Read Angami Naga Johan 21 Bible Online

Johan 21 - Angami Naga bible

Johan 21

¹Mha hako sie Jisu Tiberia Dzükezha khieki nu puo thuo puo pie pethakelieko pengu lashü; mu puo uko pengukeshü hamhie.

²Süki Simon Pitor, Thoma nuobi[54] ükezhau, Galil Kanamia Nathaniel, Zebedi nuonie mu Jisu siedzimia kekrei kenie rei sa keze tuo.

³Simon Pitor sie uko ki, “A tsu khuo tetuo” sita. Sitse uko puo ki, “Hie rei n ze tsutuo” sita. Süla uko rou puo nunu keze tsuta, derei uko süzhü mhapuorei telie mo.

⁴Süsie duü teiso pi par tse, Jisue dzükezha khieki keso nu tha di ngulie, derei pethakelieko süu üse Jisu ücü silie mota.

⁵Sitse Jisu uko ki, “A nuonuoko, nieko khuo puorei telie mo me?” idi ketso. Uko sie puo ki, “Puorei telie molie” si.

⁶Sitse puo sie uko ki, “Nieko jal kelhoupie rou tsei thezatsa shücie, sitse nieko khuo huo telietuo ho” sishü. Süla uko jal kelhoupie sütsashü ru uko süu teshülie lhota, khuo kekra bolieketa la.

⁷Süki Jisue puo khrie kevor pethakelieu sie Pitor ki, “Puo Niepuu ta zo” sishü, Pitor süu Niepuu ükecü silie tse puo methuo tuokecü la puo boulie boulielie di prou dzükezha nu leta.

⁸Derei pethakelie kekreiko rou kecü nu lelie di khuo tshu pfüketuo jal merhashüse dzükezha khie vota, uko keso nu vorketuo thu krie kenie zie ba moketa la.

⁹Sidi uko keso nu parlie tse, mizhü pie mi kechü mu sügei khuo mu niekhrüda kezhü ngulie.

¹⁰Sitse Jisu uko ki, “Nieko tsie nu tekelie khuoko huo se vorcie” sita.

¹¹Süla Simon Pitor vo khuo kezhazha krie di hiepengouese ketuo jal-u merhashü keso nu parlie, mu khuo süthede tuo rei jal-u rürhata mo.

¹²Jisu uko ki, “vor di mhacüliecie” sishü. Süki pethakelieko miapuorei puo üse “No supuo ga?” icü ketso nreita, kekreilamonyü uko puo Niepuu zoükecü silieta.

¹³Sidi Jisu vor niekhrüda chülie di pie uko tsüshü mu sümhie khuo rei pie uko tsüshü.

¹⁴Hauha Jisue kesia nunu rheilakelie sie pethakelieko pengukeshü va seu.

¹⁵Uko mhacükelie sie, Jisu sie Pitor ki, “Johan nuou Simon, no hako ki a khriekuoya mo?” ita. Puo sie puo ki, “N zo, Niepuu no a n khrieya ücü si ba” sishü. Jisu sie puo ki, “A kuonuoko vachüshücie” sita.

¹⁶Siro va kenieu va rei puo sie puo ki, “Johan nuou Simon, no a khrieya mo?” idi ketso lata. Puo sie puo ki, “N zo, Niepuu no a n khrieyakecü si ba” sishü. Jisu sie puo ki “A kuokoyo pfheliecie” si.

¹⁷Puo va seu puo ki, “Johan nuou Simon no a khrieya mo” idi ketso lata. Pitor Jisu va se puo ki, “No a khrieya mo?” idi ketsoketa la puo nou suota. Jisu sie puo ki, “A kuoko vachüliecie.

¹⁸A nieko ki pu toushütuo, no n khriesa ki n thuo n chie phapfü di no vo kenyüra vo ze. Derei no tsata tse n dzienie yhashü di mia bu n chie phashü di n ze no vo nyü kemora rei votuo” sishü.

¹⁹(Puo hau pukeshü puo kedipuo se chü di Ukepenuopfü za chü kemeyietie shicü thakeshü zo.) Süsie puo sie puo ki, “A siemedziliecie” sishü.

²⁰Pitor reipra ru Jisue puo khrie kevor pethakelie kekreiu uko mhacü keba ki Jisu khieki mizhü vakhriepfü di, “Niepuu supuo n teshütuoüya ga?” ikeshüu puo sietsa vorkezhü ngulie.

²¹Pitor puo ngukeshü ki, Jisu üse, “Niepuu, siro themia hau bu kedipuo chü ta?” sishü.

²²Sitse Jisu sie puo ki, “A la vor kemochie puo bu ba zoketuo a medo liro, süu n la kedipuo mu? A siemedziliecie!”

²³Süla pethakelieu siatalie lhoükeshü süu themia[55] donu diekrie pu vota. Sirei Jisu puo üse siatalie lho zo üdi pu mo, derei, “A la vor kemochie puo bu ba zoketuo a medo liro, süu n la kedipuo mu?” ikeshü zo.

²⁴Pethakelie hau mha hako dze pushü, mu süko rei sa thukeshüu, mu hie puo zhapuu ketho zo ükecü si touta zo.

²⁵Sizomonyü Jisu mha kekrei kekra rei sa chüshü; mu süko puopuo di thutuo üro a nou kele süko kijü hau nu puo chü jütatuo.