Read Angami Naga Johan 3 Bible Online

Johan 3 - Angami Naga bible

Johan 3

¹Farisimia Nikodema ükecü puo tuo, puo Judamia krüta chüya.

²Puo theva ze Jisu ki vor di puo ki, “Kepethau, no ha Ukepenuopfü kinu kevor kepethamia puo ükecü hie si ba; Ukepenuopfü u ze tuo kemosie miapuorei noe chükeshü zasi hako chülie kenjü zocü la” sita.

³Sitse Jisu puo ki, “A n ki pu toushütuo, penuo kesa la kemosie miapuorei Ukepenuopfü kedi ngukelie jü” sishü.

⁴Sitse Nikodema sie puo ki, “Kimhiei di phichümia puo bu penuo lalietuo mu? Puo puo zuo va nu la le di penuolie vi me?” sita.

⁵Sitse Jisu sie, “A n ki pu toushütuo, dzü mu Ruopfü nunu penuo la kemosie miapuorei Ukepenuopfü kedi ngukelie jü zo.

⁶Chüüphou nunu penuokelie sü chüüphou zo, mu Ruopfü nunu penuokelie sü ruopfü zo.

⁷A n ki ‘Nie penuo kesa la morosuo bei’ ikeshü la n ngo hiecie.

⁸Tei rükhriese[5] puo thuo puo neira voya; no süu pfhe siya, derei no süu kirapuonu vor shi morei kirapuo votaya shicü siya mo. Süla kehoupuorei Ruopfü nunu kepenuo rei sümhie zo” sishü.

⁹Nikodema sie puo ki, “Kimhiei di silietuo mu?” sita.

¹⁰Jisu sie puo ki, “No Israelmia kepetha puo chü tuo di tsierei mha hako si mo le?

¹¹“A n ki pu toushütuo, hie si kebau puya mu hie kenguu dze zhapu chüya; sirei nieko miapuorei hie zhapuu lie nyüya mo.

¹²A kijüu dzeko kepu thuo rei nie pele mo liro, kimhie di a teigei dzeko kepuu pelelietuo ga?

¹³Themia Nuou, teigei nu keker-u zo kemosie miapuorei teigei sie chie mo.

¹⁴Thiedzü Mosa rayha nunu tinyhü pie kesie tuoi, Themia Nuou rei mia bu puo pie sie morosuo,

¹⁵süu geinu puo pelekelie kehoupuo bu rei kechachie kerhei ngulieketuo la.

¹⁶“Siro Ukepenuopfü kijüu khriethor zo di puo Nuo pfuliu khashü zo, kekreilamonyü themia kehoupuorei puo pelekelieu kaüjüta mo di kechachie kerhei ngulieketuo la.

¹⁷“Siro kijüu bu jotatuo üdi Ukepenuopfü puo Nuo ketsepie kijü nu shü monyü, kijüu bu puo la kelakelie ngulieketuo la zo.

¹⁸Puo pelekeliemia pejolie lho; derei pelekemomia tsierei pejopie bata zo, ue Ukepenuopfü Nuo pfuliu za nunu pelelie moketa la tsierei pejopie bata zo.

¹⁹Siro kepejo die süu, kezieu kijü nu vor, derei themiako kezieu kirei kezeiu khriekuota, uko mhatho mezhü moketa la.

²⁰Kehoupuorei mha kesuo chüyakezhamia kezieu ngumecüya, ue u mhatho kesuo kechüu thashü mia kie moketuo la.

²¹Derei ketho chüyakezha kehoupuorei u mhathoko Ukepenuopfü la chülie zo ücü pie pekieshüketuo la kezieu ki vorya” sishü.

²²Süsie Jisu mu puo siedziko tuose Judia kijü nu vor mu puo uko ze sünu ba di mia dzülu khashü.

²³Johan rei Salim kepenuoki Ainon nu dzü ba phikecü la dzülu khashü mia tsü ba; mu themiako puo ki vor di dzülupfülieya,

²⁴Süki Johan tepie kedie chüwa moluo.

²⁵Siro Johan siedzikoe Judamia puo ze u chü kemesakecü dze kepu tha.

²⁶Süla uko Johan ki vor di puo ki, “Kepethau, mia puo Jordan rükhie niathutsanu n zeketuou, no puo zhapukeshüu, harie, tsie dzülu khashü tuote mu themia pete puo ki votazhie” sishü.

²⁷Sitse Johan sie, “Teigei nu khashü puo tsü kemosie puo mhapuorei ngulie kenjü.

²⁸‘A Khristau mo, derei puo mhodzü a ketseshü zo’ isi di a hadzü pukeshü nieko thuo zorei a zhapu ba zo.

²⁹Yasapfü sü Yasau vie zo. Yasau zeu tha di puo pfhe rünyü di puo pfhe sikeshü la puo nei phi thaya. Süla a kenei süu tseiliete.

³⁰Puo zha miemieta morosuo derei a we cü miemieta morosuo.”[6]

³¹Peso geinu kevor-u peteko mho zo, kijü nunu kepar-u kijüu nuo zo, mu kijüu die puya, teigei nu kevor-u peteko mho-u zo.

³²Puo puo kesikenguko puya, derei miapuorei puo zhapu die lielie mo.

³³Sirei kehoupuorei puo zhapu die liekelieu Ukepenuopfü ketho pu zo ükecü zasi vüpfülietaya[7].

³⁴Ukepenuopfüe ketsekeshüu Ukepenuopfü die puya, puoe mejü mo zo di Ruopfüu khashüyakecü la.

³⁵Puoue Nuou khrieya mu kekuo pete khapie puo tsüwate.

³⁶Kehoupuorei Nuou pelekelieu kechachie kerhei bate, kehoupuorei Nuou die ze kemo-u kerhei ba mo, derei Kepenuopfü noupfhüu puo gei bataya.