Read Angami Naga Johan 2 Bible Online

Johan 2 - Angami Naga bible

Johan 2

¹Zha se nhie Galil Kana rünau nu nuyie puo chü, mu Jisunuo zuo rei sünu ba.

²Siro nuyie sünu Jisu mu puo siedziko rei sa kie.

³Süki khubezu tsatazhü tse, Jisunuo zuo sie puo ki, “Uko khubezu jüte” sishü.

⁴Sitse Jisu sie, “No a bu kedipuo chü morosuo shicü pu morei vi. Tsierei a teiu vor moluo” sita.

⁵Sitse puo zuoe chalieko ki, “Puo nieko ki mhakehoupuo pu rei chüliecie” ishü.

⁶Süki Judako u chü kemesaketuo zho-u la, ketsie kouzuo sorou ba, puo nu dzü lipfü ser balie vi.

⁷Sitse Jisu uko ki, “Dzü pie kouzuoko tshuliecie” sishü. Sitse uko dzü pie süko tshu kho puo nyie tso phrelie.

⁸Siro puo sie uko ki, “Tsie dzü huo thoulie di pie vo mha meza keba krütau ki shücie” sishü. Mu uko rei pie puo ki vo.

⁹Süki krütaue dzü khubezu chü parketau metha, derei puo khubezu kirapuonu se vor shicü si mo, (sirei dzü thoupie kevor chalieko süu si ba), süla puoe yasau kieshü,

¹⁰di puo ki, “Kehoupuorei therieki khubezu kevi khashü di mia krie u kelhuo chülie tse, krie kesuo khashütaya, derei no we tsierei khubezu kevi khashü baze ha!” sita.

¹¹Jisu Galil Kana nunu zasi kerie hau chüshü di puo zayie pie pekieshü; mu puo siedziko rei puo pelelie.

¹²Hau sie puo mu puo zuo, puo siezeko, mu puo siedziko ze di vo zha huoyo Kapernaum nu bata.

¹³Süki Judako Ciekevo tei penuota, süla Jisu Jerusalem nu kho.

¹⁴Sidi puo rüsuoki nu mia mithu, tekuo, paruonuo ze mu priesa keliyakezhako ba di ngulie.

¹⁵Süla puo mha kevüro chülie di rüsuokiu nunu tekuo mu mithuko pete whuopie chazou shüwa. Süsie priesa keli kebako priesa pete bie kezakeziwa mu mizhüko phou pelawa.

¹⁶Siro puo paruonuo ze kebako ki, “Mha hako chü setalie! A puo ki üse lhithoki chü hie!” sita.

¹⁷Süki puo siedzikoe “N kiu la a shürhei thuo a cü pejüwatuo” idi thupiekezhü dieu rükralie.

¹⁸Sitse Judako puo ki vor di sie, “No hakemhie chükezha kedipuo zasi se hie pekieshülie vi ga?” idi ketsota.

¹⁹Jisu sie uko ki, “Rüsuoki hau bierhuowalie, sitse a zha se nu süu chü lalietuo” sita.

²⁰Sitse Judako sie, “Rüsuoki hau teicie hiediaesorou se chütazhie, mu no zha se nu süu chü pesie lalietuo le?” sita.

²¹Derei puo puo mo rüsuokiu dze kepu zo.

²²Süla puo kesia nunu rheilakelie sie puo hau dze pushü zo ükecü puo siedzikoe rükralie di uko Ketholeshü dieu mu Jisu pukeshü dieu pelelie.

²³Süsie puo Ciekevo nyiu nu Jerusalem nu keba ki zasi chükeshüko ngu di mia kekra puo za nunu pelelie.

²⁴Derei Jisu puo thuo zowe uko le pevi mo, puoe themia pete rüli sikecü la.

²⁵Siro mia puo bu rei u rüli pie puo ki pu mo rei puo süko nou kedipuo ba shi si phreya.