Read Angami Naga Johan 20 Bible Online

Johan 20 - Angami Naga bible

Johan 20

¹Siro deoba zha therienhie teizei baluocü nu Maria Magdalapfü mekhruu nu vo ru mekhruu nunu ketsieu ketoukewa ngulie.

²Sitse puo ta Simon Pitor mu Jisue puo khrie kevor pethakelie kekreiu ki vo di, “Mia mekhru nunu Niepuu toupiete, mu puo pie kirapuo zhüwa shi hie si mote!” sishü.

³Süsie Pitor mu pethakelie kekreiu mekhruu tsatie va vota.

⁴Unie keze ta vozhü ru pethakelie kekreiu Pitor mhodzü rie vo mekhru tsolie.

⁵Puo nuketsu ru linen pfheko kezhü ngu, derei puo tuo le mota.

⁶Süsie nu Simon Pitor vor tsolie di mekhru nu le, puo rei linenpfheko kezhü ngulie,

⁷mu Jisu tsü kedze pfhenyhieyo, linenpfheko kezhü ki zhü mo di rüzi vo krei zhüketa ngulie.

⁸Süsie pethakelie kekreiu vor mekhruu tso riekelieu rei mekhru nu le, mu puo rei ngu di pelelie.

⁹Unie puoe kesia nunu rheilasie morosuokecü ketholeshü dieu silie mo zoluo.

¹⁰Sidi pethakelienie tuo la u kinu vota.

¹¹Derei Maria mekhruu khieki nu kra tha. Puoe kra chakhra nuketsu mekhruu meho;

¹²sitse teigeidieliemia kenie pfhe kekra se di Jisu pie kezhü chüu nu, mia puo puo tsütsa mu kekreiu puo phitsa keba ngu.

¹³Sitse unie sie puo ki, “Thenupfü no kiüdi kraya ga” ishü. Puo sie “Mia a Niepuu chüpiete, mu uko puo pie vo kirapuo shüwate shi a si mote” sita.

¹⁴Sishü di puo reipra tse Jisu süki ketha ngulie, derei puo süu üse Jisu ücü si mo.

¹⁵Sitse Jisu puo ki, “Thenupfü, no kiüdi kraya ga? No supuo pfhüya ga?” sishü. Puo süu üse tezie kepfheu nhie di sie puo ki, “Kezhau, mhanuü no puo toupieta üro, puo pie vo kirapuo zhüwate shi a ki pucie, sitse a pielietuo” sishü.

¹⁶Sitse Jisu sie puo ki, “Maria” si. Sitse puo reipra Ibri[51] die nunu puo ki, “Raboni” (puoca kepethau) ita.

¹⁷Jisu puo ki, “A khashü mvü ba zo hiecie, kekreilamonyü a tsierei Puou ki vo moluo. Derei no vo di a siezeko ki ‘A a Puou mu nieko Puou, a Kepenuopfü mu nieko Kepenuopfü ki khotazhükecü pushücie’ ” sita.

¹⁸Sitse Maria Magdalapfü vo di puoe pethakelieko ki, “A Niepuu nguwe,” ishü mu Jisu puo ki mha hako pu üdi pie uko ki pushü.

¹⁹Siro deoba zha therienhie thevatie pethakeliekoe kese, mu Judako keprei la kikhapfü di keze kehoukengupfü ba, süki Jisu vor uko donu thalie di sie, “Nieko keviu chüliecie” si.

²⁰Puo hau pukeshü sie, puo dzienie mu puotie rei pie uko pekieshü. Sitse pethakelieko Niepuu ngushü di uko nei phita.

²¹Jisu la sie uko ki, “Nieko keviu chüliecie. Puou a ketsekeshü tuoi a rei nieko ketseshü ho” sishü.

²²Puo die hako pukeshü sie hapie uko geishü di, “Kemesa Ruopfüu lieliecie.

²³Nieko mia kejo vapie tsüwa ro, süko vawata zo; nieko süko vapie tsü mo ro, süko ba zotuo” sishü.

²⁴Derei Jisu uko ki kevor ki Thoma (Nuobi[52] ükezhau) kerekenieko mia puo uko ze ba mo.

²⁵Süla pethakelie kekreiko sie puo ki “Hie Niepuu nguwe” ishü. Derei puo uko ki “A a thuo puo dzienie nu gojalpfüko ngu, mu a dziekinuo pie gojalpfü nu shü zo kemosie pelelie lho” sita.

²⁶Siro zhadoudo puo sie pethakelieko Thoma sa di keze ki nu ba. Uko kikhapfü ba, derei Jisu uko donu ler thalie di sie, “Nieko keviu chüliecie” si.

²⁷Süsie puo sie Thoma ki, “N dziekinuo pie hanu shücie mu a dzienie meholie, siro n dzie yhapie a tie rei biecie. Sidi kenoudota mo di pele zolie” sita.

²⁸Thoma sie puo ki, “A Niepuu mu a Kepenuopfü” sita.

²⁹Jisu puo ki, “No a ngukelie la pelelie me? Ngu mo di pelekelieko we thejakepfütho zo” sita.

³⁰Leshü hau nu thupie tuo kemo zasi kekra Jisue pethakelieko kengu ki nu chü sashü.

³¹Derei mha hako thukelie nie bu Jisue Khristau, Ukepenuopfü Nuou ükecü pelelie[53] mu puo pelekelie geinu kerhei ngulieketuo la zo.