Pilat uko ki, “A bu nieko kediu gouwatuo me?” idi ketso. Sitse zievo kezhako sie, “Kaisar sie hie kedi kekrei jü” sita.

¹⁶Süla Puo uko bu Jisu gouwaketuo la puo khapie uko tsüwa. Süsie uko Jisu ze tuota.

¹⁷Sidi puo bu puo krus pie di thechü puo puo za mia Tsütsoru, Ibri[48] die nu Golgatha ükecü puo nu vota.

¹⁸Süki nu uko puo gouwa, Jisu bu metsuo mu puo khie lutsahatsa mia kenie sa puo ze gou.

¹⁹Pilat-e mha puo thu sapie krus geishü. Süu “Nazaretmia[49] Jisu, Judako Kediu” si.

²⁰Judamia kekra rei thukeshü hau phrü, kekreilamonyü Jisu goukecü chüu nadiu kepenuokicü la; mu süu Ibri[50], Latin, mu Grik die nu rei thu.

²¹Sitse Judako zievo kezhako Pilat ki, “Judako kediu isi mo di ‘Themia hau puo thuo puo üse a Judako Kediu üya,’ idi thuliecie” sita.

²²Sitse Pilat sie, “A thuwaketau thuwate” sita.

²³Siro rüpfhünuoko Jisu goukewa sie, puo pfhenei kezalieta. süko kezapie za dia chülie di uko mia puo za puopuo lielieta. Uko puo pfhenei rei rhuolie; puo boulieu puo terhü sa mo di puo tsü nu do tsu puo phi tso.

²⁴Süla uko kerüchü di sie, “Úko hau, rhawa hieü, supuo zanu partuo shiü pie dape khe” silie. Hau chüketa Ketholeshü nu “Uko thuo uko donu a pfheneiko kezalie, mu a boulieu dape chüliete” isi piekezhü dieu bu tseilieketuo la zo.

²⁵Chüpahiko mha süko chü. Siro puo zuo, puo zuo siezepfü, Klopa kimia Maria mu Maria Magdalapfü rei krus khie ki tha.

²⁶Siro Jisue puo zuo mu puoe khrie kevor pethakelieu rei süki ketha ngu di sie puo zuo üse, “Thenupfü, n nuou sü cüge” si.

²⁷Süsie puo pethakelieu kirei, “N zuo sü cüge” si. Sünhie yawinu pethakelie süu thenu süpfü bu puo kinu bataketuo la puo ze vota.

²⁸Mha hako sie Jisue mha peteko chü tseilieketa silie di (Ketholeshü dieu bu tseilieketuo la), puoe sie, “A terhüte” sishü.

²⁹Süki mhabou puo nu khubedzü kekhropie tshukecü puo ba; süla uko mha pie sünu selie di hisop seipfü puo geinu piesie puo me nu khashü.

³⁰Siro Jisu kekhrodzüu krielie tse sie “Tseite” sishü. Süsie puo tsünge tsu di puo ruopfü khashüwa.

³¹Siro sünhie Mhakesekecü zha, süla Judako sabat nhie themo-u bu krus gei zha nyü mota, sabat-e teisozha kemesa puocü la. Süla uko Pilat ki uko bu goupiekezhako phi dutshewa di themoko lhouwaketuo chalie.

³²Süla rüpfhünuoko vor di Jisu sa goupiekezhanie therieu mu kekreiu phi dutshewa.

³³Derei uko Jisu khieki phir tse puo siaketa ngulie, süla uko puo phi dutshe mota.

³⁴Derei rüpfhünuoko mia puo puo ngou pie Jisu tie zeshü, sitse thezie mu dzü kru mha parta.

³⁵(Nie bu pelelieketuo la mha süu chüketa kenguu thuo hau zhapu chüshü. Puo zhapu süu ketho zo, mu puo ketho-u pu ücü si ba.)

³⁶Mha hako chüketa ketholeshü nu, “Puo ruko puo rei bietshewalie lho” ipieketuo dieu bu tseilieketuo la zo.

³⁷Süsie rei ketholeshü nu die kekrei puo, “Uko thuo rüngou pie zewaketau meho zotuo” sipiezhü.

³⁸Mha hako sie, Josef Arimathiamia puo Pilat ki vor di Jisu mo-u chata, puo Jisu siedzimia puo derei puo Judako keprei la pekhre tuoya. Pilat puo bu pielie kevi chüshü, süla puo vor di puo mo-u pielie.

³⁹Nikodema, tsie mhodzü theva zenu vo Jisu ze kesekecüu rei mharekethengu mür mu aloepfü kesa sher hiepengou mese pie vor.

⁴⁰Unie Jisu mo pielie di Judamia kesia kekhruzho-u medzi di mharekethengupfü sa di linen pfhe pie themo-u kezülie.

⁴¹Jisu goukewa chü süki tezie puo ba, mu tezie süu nu miapuorei khru mo zoluokecü mekhru kesa puo zhü.

⁴²Sünhie Judako Mhakesekecü teisozha, mu mekhruu süki zocü la unie Jisu pie sünu nu khruwa.